Коми Республикаын гражданаӧс видзан мероприятиеяс нуӧдысь комитет йылысь
КОМИ РЕСПУБЛИКАСА ЮРАЛЫСЬЛӦН ИНДӦД
Шуа:
1. Вынсьӧдны Коми Республикаын гражданаӧс видзан мероприятиеяс нуӧдысь комитет йылысь положение содтӧдын индӧм серти.
2. Тайӧ Индӧдыс вынсялӧ сійӧс кырымалан лунсянь.
Коми Республикаса Юралысь
В. Гайзер
Сыктывкар
2011 вося косму тӧлысь 14 лун
50 №
☼ ☼ ☼
ВЫНСЬӦДӦМА
Коми Республикаса Юралысьлӧн
2011 во косму тӧлысь 14 лунся 49 №-а Индӧдӧн
(содтӧд)
Коми Республикаын гражданаӧс видзан мероприятиеяс нуӧдысь комитет йылысь
ПОЛОЖЕНИЕ
I. Панас
1. Коми Республикаын гражданаӧс видзан мероприятиеяс нуӧдысь комитет (водзӧ – Комитет) лоӧ Коми Республикаса олӧмӧ пӧртысь власьт органӧн, коді дасьтӧ да збыльмӧдӧ государственнӧй политика, нормативно-правовӧя веськӧдлӧ природнӧй да техногеннӧй сяма виччысьтӧм лоӧмторъясысь йӧзӧс да мутасъясӧс видзан юкӧнын (водзӧ – виччысьтӧм лоӧмторъяс), видзӧдӧ пӧжарысь видзчысьӧм бӧрся, а сідзжӧ лоӧ Коми Республикаса олӧмӧ пӧртысь власьт уполномочитӧм органӧн, коді радиоактивнӧй веществояслы да радиоактивнӧй колясъяслы государствосянь учёт нуӧдан да контролируйтан система серти нуӧдӧ учёт Коми Республика мутасын радиоактивнӧй веществояс да радиоактивнӧй колясъяс кузя да видзӧдӧ та бӧрся.
2. Комитет аслас уджын мыджсьӧ Россия Федерацияса Оланподув да Коми Республикаса Оланподув, федеральнӧй оланпасъяс да Коми Республикаса оланпасъяс, Россия Федерацияса да Коми Республикаса мукӧд нормативнӧй правовӧй акт, а сідзжӧ тайӧ Положение вылӧ.
3. Комитет уджалӧ кыдзи ачыс веськыда, сідзи и ӧтув федеральнӧй олӧмӧ пӧртысь власьт органъяскӧд, Коми Республикаса государственнӧй органъяскӧд, меставывса асвеськӧдлан органъяскӧд, общественнӧй ӧтувъяскӧд да мукӧд организациякӧд.
4. Комитетлӧн инпас – Сыктывкар.
II. Уджмогъяс, могъяс
5. Комитет сылы урчитӧм уджын збыльмӧдӧ татшӧм уджмогъяс, могъяс:
1) урчитӧм пӧрадок серти лӧсьӧдӧ да сетӧ войтырӧс доръян, виччысьтӧм лоӧмторъясысь олысьясӧс да мутасъяс видзан, пӧжарысь видзчысьӧмӧн могмӧдан юкӧнын могъяс збыльмӧдӧм кузя вӧзйӧмъяс Коми Республикаса Юралысьлы, Коми Республикаса Правительстволы видлалӧм вылӧ;
2) виччысьтӧм лоӧмторъяс дырйи да военнӧй кадӧ лӧсьӧдӧ Коми Республикаса йӧзӧс эвакуируйтан план, збыльмӧдӧ сійӧс да быд во стӧчмӧдӧ;
3) урчитӧм пӧрадок серти индӧ, кутшӧм да мый йылысь документъяс подулалӧны корана сьӧмсӧ, да нуӧдӧ сетӧм документъяслы экспертиза сы могысь, медым Коми Республикаса Правительство примитіс Виччысьтӧм лоӧмторъясысь да неминучаысь ӧлӧдӧм да колясъяс бырӧдӧм кузя Коми Республикаса Правительстволӧн резервнӧй фондысь сьӧм сетӧм йылысь решение;
4) аслас уджмогъяс серти котыртӧ да видзӧдӧ сы бӧрся, кыдзи Коми Республика мутасын виччысьтӧм лоӧмторъясысь колясъяс бырӧдӧм вылӧ материальнӧй ресурсъяслысь республиканскӧй резервсӧ видзӧны, наӧн вӧдитчӧны да бӧр бергӧдӧны;
5) организационно-техническӧя могмӧдӧ виччысьтӧм лоӧмторъясысь ӧлӧдӧм да сійӧс бырӧдӧм да пӧжарысь видзчысьӧмӧн могмӧдӧм кузя Коми Республикаса Правительстволӧн комиссиялысь да Республиканскӧй эвакуационнӧй комиссиялысь уджсӧ;
6) котыртӧ Коми Республикаын терроризмлы паныд удж нуӧдысь комиссиялысь (Комиссияса аппаратлысь) уджсӧ да могмӧдӧ сійӧс материально-техническӧя;
7) збыльмӧдӧ лӧсялана веськӧдлан юкӧнын (сфераын) Коми Республикаса государственнӧй учреждениеясса учредительлысь могъяс да уджмогъяс;
8) урчитӧм пӧрадок серти збыльмӧдӧ Коми Республикаса республиканскӧй бюджетысь сійӧ сьӧмсӧ, мый индӧма Комитет да лӧсялана веськӧдлан юкӧнын (сфераын) Коми Республикаса государственнӧй учреждениеяс видзӧм вылӧ да Комитетлы сетӧм могъяс збыльмӧдӧм вылӧ, медшӧр сьӧм юклысьлысь да сьӧм босьтысьлысь могъяс;
9) урчитӧм пӧрадок серти Комитетлысь уджсӧ могмӧдӧм вылӧ нуӧдӧ вузӧс нуӧм, уджъяс вӧчӧм да услугаяс сетӧм вылӧ заказъяс иналӧм кузя государственнӧй заказчиклысь удж;
10) урчитӧм пӧрадок серти Коми Республикаса государственнӧй гражданскӧй служащӧйясӧс, кодъяс уджалӧны Комитетын Коми Республикаса государственнӧй гражданскӧй службаса чинъясын, выльысь велӧдӧны, налысь квалификациясӧ кыпӧдӧны да найӧс стажируйтӧны;
11) урчитӧм пӧрадок серти видзӧ государственнӧй гусятор кутысь юӧръяс да видзӧ юӧрсӧ техника боксянь;
12) збыльмӧдӧ Комитетын войтырӧс дорйӧм кузя мероприятиеяс Коми Республикаын войтырӧс доръян удж котыртӧм да нуӧдӧм йылысь положение серти, мый вынсьӧдӧма Коми Республикаса Юралысьлӧн 2008 во йирым тӧлысь 13 лунся 97 №-а Индӧдӧн;
13) лӧсьӧдӧ да збыльмӧдӧ Комитетын пӧжарысь видзчысян удж;
14) урчитӧм пӧрадок серти примитӧ Комитетлӧн компетенцияӧ пырысь юалӧмъяс кузя гражданаӧс, ас кадӧ видлалӧ гражданалысь шыӧдчӧмъяссӧ, примитӧ на серти решениеяс да мӧдӧдӧ шыӧдчысьяслы вочакывъяссӧ законодательствоӧн индӧм кадколастӧ;
15) Россия Федерацияса законодательство серти Комитетлӧн уджын артмӧм архив документъяссӧ комплектуйтӧ, видзӧ, нуӧдӧ налы учёт да наӧн вӧдитчӧ;
16) пӧртӧ олӧмӧ Коми Республика мутасын удж видзан юкӧнын государственнӧй политикалысь медшӧр туйвизьяс «Удж видзан юкӧнын ӧткымын юалӧм йылысь» Коми Республикаса Правительстволӧн 2008 во январ 29 лунся 16 No-а шуӧмын индӧм компетенцияын;
17) котыртӧ да могмӧдӧ Комитетын мобилизационнӧй дасьлун да мобилизация, координируйтӧ да видзӧдӧ, кыдзи лӧсялана веськӧдлан юкӧнын (сфераын) организацияяс нуӧдӧны мобилизационнӧй дасьлун кузя мероприятиеяссӧ;
18) аслас компетенцияын Коми Республика мутасын котыртӧ да нуӧдӧ терроризмысь да экстремизмысь ӧлӧдӧм кузя, Коми Республикаын терроризмлы паныд комиссиялӧн решение серти налысь колясъяссӧ мый вермана бырӧдӧм кузя мероприятиеяс;
19) урчитӧм пӧрадок серти котыртӧ да (либӧ) участвуйтӧ Комитетлӧн компетенцияӧ пырысь юалӧмъяс кузя конгрессъясын, конференцияясын, семинаръясын, выставкаясын да мукӧд мероприятиеын;
20) урчитӧм пӧрадок серти лӧсьӧдӧ да нуӧдӧ Коми Республикалысь радиационно-гигиеническӧй паспорт;
21) Коми Республика мутасын радиоактивнӧй веществояс да радиоактивнӧй колясъяс босьтӧ государствосянь учётӧ да видзӧдӧ радиоактивнӧй веществояс да радиоактивнӧй колясъяс государствосянь учётӧ босьтан да видзӧдан система серти;
22) Россия Федерацияса законодательство да Коми Республикаса законодательство серти вӧчӧ мукӧд мог.
6. Комитет урчитӧм уджын уджмогъяс олӧмӧ пӧртӧм могысь вермӧ:
1) урчитӧм пӧрадок серти корны да босьтны Коми Республикаса государственнӧй власьт органъяссянь, Коми Республикаса государственнӧй органъяссянь, меставывса асвеськӧдлан органъяссянь да организацияяссянь Комитетлӧн компетенцияӧ пырысь могъяс збыльмӧдӧм вылӧ юӧръяс, колана материалъяс да документъяс;
2) сёрнитчӧм подув вылын корны организацияясӧс сы могысь, медым нуӧдны войтырӧс доръян, виччысьтӧм лоӧмторъясысь олысьясӧс да мутасъяс видзан, пӧжарысь видзчысьӧмӧн могмӧдан юкӧнын Коми Республикалысь уджмогъясӧн могмӧдан юалӧмъяс кузя туялӧмъяс;
3) урчитӧм пӧрадок серти участвуйтны виччысьтӧм лоӧмторлысь помкаяссӧ туялӧмын.
III. Удж нуӧдан пӧрадок, организационнӧй тэчас
7. Комитетӧн веськӧдлӧ Комитетса веськӧдлысь, кодӧс индӧ чинӧ да мездӧ чинысь Коми Республикаса Юралысь.
Комитетса веськӧдлысь ачыс кывкутӧ Комитет вылӧ сетӧм уджмогъяс збыльмӧдӧмысь да урчитӧм удж юкӧнын государственнӧй политика олӧмӧ пӧртӧмысь.
Комитетса веськӧдлысьлӧн эм ӧти вежысь, кодӧс индӧны чинӧ да мездӧны чинысь Россия Федерацияса законодательствоӧн да Коми Республикаса законодательствоӧн урчитӧм пӧрадок серти.
Комитетса веськӧдлысьӧс вежысь Комитет нимсянь уджалӧ эсканпастӧг да веськӧдлысьӧн индӧм правояс да могъяс серти.
Кор Комитетса веськӧдлысь недыр абу, сылысь могъяссӧ збыльмӧдӧ Комитетса веськӧдлысьӧс вежысь, а кор абу Комитетса веськӧдлысьӧс вежысь – Комитетса веськӧдлысьлӧн решение серти Комитетлӧн тэчас юкӧдувса начальникъяс пиысь ӧти. Кор эм Комитетса веськӧдлысьлӧн прӧст чин, Комитетса веськӧдлысьлысь могъяс индӧм йылысь решение примитӧ Коми Республикаса Юралысь.
8. Комитетлысь медыджыд штат лыдсӧ индӧ Коми Республикаса Правительство.
Комитетлӧн тэчас юкӧдувъясӧн лоӧны юкӧнъяс уджын татшӧм медшӧр туйвизьяс серти:
1) сьӧм да материальнӧй ресурсъяс серти юалӧмъяс;
2) организационнӧй, правовӧй да кадрӧвӧй удж кузя юалӧмъяс;
3) войтырӧс дорйӧм кузя юалӧмъяс.
9. Комитетса веськӧдлысь:
1) Комитетса уджӧн веськӧдлӧ ӧтнас да ачыс кывкутӧ Комитетлы сетӧм могъяс да удж збыльмӧдӧм вӧсна;
2) эсканпастӧг Комитет нимсянь уджалӧ государственнӧй власьт органъяскӧд, меставывса асвеськӧдлан органъяскӧд да организацияяскӧд, ёрдын, сетӧ эсканпасъяс, восьтӧ банкъясын Комитетлысь тшӧтъяс, вӧчӧ сделкаяс да мукӧд юридическӧй удж, мый урчитӧма законодательствоын.
3) Комитетлӧн компетенцияын йӧзӧдӧ правовӧй актъяс (тшӧктӧдъяс, тшӧктӧмъяс, инструкцияяс), а сідзжӧ методическӧй индӧдъяс да гӧгӧрвоӧдӧмъяс, видзӧдӧ найӧс збыльмӧдӧм бӧрся;
4) вынсьӧдӧ Комитетлысь штатнӧй расписание да бюджетнӧй смета медыджыд штат лыд да бюджетнӧй ассигнованиеяс индӧм мында, мый урчитӧма лӧсялана финансӧвӧй во вылӧ Коми Республикаса республиканскӧй бюджетын.
5) урчитӧм пӧрадок серти вынсьӧдӧ Комитетлӧн тэчас юкӧдувъяс йылысь положениеяс, а сідзжӧ Комитетса уджалысьяслӧн чина регламентъяс;
6) индӧ аслас вежысьлысь могъяссӧ;
7) урчитӧм пӧрадок серти Комитетлӧн компетенцияӧ пырысь юалӧмъяс кузя пыртӧ Коми Республикаса оланпас балаяс да мукӧд правовӧй акт;
8) индӧ чинӧ (примитӧ удж вылӧ) да мездӧ чинысь (мездӧ удж вылысь) Комитетса уджалысьясӧс;
9) законодательстволӧн нормаяс серти решайтӧ, Комитетса уджалысьяс пиысь кодӧс ошкыны да кодӧс дисциплинарнӧя мыждыны;
10) урчитӧм пӧрадок серти сетӧ Комитетса бур уджалысьясӧс Россия Федерацияса, Коми Республикаса государственнӧй наградаясӧн ошкӧм йылысь вӧзйӧмъяс;
11) урчитӧм пӧрадок серти мӧдӧдӧ Комитетса уджалысьясӧс служебнӧй командировкаясӧ;
12) законодательство серти вӧдитчӧ Комитетлӧн сьӧмӧн да материальнӧй ресурсъясӧн;
13) государственнӧй гражданскӧй служба йылысь Россия Федерацияса законодательство да Коми Республикаса законодательство серти решайтӧ юалӧмъяс, кутшӧмъяс йитчӧмаӧсь Комитетын государственнӧй гражданскӧй службакӧд;
14) вынсьӧдӧ Комитетлысь удж регламентсӧ;
15) Россия Федерацияса законодательство да Коми Республикаса законодательство серти вӧчӧ мукӧд уджмог.
10. Комитетсӧ сьӧмӧн видзӧм вылӧ рӧскодыс финансируйтсьӧ Коми Республикаса республиканскӧй бюджетын урчитӧм сьӧм тшӧт весьтӧ.
11. Комитет лоӧ юридическӧй кывкутысьӧн, сылӧн эм печать Коми Республикаса государственнӧй канпасӧн да коми да роч кывъяс вылын гижӧм ас нимӧн, урчитӧм образеца мукӧд печать, штамп да бланок, Россия Федерацияса законодательство серти восьтӧм тшӧтъяс.
