×

Status message

Do something on load!

ДАРЬЯ ТЬӦТЛӦН ШОГ


1
Пышйӧ шердын потшӧс бердӧд Завор дорсянь паськыд эрдӧ. Шердын бӧрся грымгӧ вор — Ылӧ кылӧ сылӧн гор. Киссьӧм корӧсь, няйтӧсь коръя, Зільӧ панйыны кыз ворйӧс. Нӧрыс йывсянь тӧв ныр моз Чуши-чаши кырссьӧ рос. Муяс вывті гӧра бокӧд Черкӧд кӧрт зыр пызйӧ-кокӧ. Брунгысь-брангысь выя рач Вӧрлань ризйӧ кӧм ни гач.
2
Би кодь гӧрд Ыргӧн пӧрт Петіс мир туй вылӧ — Пышйӧ-брунакылӧ. Укват шенасьӧ да горзӧ, Чукля кокыс сідзи-й ворсӧ. Утюг кашкӧ, лолыс тырӧ, Муӧ кыз рушкуыс пырӧ. Ружтӧ-ваджиктӧ ва пельса, Вылас таркакылӧ кӧш. Чуман чошкӧдӧма пельсӧ. Пышйӧ-тэрмасьӧ кыз нӧш. Чайник читкыралӧ син — Трин да трин, трин да трин. Котӧртӧны чайнӧй блюдъяс — Зили-зили-зили-зёль! Пышйӧмаӧсь пӧчӧ кудйысь, Эз нин некод сэтчӧ коль. Стӧканъясӧс люкалӧны — зёль! Стӧканъясыс жугалӧны — голь! Пызан лэбис ӧшинь пыр, А сы бӧрся тшан да гыр — Кырссьӧ-грымакылӧ ставыс Дарья тьӧтлӧн араваыс. Пызан вывсянь горзӧ-чуйдӧ, Пышйысь вылын командуйтӧ Ыджыд-ыджыд самӧвар. Гӧлӧс сылӧн медся яр: «Пышйӧй, пышйӧй татысь, Пышйӧй татшӧм адысь!» И трубанас тутсӧ: «Ту! Ту-ту-ту! Ту-ту-ту!»
3
Дозмук бӧрся пӧчӧ рӧдтӧ — Шогыс йӧткӧ Дарья тьӧттӧ, Ойзӧ, ку пиас оз тӧр: «Гортӧ бергӧдчӧй вай бӧр!» Тшапа шуис сылы тасьті: «Вывті тӧдан, Дарья, асьтӧ!» Сылы шуис сэсся пань: «Абу, Дарья, тэ бур ань!» Каньяс равзігтырйи квайтӧн Ризнитісны бусӧд-няйтӧд — Дозмук бергалӧны гортӧ, Садьтӧг повзьӧм Дарья ордӧ. «Кытчӧ тривксьӧданныд, бӧбъяс? Муӧдз ӧшӧдӧмныд льӧбъяс... Вошад сьӧд вӧр шӧрӧ, сёрдӧ. Бурджык бергӧдчӧй вай гортӧ!» Быттьӧ дурпоп шордлӧ дозмук — Некод Дарья ордӧ оз мун: «Бурджык миянлы сьӧд вӧр, Некор огӧ локтӧ бӧр!»
4
Курӧг сэтчӧ кыськӧ петіс, Пышйысь дозмук аддзис сэтысь: «Кот-кот-кот! Кот-кот-кот! Вот тай дивӧ, вот тай вот! Латка тьӧтка... укват дядьӧ... Ті нӧ кодӧсь али садьӧсь!?» Сэки вочавидзис дозмук: «Мустӧм лои гортса позным. Дарья дурис миян вылын, Мелі кыв эг кывлӧй сылысь... Немӧ воштіс миянӧс, Яйным быдлаті со лӧз!» «Ко-ко-ко! Ок-ок-ок! Тіян олӧм вӧлӧм лёк!» «Видзӧдлы тэ миян вылӧ, — Сімӧм пӧртлӧн гӧлӧс кылӧ, — Миян нёптовтчӧма пыдӧс, Бокным саӧсь, азя шыдӧсь. Юртӧ сюйлы пельса пытшкӧ — Бакыс!.. Косаӧн кӧть ытшкы. Ошкан сьылӧм Дарья йылысь Паськыд лягуша сэн сьылӧ. Стенын тӧрӧканыс гыӧ, Черань — сера дӧра кыӧ. Вот мый понда пышйим гортысь, Няйтӧн тырӧм Дарья ордысь».
5
Котӧртӧ тасьті-пань кырйӧд, Джӧмдылӧ вутшкӧ да мырйӧ. Коньӧрӧс Дарьяӧс суӧма шог: Кольӧма керкаас стеныс да ёг. Кӧсйӧ со пуксьыны пызаныс дорӧ — Сійӧ тай пышйӧма парма сай шорӧ. Лӧсьӧдчӧ пуыштны рок — Ылын зэв кашниклӧн кок. Пышйисны укватъяс, тасьтіяс, паньяс, Кольӧма-сь ӧтнасӧн тӧрӧкан-аньяс. Ок-ок-ок! Ок-ок-ок! Сир курыд шог!
6
Ыб вывті, вӧр пытшті, нюрӧд Дозмукыд водзӧ пыр тюрӧ. Чайник со утюглы шуис: «Кор нӧ нин помасяс туйыс?» Ва пельса шор дорын кашкӧ: «Гортланьӧ бергӧдчам, гашкӧ?» Пипу вор туй шӧрӧ водіс: «Рушкуӧй, ёртъясӧй, потіс!» Друг шуис радлігтыр сэк Ёсь кока жеб ӧщӧпек: «Кодкӧ со локтӧ Эсті туй бокті!» Збыльысь ӧд: пармаысь-вӧрысь Нывбаба тыдовтчис пӧрысь — Дарья тьӧт вӧтӧдӧ найӧс, Ружтігтыр чой паныд кайӧ. Вӧт али вемӧс? Лоӧма шемӧс: Дарьяыд дозмукыд бердӧ Меліа сибӧдчӧ эрдӧ, Дозмукӧс чуксалӧ, кылӧ, Небыдик гӧлӧсӧн сьылӧ: «Ойя-ойя, муса аньӧй, Менам дона тасьті-паньӧй! Айтӧм-мамтӧм коколюка, — Эн жӧ лысьӧмтӧ кӧть жугӧд! Мудзӧсь, коньӧръясӧй, дзӧрад! Меысь пышъянныд сьӧд вӧрас... Локтӧй гортӧ, дона пиян: Олӧм зэв бур лоӧ тіян. Лякны ог кут няйтӧн, саӧн, Мыська сӧстӧм Эжва ваӧн, Сімтӧ вушта кирпич пызьӧн — Сідзи, медым йӧзыс шызяс. Кутад дзирдавны сэк бара Югыд шонді этшӧн яра. Чистӧ тӧрӧканӧс резъя, Швачка чераньясӧс гезйӧн, Вӧтла лягушаӧс нюрӧ — Медым сэн, колӧкӧ, дурӧ». И вот шуис ичӧт тэльӧб: «Ог ме Дарья вылӧ элясь». Содтіс пыскыль кывъя пань: «Миян Дарьяыд зэв шань!» Броткӧ, кылӧ, тэрыб ректан: «Ми тан дзикӧдз, другъяс, гегдам!» И вот чилӧстіс сэк коса: «Вайӧ, ёртъяс, гортӧ косам!»
7
Кутлӧ, окалӧ со тьӧтка Гортӧ воӧм тасьті-пань: «Сёшайт, бобук, зарни пӧтка!.. Менам дозмук — роч акань!» Сэсся лючки ставсӧ мыськис, Сӧстӧм кузьчышъянӧн чышкис, Пуктіс найӧс места вылӧ, Да и шуис «зарни нылӧн». Гажа серӧктісны блюдъяс, Паньяс нюммуніны шуда-сь. Чугун рачыд ӧдъя пачӧ Лэбис кыккокйыв: Туйсӧ тӧдӧ сійӧ ачыс — Аддзис пач подвыв. Пӧжалӧны шаньга, пирӧг — Кодлы колӧ, йирӧй! Нянь зыр ачыс кыскӧ пачысь Лист тыр сӧчӧн — сёй жӧ, пӧчӧ! Роскӧд корӧсь кадриль йӧктӧ, Буслы-ёглы мунны тшӧктӧ. Ветьӧк чишкӧ, гӧгӧр чышкӧ — Воӧ чераньяскӧд тышкӧ. Эз коль некытӧн бус чир. Дарья тьӧтлӧн воссис пир! Стӧкан-чашкаяслы ворсӧ: Трині-трон! Трині-трон! Пӧчлысь йӧктӧдӧ кыз ворсӧ: Гып да гып! Клюн да клён! Тривкъялӧны пож да шердын, Печласьӧны стенысь бердӧ. Укват йӧктӧ тітш да тотш — Юрыс пӧтӧлӧкӧ котш! Пызан вылын пызан дӧра. Дзирыд поднос вылын шӧрас Пуркйӧ парнас варов, яр, Серамбана самӧвар — Гонь-гонь керлӧ тьӧткаланьӧ: «Дарья аньыд миян шань ӧд! Сійӧс кызь во пӧшти тӧда, Чӧскыд чайӧн гӧститӧда — Мыйтӧм колӧ шӧт, Муса Дарья тьӧт!»
Вуджӧдысь: 
Гижӧд
Дарья тьӧтлӧн шог
Оригинал гижысь
Чуковскӧй Корней Иванович
Оригинал ним: 
Федорино горе

lkejrlkelkrgner klrjnelknfrkl ekjnrjkenfrej

1