ТӦРӦКАН


МЕДВОДДЗА ЮКӦН

1

Катша-катша «китш-китш-китш!»
Кӧин вайӧ моздор нитш.
Тури помеч ӧктӧ,
Кок пӧв йылас йӧктӧ.
Кутш да котш да бум да бом —
Каньлы стрӧитӧны дом.
Уджалӧ сё звер.
Мой пилитӧ кер.
Керка лэптӧ ошкыд:
Пессьӧ — кашкӧ-пошкӧ.
Сизь писькӧдӧ ӧшинь,
Оз ков сылы ӧжын!
Сюръяснас меж — швач:
Сёйысь вартӧ пач.
Петук лӧсӧ стен.
Быдӧн зільӧ сэн.
Чожмӧдлӧ стрӧг юсь:
Некод мед оз узь!
Ручӧ-чойӧ канькӧд
Пӧжалӧны шаньга.
Ид нянь шердйӧ кӧч.
Пон нинӧм оз вӧч.
Курӧг рада котсӧ:
«Со тай локтӧ отсӧг —
Слӧн да лев да кӧр!»
Зверӧн тыр дзонь йӧр.

2

Другысь кыськӧ сэтысь
Гӧрд тӧрӧкан петіс —
Ӧшлӧпан кодь великан,
Сера юра тӧрӧкан.
Уссӧ лэптіс вылӧ,
Сувтіс кык кок йылӧ.
Лёкысь горзӧ, лёкысь равзӧ:
«Дорвыв ньылышта ме ставсӧ!
Черӧн-пуртӧн виа ме!
Ульӧн сёя тіянӧс!»
Садьтӧг звер чукӧрыд повзис:
«Вот тай олӧмным и овсис!»
Шняпкысис бок вылас кӧин,
Кокыс слӧнлӧн муӧ вӧйи,
Трак нетшыштіс ош
Кӧзалысь ёсь тош,
Весьӧпӧрӧм лев
Курччис ассьыс пев.

3

Сэки шуис сера кутш:
«Кывзӧй менсьым, ланьтлӧй сутш —
Коді виас тӧрӧканӧс,
Петны лысьтас сылы паныд,
Сета нёль
Коз пу коль,
Ещӧ содта кык
Бадь кор мык!»
Яра горӧдісны зверъяс:
«Огӧ полӧй... Синсӧ перъям!
Часлы... ӧти дукӧн... регыд
Сюрса лысӧ сылысь чегам!
Лэчыд пиньсӧ налям,
Асьсӧ няйтӧ талям!»
Зверъяс видзӧдлісны мышкӧ...
Сэсся уськӧдчисны тышкӧ.
Тӧрӧкан кор лэптіс усъяс
(Ой-ой кузьӧсь),
Пышйис звер чукӧрыд — усйис
Веж луд кузя:
Коді рӧдйӧн, коді скач
Ризйис вӧрлань кӧм ни гач.

4

Шуис сэки пӧрысь кит:
«Повзис ӧтикысь кызь вит!
Нолы, ёртъяс, петӧй косьӧ,
Кодлӧн пиньяс-гыжъяс ёсьӧсь!»
Гусянь-позсянь шуӧ зверыд:
«Миян кокным пельк и тэрыб...
Быдӧн косяд эськӧ петіс...
Сӧмын жаль тай вӧльнӧй светыс!»
Смелджык зверъяс —
Тигръяс, левъяс —
Дзебсьӧмаӧсь бадь куст пытшкӧ:
Кочӧг повзьӧмнысла бытшкӧ.
Ош пырӧма гӧбӧч гуӧ,
Йӧра чеччыштӧма юӧ.
Лэчыд гыжъя сан
Корсьӧ ва гуран.
Коді сайӧдчӧ вутш сайӧ,
Коді джуджыд пуӧ кайӧ.
Пиньныс сяргӧ, кокныс дзӧрӧ:
Тіралӧны — муыс вӧрӧ.
Чемодана Ӧблезяна
Чивксьӧдіс сьӧд вӧрӧ.
Кӧза дурны
Кутіс сюрнас —
Лёкысь мусӧ гӧрӧ.
А ёсь пиня сир
Аддзис джуджыд йир.

МӦД ЮКӦН

1

И вот миян великан,
Сера юра тӧрӧкан,
Лоис став звер вылын хан.
Тшапа тувччӧ сылӧн кокыс,
Лӧсталӧ зарниа бокыс.
Уссӧ чургӧдӧма вылӧ,
Лёкысь равзӧ зверъяс вылӧ:
«Ноко, пияннытӧ вайӧй!
Талун рытнас сёя найӧс!»
Аттӧ! Коньӧръяс да зверъяс!
Код нӧ писӧ позсьыс перъяс
Сетны сёйны мустӧм ханлы —
Паськыд горша тӧрӧканлы?!
Курыд синва киссьӧ шорӧн:
Быд звер ӧбжӧраӧс ёрӧ.
Ай-мам кутчысьлӧны пикӧд,
Накӧд прӧщайтчӧны дзикӧдз.

2

Кыськӧ локтіс кенгуру —
Пӧсялӧма, петӧ ру.
Аддзис уска зверӧс;
Петіс сылӧн серам:
«Тайӧ ӧмӧй великан?
(Ха-ха-ха!)
Тайӧ прӧстӧй тӧрӧкан!
(Ха-ха-ха!)
Зэв на ичӧт тайӧ хан:
Ускӧд босьтны... да сун-сан!
Синмад яндзим тіян абу!
Пиньныд-гыжныд ёсь вӧд, слабог!
Гаглысь кок пыдӧс эн нюлӧй,
Сетчӧмныдӧсь сы ки улӧ!»
Садьтӧг повзис бегемот:
«Мый тэ лоин?.. Дзебсьы, вод!
Тэнсьыд сёрнитӧ вӧд кылӧ,
Уськӧдчас на-й миян вылӧ!..»

3

Сэки кыськӧ йӧрысь,
Паськыд ыб выв шӧрысь
Ичӧт пышкай лэбзис жбыр,
Эз кут думайтны зэв дыр.
Кокыштіс друг тӧрӧканӧс —
И вот быри великаныд.
Уска зверлы сідзи-й колӧ!
Тадзи эштіс сылӧн олӧм.

4

Зверъяс оз ӧшйыны инас,
Радла шенасьӧны кинас.
Кайлы висьталӧны чолӧм
(Быри тӧрӧканысь полӧм!):
«Лыдтӧм аттьӧ тэныд тэчам,
Збой сьӧлӧма молодечӧй!»
Кайяс ӧтвылысь став зверкӧд
Каньлы стрӧитісны керка.
Талунсянь кань олӧ сэн:
Гӧсьт да гӧстя жмитӧ стен.

	Гудӧкасьӧ
	Шоныд пася
	Гӧна пеля ош.
	Потшӧс вылын
	Кӧза сьылӧ —
	Чургӧдӧма тош.
	Йӧктӧ йӧра,
	Йӧктӧ кӧр.
	Радлӧ нӧрыс
	И сьӧд вӧр.
	Каньпи нявзӧ,
	Кычи лявзӧ,
	Никсӧ-дзуртӧ порсь.
	Татшӧм ворсӧм,
	Чилзӧм-горзӧм
	Некытысь он корсь!
	Мойдӧ-сьылӧ
	Таркакылӧ
	Варов барабан.
	Абу-абу ӧні, слабог,
	Зывӧк тӧрӧкан!