ЮАЛІСНЫ МЕНСЬЫМ


Ыджыд тӧвкӧд кыдз пу ӧтнас вензис.
— Мый тэн муса? — юалісны менсьым.

Ӧтнас муртса думайтыштіс чӧла,
Вочавидзис морӧс пытшкын сьӧлӧм:

— Юаланныд, мый жӧ меным муса?
Сійӧ, кодӧс нинӧмтор оз кусыньт;

Сійӧ, коді синвасӧ оз кисьты,
Сы дінӧ кӧ лёклӧн выныс письтас,

А дзик ставсӧ мужествоӧн венӧ, —
Со мый медся муса лоӧ меным. —

Сизӧй бордъя гулю лэбис вылі.
Ассьыс гыжсӧ варыш лэдзис сылы.

— Мый меддона? — юалісны менсьым,
Кодыр гулю смертькӧд ӧтнас вензис.

Ме эг вермы овны тані чӧла, —
Ыджыд скӧрла пузис менам сьӧлӧм.

— Дугды, — шуи, — больгыны, тӧварыш!
Аддзан, тувкӧ гулюӧс лёк варыш?

Тэ моз кӧ ми ставным мӧдам мирас
Сӧрны татшӧм кадас, — ойдам вирӧн.

Меным дона мир да ыджыд дружба,
Отсӧг, коді шог кадӧ оз нюжмась!

1954 во.