МИСТЕРЛӦН ЧУЖӦМЫС ВЕЖСИС
— Сідзкӧ, ті коми? — Английскӧй акцентӧн Юалӧ менсьым Сэр. А ӧчкиа синъясыс, Быттьӧ дон ӧгыр, И ӧдва ме кута Нерв. — Да, сэр, Ме — коми. А мый? Абу лӧсьыд? Ог кажитчӧй тіянлы ми? — Мый ті! Комиӧс Радейтӧ Томми, Коми — Зэв бур народ! Дерт, пур вылӧ Асьным Некор эг сӧвлӧй, Но тіянӧс Аддзывлім век: Архангельскын ми Эг ӧтчыдысь вӧвлӧй: Бать И личнӧ ме... Ті лэдзанныд кер? И, дерт. Зэв сьӧкыд! Орудие — Ӧти чер? — Да, эм и чер: Тайгаын сытӧг Пока Ог бергӧдчӧй ми. — И дзузганӧн оланныд Тӧвся рытын? — Мистер, Ті вошӧмныд дзик! Ме тіянын, Лондонын, Некор эг вӧвлыв, Но ті йылысь правда Ог дзуг. Шляпаӧн, дерт, Ми Ог ветлӧй вӧрын, Но Электричество — Кӧть ас Лондонад ну. — Но тіянлы уджавны, Век жӧ, Зэв сьӧкыд: Тіян сэн Норма да план... — А тіянын Уджтӧм Быд дасӧд рабочӧй, И оз тӧд, кыдз Перйыны нянь? — Но миян — Свобода... — Мед сісьмыны Ловйӧн, Кыдз сісьмӧ Рабочӧй Ист-Энд? — Ист-Энд? Сэн жӧ докъяс... — И тшыглунлӧн биржа, Кӧн кулӧ Британскӧй смерд? А миян Тшыг биржаяс Абуӧсь тані, И вӧрысь Он аддзы лыс чом. Выль, мича коттеджъясын Олам ми ставным, И сьӧлӧмным Шогла оз ём.* — М-да... Но тіянӧс русскӧйяс Оз пуктыны пыдди. И тайӧс Он дзебӧй ті. — Ті тайӧс Английскӧй Ас «Таймссьыд» лыддид? И, дерт, Ог шензьӧй ми. Сылӧн позиция Миянлы Яснӧй И яснӧй Сылӧн тон. Ӧд клеветаысь сэн «Высшӧй» классӧн Зарниӧн мынтыссьӧ дон. Но миянлы веськодь Сӧрӧмныс налӧн, — Оз пемды Шудлӧн дзирд. Сӧветскӧй странаын Став йӧзыс равнӧй, Народӧс Народ оз жмит. Ми, Русскӧй и коми, Единӧй семьяын Олам, Ог нуӧдӧй спор И дружитам сідзи, Кыдз ӧти бассейнын Став визувтысь Ю и шор. Бӧръям правительство — Любӧй рабочӧй, Код честнӧя нуӧдӧ удж, Парламентӧ мунны Веськыда вермӧ, — Некутшӧм ценз оз кут. И уджалысь йӧзлӧн Верховнӧй палата, Кӧн русскӧй, Коми, грузин — Став нация миян, Вопросъяс решайтӧ Оз сідз, Кыдзи Лондонын ті. Ми Лӧз океан сайӧ Некор ог дзоргӧй, Ог виччысьӧй сэсянь Кивок, Решайтам вопросъяс Збыльысь свободнӧя, — Свобода — Ми вынлӧн оплот. Отчизнаын ыджыдӧсь Ставным ми Асьным, — Ас кырымын Веськӧдлан руль. И, кыдзикӧн тіянын, Миянлысь властьсӧ Оз видз Заморскӧй патруль! Ӧчкиа мистерлӧн Чужӧмыс Вежсис: Зілис... Но тӧлк эз босьт. Ми сьӧлӧмӧ Кӧинлы Туй Оз воссьы. Кӧть синмыс И вывті ёсь! 1954 во.
Гижӧд
Мистерлӧн чужӧмыс вежсис

lkejrlkelkrgner klrjnelknfrkl ekjnrjkenfrej

1