СТАНЦИЯ КНЯЖ-ПОГОСТ


Меным тӧдсаӧсь емваса берегъяс,
Видзьяс бритліс сэсь менам гӧрбуш.
Колӧ? Зібъясӧн ветлыны велӧда
Сэті, валӧн кӧн изъяскӧд тыш.

Ме эг ӧтчыдысь катлыв веж косьясті,
Сэтысь тӧдса мен куйлысь быд из;
Ме став вӧр и ва подӧн тась мерайті
И эг ӧтчыдысь прӧйдитлы Виз *.

Сӧмын талун, кор вои ме татчӧ
Уна во мысти, довкниті юр:
Электричество югӧрӧн сявкйӧ
Выль посёлок, кӧн вӧвлывліс нюр.

И кыдз важӧн, ог чеччы ме рӧзвальысь —
Комфортабельнӧй вайис вагон.
Емва вомӧн кӧрт пос вывті грымӧді,
Поезд нуӧдіс емваса зон.

— Чеччы, друганӧй, чеччы вай тэрыба, —
Мелі кисӧ мен нюжӧдӧ ёрт. —
Ӧні вӧвъясным миян тэрыбӧсь
Воис станция Княж-Погост.

Гашкӧ, помнитан, коркӧ кыдз таръяс
Татысь лыйлывлім, сиавлім чӧс?
Ставыс кольӧма. Ӧні тан каръяс...
Абу дивӧ, — ми — вынйӧра йӧз!

Выль посёлокті муна, и сьӧлӧм
Менам морӧсын места оз тӧд:
Менсьым радлун не кыскыны вӧлӧн, —
Чужан крайӧс ме ассьым эг тӧд.

1945 во.


* Виз — тадзи шуӧны комиӧн Княж-Погост сикт.