КОМИ БАЛСо кӧн балыс вӧлӧм! Тані абу ӧлӧм Нинӧкодлы лоны — Мыйла нӧ не воны! Татӧн быдся пырысь Пыдди пуктӧм, гырысь… Гашкӧ, кодкӧ повзяс Шунысӧ, мый ковзяс!.. Кӧсъяс, кага бӧрддзас, Мам кӧть кулак гӧрддзас! Паччӧр-пӧлать вылын, Труба сайын ылын Быдсӧ гӧсьтъяс миян! Джаджъяс вывсянь пиян Ӧшӧдӧмны кокъяс! Джоджным векньыд, вокъяс, Сьылысь-йӧктысьяслы. Кӧтшасын тай — часлы — Мед на гажа вӧлӧм. Томмӧм пӧрысь сьӧлӧм. Юис — мый кӧть вӧчӧ — Куим румка пӧчӧ. Колян вынсӧ ӧктӧ, Аддзиг йӧктӧм, йӧктӧ Кокнас гусьӧникӧн Рама пукалігӧн… Эдз сэн шогасясны! Кодыр нюжӧдчасны Том йӧз сера гезйӧн, Кодыр черань везйӧн Найӧ гартчыласны, Кодыр разӧдчасны Торйӧн, кодыр кинас Морта-мортсӧ дінас Матӧ кыскавласныс… А ӧд некор асьныс Оз и торксьывлыныс! Синкуньӧм кост шыныс Овсьыліс… Мый лоис? Нем! Зон гӧгӧрвоис, Нывлысь чужӧм тупкис Юрсинас — и чупкис… Сійӧн, тӧдан, пӧтсис — Да и бара ӧддзис!.. Чӧскӧдісны вомсӧ, Бара виччысь помсӧ! Йӧктӧм, шутёв, сьылӧм!.. Сёрни, гашкӧ, кылам! Кысь бара! А пӧчӧ: — Ті кӧть мый сэн вӧчӧ, Вина этша шондіс, — Сьывны-й ачыс пондіс! Сӧмын нора горӧн Артмис тай — и шорӧн Визыв синва сылӧн Мунӧ пидзӧс вылын… Шмыньялӧ пӧль, шуӧ: «Мыля нӧ он нуӧ Йӧктыны тшӧтш мортсӧ? Ичмонь колис ортсӧ, Кыдз оз эльтчы, пиӧ? Со ӧд кутшӧм сійӧ!» А пӧч олӧ-вылӧ, Водзӧ бӧрдіг сьылӧ!.. 1865.
