МАТЫССА КОЛЯН ЛУН ДА МАТЫССА ВОАН ЛУНКолӧ шуны веськыда. Да! Мывкыдтӧма вина юлі, Пеж пар б…лысь вывті нюлі; Виччысьтӧг ме томлунлысь Домсӧ лэдзлі киясысь. Пыркӧдіс жӧ менсьым дурӧс! Гылӧді жӧ мыйкӧ бурӧс! Колӧ шуны веськыда. Да! Кытчӧсюрӧ новлі эбӧс… Со и томлун регыд лэбас Томлунавны мукӧдкӧд. Сыкӧд овны кужас мӧд, Видзас сійӧс этшаникӧн, Матыника ылавлігӧн… Колӧ шуны веськыда. Да! Чайтас ен: морт меысь петас И мем бур талант тай сетас — Бара абу веськалӧм! Весьшӧрӧ ен виччысьлӧм — Быдса войтырысь оз петны, Кодлы мывкыд уджсӧ сетны! Колӧ шуны веськыда. Да! Мый ме эльтча? Эг на быр ме; Садьсявны вын зэв на тырмӧ! Сӧмын, енмӧй, енмӧй, нэм Гырысь удж эн сет тэ мем! Ичӧт буръяс миян лунӧ Колӧджык тай вӧчны уна! Колӧ шуны веськыда. Да! Ог зэв тэрмась, мед не мудзны. Судзӧда, мый позьӧ судзны. Велӧдны тай посньыдджык Коми йӧзӧс ньӧжйӧник Лыддьыны да гижны рама Аслым сеті ме программа. 1864.
