* * *

Йӧз дінын ме олі,
Да кыдз тыртӧминын,
Ачымӧс ме аддзи
Ӧткаӧн йӧз дінын.

Синъяс водзын войтыр
Лоис ветлысь шойяс…
Ловъя мортӧс корсиг
Эг узь ме кузь войяс!

Дыр ме корси зіля:
Воисны сэк паныд
Синъяслы тэ синъяс,
Долыд еджыд баныд.

Шоналіс пыр сьӧлӧм
Синъяс югӧръяссьыд —
И ме шуи аслым:
«Шудтӧ аддзин ассьыд!»

Кыдз мем муса, мича
Тыдовтчин сэк, чойӧ!
Мый оз сетны медводз,
Быдтор тшыг гӧсьт сёйӧ!

Ошкыны ме кузя
Ог нин ошкы тэнӧ;
Бур тэ, абу мисьтӧм,
Рам да-й ставыд сэні!

Мукӧд дыръя мывкыд
Тэнад дзугыльмӧдӧ;
Мукӧд дыръя сёрни
Тэнад унмовссьӧдӧ!

Кӧні сійӧ, кодӧс
Аддзыны ме кӧсйи?
Кӧні лолӧс лэптысь,
Кодӧс аслым вӧзйи?

Кӧні, кӧні, кӧні?—
Да тэ эн зэв повзьы!..
Тэысь кындзи, сисьйӧг,
Некод мем оз ковзьы!

Му тай абу енвевт;
Абу ангелъяс сэн;
Ен кӧ сиас, тэкӧд
Лоам шудаясӧн!

Вежӧраӧсь, муса
Морта-мортлы лоам;
Ен кӧ сиас, тадзи
Ангелъясӧдз воам!

1860