ЫТШКАНДЫР


Локтіс гожӧм, шоныд гожӧм.
Войяс дженьыд, лунъяс кузь.
Пемыд некор оз и овлы,
Пемыд му вылӧ оз усь.

Лунъяс мунӧ, лунъяс кольӧ..
Вот и страдна — ытшкандыр.
Кодлы мича турун колӧ,
Ытшкӧ, куртӧ пырысь-пыр.

Шонді петӧ, шонді лэччӧ.
Видзьяс вылын гыӧ йӧз.
Быдсӧн турун аслыс вӧчӧ,
Тшыг оз кувны вӧв ни мӧс.

Коса ытшкӧ, куран куртӧ...
Кымын зорӧд? Куим, нёль...
Коми йӧзлӧн сьӧлӧм бурмӧ,
Некод кӧрымтӧг оз коль!

Эштіс турун, вундан воис.
Оз позь шуны уджлы: шань!
Вӧла-мӧска кӧрым лоис,
Ковмас войтырлы и нянь.

Лоас тӧв кежлӧ быдсӧнлӧн
Озырлун да шоныд горт.
Тільсьы, уджав кыдзи верман,
Кыдзи кужан, коми морт!