ЙӦЛА


Рытлань ланьтіс пемыд вӧр:
Лунся уджсӧ оз нин кер.
Гашкӧ узьӧ, гашкӧ оз.
Шойччӧ пожӧм, шойччӧ коз.

Вӧрӧ локтіс кыйсьысь морт,
Быттьӧ вайис сійӧс борд.
Эз ий ветлы сэні дыр:
Аддзис кӧчӧс пырысь-пыр.

Кӧть и кӧчыс вӧлі сюсь,
Мортлӧн пищальыс эз узь.
Порок-пуля эз на сім, —
Мортыс кӧчӧс лыйис: гым!

Садьмис, ловзис пемыд вӧр,
Аслас ку пытшкӧ оз тӧр.
Лыйӧм бӧрын чӧв оз ов:
Гымакылӧ — кув да ков!

Увгӧ тані, шургӧ сэн,
Он и вермы тӧдны кӧн!
Ылын, матын — гув да гув!
Кытчӧдз лыйӧм шы оз кыв?!

1921 во.