ОКАВ МЕНӦ, БУР АНЬОкав менӧ, бур ань, Мича ныв, муса ныв Окав менӧ, эн бӧрд, Важ моз йӧкты да сьыв! Мыйла тэ, сьӧлӧмшӧр, Синва кисьтан лунтыр? Мыйла ветлӧдлан тэ Пемыд паськӧма пыр? Синва кисьтӧм, бур ань, Долыд олӧм оз сет... Пемыд паськӧмтӧ веж, Менӧ колльӧдны пет. Ылі муясӧ ме Муна перйыны шуд... Донаторйӧй, эн бӧрд, Бурлак мортӧс эн кут! Эн тэ шу, сьӧлӧмшӧр, Нора кывъяссӧ мем. Эн тэ висьтав сё пӧв, Кутшӧм шог тэнад эм. Тэнад шог, курыд шог Абу мем колантор. Муса нывъяслысь ме Синва кисьтӧм ог кор! Пемыд паськӧмтӧ веж, Кывзы менӧ, бур ань... Со тан вӧччӧмнад тэ Кутшӧм мича да шань: Чышъян юр вылын шӧвк, Ворсӧ, сералӧ син, Воши, разалі шог, Кыдзи разалӧ тшын... Кӧть и торйӧдчам ми, Ог ме дыр кежлӧ мун. Миян шудлы, эн пов, Абу медбӧръя лун... Окав менӧ, бур ань, Мича ныв, муса ныв, Окав менӧ, эн бӧрд, Важ моз йӧкты да сьыв! 1927 во.
