МИ ДОРЪЯМ ЧУЖАН МУ 
И БЫДМЫСЬ ВОЙТЫРӦС


Посни челядьӧн тырӧма йӧр,
Гора гӧлӧсӧн ойдӧма рытыс.
Чайтам, ставыс и татчӧ оз тӧр.
Кыдз нӧ на дорын эськӧ он рытйысь?
Бать-мам томӧсь на, мичаӧсь зэв.
Ӧшинь улын ми пукалам орччӧн.
А кор койыштлас вильшасьысь зэр,
Ставӧн гузьӧбтам-пырамӧ гортӧ.

«Тра-та-та!» и «Ура!» частӧ кылӧ,
Со «Победа!» нин — гӧлӧсыс ён.
Кокни лолӧ и дой сьӧлӧм вылын,—
Кысь на вежӧртны налы став дон,
Мый Победаыс сьӧкыда шедіс
Да «ураӧн» эз пыр жӧ дзик лок.
Да и ачым на мый сэки тӧді,
Тӧді сӧмын, войнаыс мый лёк.
Тадзи велӧдліс сэк менӧ мамӧ,
Кывтыд Катыдкӧд йӧршасьлім кор...
Оз кӧть здукӧн лок вежӧрыд-сямыд,
Код войнасӧ сэк сиктын эз ёр?!

Муса войтыр — мича челядь,
Веж видзвывса дзоридзьяс.
Тупкыла кӧть шумсьыс пельӧс,
Корсюрӧ и горӧдла.
Мед жӧ тіян юръяс весьтын
Зэрысь сӧмын енэж руд.
Меным ньӧти абу веськодь
Тіян гажлун, тіян шуд.
Талун, челядь, праздник тіян,
Тіянӧс жӧ доръян лун.

Медым, дона бур ныв-пиян,
Вӧлі тіян чӧскыд ун.
Ми доръям чужан му
И быдмысь войтырӧс.
Ог вузалӧй,
Ог олӧй ойбырӧн.
Ог грӧзитӧй, ог ыршасьӧй.
Но вомалам.
И эскам ми:
Войнасӧ
Домалам.
Гожся лун, унджык шоныдтӧ сет.
Мед жӧ ворсӧны челядьыс йӧрын.
Кымӧр костысь вай, шондіӧй, пет,
Сэсся-й дзебсьы на водалӧм бӧрын.