* * *

Таво тӧлыс дыр кӧдзыдӧн дурӧ.
И зверь-пӧткалы, лэбачлы, дерт,
Уна сьӧкыдыс Войвылын сюрӧ;
Кӧдзыд тӧлыд оз шонты ни верд.

Регыд шондіа югӧра мартыс
Ӧшинь стеклӧысь нюлыштас ку.
А февраль медым турӧбъяс гартӧ
И лым шебрасӧн шонӧдӧ му.

Ӧд сы улын и ӧзим, и дзоридз,
Ольяс, керӧсъяс, туруна видз.
Ставнас тундраыс Вой саридз дорӧдз,
Миян парманым — гажлун и мич.

Коми му, муса му, воас тулыс,
Тӧвйысь лэбачьяс збоймасны бӧр.
Найӧ сьыласны гимн чужан мулы,
Нюмдас кар, грезд и сикт, парма-вӧр.