КОМИ МУӦЙ, СЬӦЛӦМШӦРӦЙ!



1
Лӧз югыд на сӧмын тӧдчӧ,
Войыс пышйӧ, асыв вӧтчӧ.
Вӧрыс шемӧс, шы ни тӧв,
Пеляд чунгӧ сэтшӧм чӧв.

Мырйыс еджыд, чайтсьӧ кӧчӧн,
Енэж шӧрас тӧлысь-сӧчӧн
Оз нин югдӧд войся моз,
Лымйӧд тювгӧ лямпа гоз.

Чӧрс кодь веськыд козъяс костӧд,
Юрси йылӧдз тырӧм роскӧд,
Вуджӧ яг и вуджӧ нюр.
Видзчысь, руч и сьӧла-ур!

Парма-вӧрад коми мортыд
Ачыс ыджыд, быттьӧ гортас.
Медбур ёртыс сылӧн пон,
Кодлы вӧрад абу дон.

Кыкӧн вӧралӧны найӧ,
Понйыд оз пыр кыдзи пайӧ.
Быттьӧ ӧти налӧн лов,
Ӧта-мӧдтӧгыс оз ов.

2

Эз мӧй артмы бертӧм мырсянь
Коми мортлӧн уджыс «мырсьӧм»?
Сьӧд вӧр шӧрын вӧчны му
Абу кокни, мый кӧть шу.

Муӧдзыс кор сійӧ воас,
Уна пӧсь на кисьтны лоас.
Ид тусь лэдзас сэтчӧ вуж.
Оз кӧ кынты сійӧс пуж.

3

Вӧртас сайысь шонді петӧ,
Первой югӧръяссӧ сетӧ.
Лэбачьяс нин «Чеч-чы, чеч-чы!»
Ытшкысь, косатӧ пӧ лэчты.

Майӧг йылын катша китшкӧ,
Лысва усьтӧдзыс пӧ ытшкы.
Гулю дольӧ: «Курр-ан, курр-ан!
Юрӧдз воӧд ытшкӧм турун».

А кор воас зорӧд выйӧдз,
Сьылӧ лэбач: «Выйыд выйим!
Зіль-зіль-зіль — эн сетчы дышлы
Тӧвнас шойччӧг сетан мышлы».
Гожӧмын нӧ кутшӧм узьӧм,
Войыс тӧвнас лоӧ кузьӧн.

4

Вотчан кадӧ гажа вӧрын,
Чӧд да чӧдлач вотӧм бӧрын
Парма ягын кисьмӧ пув,
Нюрын сёрджык турипув.

Зіль аньяслӧн мырпом дась нин,
Челядь вотчӧны нин асьныс.
Абу вунӧдӧма нем:
Косьтӧм тшак и сола эм.

Коркӧ мӧй нӧ уджыд бырлӧ,
Арнас сійӧн мортыд тырлӧ:
Идрав град выв пуктас, нянь,
Воӧма кӧ-й, сійӧ шань.

Шабдіысь ас вӧчӧм дӧра
Косьмӧ шонді водзын йӧрын,
Гынкӧмтӧ и ыж ку пась
Вурны колӧ, абу дась.

Уджтӧг татчӧ он на-й вужъясь,
Он и тӧдлы, муыс пужъя.
Тӧвлӧн гыркыс, майбыр, кузь,
Он ӧд ош моз гуын узь.

5

Тадзи вежласьӧны вояс,
Коді шаньджык, коді доя.
Шондіыслы веськодь дзик,
Кыдзи олӧ парма сикт.

Но сэк кывсьӧ ылі мусянь,
Весиг тані эз ло гуся,
Шызьӧма пӧ Питер кар.
Абу нин пӧ сэні «сар».

Кыдз нӧ «сартӧгыс» пӧ олан,
Нэмсӧ вӧлі-й, ӧні колӧ.
Ыджыдыс пӧ Ленин ёрт,
Гашкӧ, Пера кодь жӧ морт?..

Сэсся еджыдъяс и Домна —
Коми ныв и сэтшӧм том на —
Сетӧма пӧ ассьыс лов.
Збыль мӧй нинӧмысь эз пов?

Выль олӧмлӧн ӧддзӧм гыыс
Эз нин ло куш сёрни шыӧн.
Сиктын кыптіс ыджыд вен:
Революция и ен.

Коді гӧль и коді озыр,
Вӧчсис уна, колӧ оз и.
Збыльысь тай — му вежандыр,
Оз-ӧ шондіыс нин быр?

Шонді ветлӧ аслас туйӧд,
Коркӧ кымӧр костӧд уйӧ.
Коркӧ шонтӧ, коркӧ оз.
Сиктын котыртсьӧ колхоз.

«Код оз кӧсйы, мырдӧн сюйӧй,
Коммунизмӧ миян туйыс
Восьса, кытчӧ колӧ, мӧд...
Кӧсъян кӧ и, унджык тӧд».

Челядь шыӧн гыӧ школа,
Ыджыд кӧсйӧмъясӧн олӧ
Вӧрысь петавлытӧм морт.
Енмыс сылӧн — Ленин ёрт.

Оз нин сӧмын лӧсас-пасӧн
Коми мортыд кырымпасась.
Быдӧн сьӧлӧмнас поэт.
Эз ӧд этша и сэк пет.

Парма шӧрын коми сьылысь —
Медся ёся выльсӧ кылысь.
Вежсис олӧмыслӧн лад,
Тайӧ пуксис дзик выль кад...

Курыд шогыс сюрліс уна,
Таляссис и Коми муным.
Ӧтдортлісны чужан кыв,
Ставыс мунліс сьӧлӧм выв.

6

Кызьӧд нэм пом кадыс каттьӧ.
Бара тулыс вурӧ платтьӧ.
Быттьӧ сарапана ныв
Кыдз пу лоас бӧръявыв.

Льӧм пу дзоридзьясӧн вӧччас,
Тулыс бӧрся гожӧм вӧтчас.
Воас ар и воас тӧв
Нӧшта уна-уна пӧв.

И бур олӧмыс оз помась,
Мӧд йӧз лоасны нин томӧсь.
Ов жӧ, Войвыв парма-вӧр,
Коми муӧй, сьӧлӧмшӧр!