МАШУК

«Кокӧ, кокӧй, котӧрт
Чӧдъя-пувъя ягӧ,
Мырпома нюрӧ...»
Коми народнӧй фольклорысь

Ичӧт кинас кутчысьӧма
Лабич дорӧ.
Новлӧдлыштны джодж кузяла
Менӧ корӧ.
Пиньтӧм вомыс шешмунӧма,
Оз куж шуны.
Дзоля кокиньясыс сылӧн
Оз на нуны.
Кӧсйӧмыс да окотаыс
Сідз и петӧ!
Котравны пӧ чужи, войтыр,
Вӧльнӧй светӧ.
Вӧрӧд-ягӧд ветлӧдлыны
Видзьяс вывті.
Сӧстӧм югыд ваа юӧд.
Пыжӧн кывтны.
Лэбачьяслысь гажа дзользьӧм
Медым кывны.
Мыла коми сьыланкывъяс
Ті моз сьывны.
Аслам челядь вӧсна тӧждысьны
Да повны.
Тайӧ бур му вылас медым
Зэв дыр овны.