* * *

Ме тӧда: кадсӧ мем не венны,
Но таысь шогсьыны ог мӧд.
Мед олас паськалысь Вселеннӧй
И сэні паськалысь морт рӧд!

Ракета пытшкын лэбысь шензьӧ:
Сэн — кодзув, тан — комета бӧж.
И кольӧ лӧгалӧм да вензьӧм,
И вошӧ тӧрытъяас лӧж.

Мый юкны? — ставыс помтӧм-дортӧм,
И нинӧм асладӧн он шу.
Но лоӧ коланаджык ёртыд
И донаджыкӧн — ӧтув шуд.

Ас дінас кыскӧ ылі кодзув
И туйсьыс ылавны оз позь...
Ме тӧда: восьлалан кӧ водзӧ,
Мый личкӧ — сьӧрсьыд он и босьт.