* * *

Кодзувъяс, Галактика,
Видзӧдлан да акнитан.
Сьӧкыд гӧгӧрвоны мортлы,
Мый сэтшӧмыс:
Помтӧм-дортӧм…

Лэб кӧть лыдтӧм-тшӧттӧм во,
Некор туйлы пом оз во.

Но ме тӧда:
Туйыс корӧ...
Кылас гымыштӧм шы гора,
Биыс швачкас муӧ —
Гӧрд,
Сэки ӧвтыштасны киӧн
И оз босьтны му выв пиян
Ариадналысь * кузь шӧрт.





Ариадна — греческӧй мифология серти Критса царь Минослӧн ныв. Отсаліс Афиныса герой Тесейлы петны лабиринтысь шӧрт тупыль отсӧгӧн. Ариадналӧн шӧрт — ӧнія сёрни серти — отсалӧ аддзыны бӧр воан туй