МЕНАМ ГАЖЭк! Кор вӧр туйті мӧдӧдча сэтчӧ, Кор син водзын лэбзьӧ вӧр, Кор пельясын шувгӧ тӧв, — Сэк збойлуныс, радыс и гажыс Мем сьӧлӧмӧ некыдз оз тӧр. Сэк мунігмоз пожӧма вӧрлы Ме сьӧлӧмӧн петкӧдла гаж. Ме сьывлывла вӧрыслы выльсӧ... И мукӧддыр — казьтыштла важ. Тэ шувган век, пожӧма вӧрӧй, Да менӧ ӧд он жӧ нин вен! Дзор пожӧм, тэ гымалан пӧра, Вай висьтав жӧ, вунӧдін эн? Эк! Аль сьывны ме сӧмын и кужа, Винтовка аль киын эз вӧв? Аль ёна нин... сэтчӧдз нин важӧн Винтовкаӧс вежӧма чер. Тэ тадзи жӧ шувгылін сэки, Ёсь тугана, лымтыра яг, Кор том партизанскӧй отрядӧс Быд пу сайсянь кыйӧдіс враг. Да, вермим! Кор уськӧдчим скӧрысь, Ми аддзылім еджыдлысь бӧж. И тэ — вашкысь пожӧма вӧрыс — Сэк отсалін миянлы тшӧтш. Эк! Аль сьывны, да врагъясӧс шырны Куш миянлӧн ошйысян удж? Но врагъяскӧд косьтӧг, тшӧтш сьывтӧг Выль мортыс оз некыдзи чуж. Мед кӧдзыд, мед лымъялӧ, тӧла, Тэ кыпӧдлы, Воронӧй, ӧд. Аль ӧтласа медгырысь могсӧ Тэ миянлысь, Ворон, он тӧд? Кор лӧвтӧмӧн пӧрӧны пуяс, Кор шыясӧн тырӧма вӧр, — Сэк черпуыс киясын йӧктӧ, Сэк сьӧлӧмӧ збойлун оз тӧр. Эк! Вай ӧдӧпты, ӧдӧпты, Ворон! Со матын нин тӧдчӧ барак. Ме кыла, кыдз миянӧс корӧ, Кыдз упъялӧ, лолалӧ яг... Ӧд кыпалӧ, тувччалӧ олӧм, Кор чер улын горалӧ вӧр! Ме висьтала — збойлуныс, гажыс Мем сьӧлӧмӧ некыдз оз тӧр. 1931 во.
