NO PASARAN!
Ог тӧд ме тіян кыв, Испанияса вокъяс, Эг аддзыв тіян дона мулысь чужӧмбан. Но тайӧ куим кыв Кыдз гым ме дінӧдз локтіс: — No pasaran! No pasaran! Быд асыв радио Мем сетӧ вына юӧр... Век водзӧ мунӧ вежонъяслӧн лыд... И кыдзи кызь во сайын Миян краснӧй Питер — Дзик сідз жӧ сувтіс героическӧй Мадрид. No pasaran! No pasaran! Ми ӧні тӧдам дон Ас, вӧльнӧй, чужан мулысь, Ми гӧгӧрвоам — мыйла тайӧ тыш. Ми тӧдам, мыйла Ярмӧм враглӧн пуля, И штык, и бомба тіян водзын ныж. No pasaran! No pasaran! Мед потӧны снарядъяс Ыджыд, шуштӧм шумӧн, Мед вевттьӧ шонді-муӧс порок тшын. Ті кӧсъяд тэчны шуд Ас, дона, гажа муын И тайӧ кӧсйӧм — медся ыджыд вын. No pasaran! No pasaran! Ми важӧн тӧдам збыль, Мый шудыс шедӧ тышкын. Куш киӧн сійӧс, гутӧс моз, он кут, Ми кызь во сайын Врагӧс дзикӧдз чышким И вӧлись аддзим олӧмыслысь шуд. No pasaran! No pasaran! И ӧні сэн, Кӧн лымъя Пиринейяс, — Дзик сідз жӧ паськалӧ выль олӧм вӧсна тыш. И сэки, — эскам ми, Ас вирын регыд вӧяс Став мирӧс ловнас пежалысь фашизм. No pasaran! No pasaran! — Испания! Ми ыстам тэныд чолӧм! Тэ верман! Враг тэнӧ оз вен! Ми тіянкӧд, Испанияса вокъяс! И миян тікӧд гӧрддзасис став нэм. No pasaran! No pasaran! Мадрид оз усь, Испания оз сетчы! И регыд вӧльнӧй муын краснӧй флаг Кыдз шонді дзирдыштас И гажӧдас став нэмсӧ. Оз инась сэтчӧ враг! No pasaran! No pasaran! 1937 во.
Гижӧд
No pasaran
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1