* * *

Уска шобді кӧн му вылын легӧ,
Кӧні лолаліс луннас комбайн,
Сэні медводз ме аддзыси тэкӧд,
Кор тэ гымалін-идралін нянь.

Сӧстӧм енэжсянь дзирдаліс шонді,
Сотчӧм чужӧмӧ ыркйӧдліс тӧв.
Тэнад вомдорын серамтор ворсіс,
Синмын — шуд кындзи нинӧм эз вӧв.

Ме ог тӧд, мый тэ мӧвпалін сэки,
Мыйла вомдорын ворсӧдчис нюм.
Гашкӧ, казьтін, кыдз во сайын ветлін,
Кывзін полігсор тракторлысь шум.

Гашкӧ, аддзин, мый чукӧръяс сайысь
Ёна тэ вылӧ видзӧдӧ зон,
Мый тэд сӧмын на дас ӧкмыс арӧс,
Да мый шудлы оз тыдовтчы пом.