ЧУЖАН МУ
Быдӧнлӧн Эм аслас Чужан места. Кӧн кӧть олан — Сійӧ ӧти дзик. Юалад кӧ, Вочавидза Весьтас: Чужанінӧй менам — Гарья сикт, Кӧні Сыктыв, Быттьӧ Зарни чунькытш, Вӧчӧ кытшов — Дзирдалан да крут, Кӧні тӧвру Видзьяс весьтӧд Шуньгӧ, Кытчӧдз сійӧс Джуджыд яг Оз кут, Кӧні ставыс Ичӧтысянь Тӧдса, Кӧні войтыр — Уджач зэв Да рам. Любӧй ӧдзӧс меным Абу пӧдса Сиктын, Кӧні олӧны Бать-мам. Быдӧнлӧн Эм аслас Чужан места... Тӧдтӧминын. Казьтыла Быд лун. Гажтӧмчӧмӧй серти Выль ёрт Эскас: Чужанінӧй менам — Коми му, Кӧні помтӧм-дортӧм Шувгӧ парма, Вӧр-ва узьӧ, Кытчӧдз лым Оз сыв, Дженьыд гожӧм Тэрмӧдлӧ, А арнас Гажа рӧмӧн Ӧзйӧ Ывла выв. Кӧні Эжва Чужтӧ сьыланкывъяс. Гажӧдас кӧн Висер вожса Мойд, Ёнӧсь коми зонъяс сэн, А нывъяс... На пиысь Дзик быдӧн Быттьӧ чой. Быдӧнлӧн Эм аслас Чужан места... Йӧз муын Ме вочавидза, дерт: Ті орданыд Сьӧлӧмӧйлы дзескыд — Чужан муӧй менам СССР. Сӧмын сылы Мамӧлы моз эска, Сӧмын сійӧ Сетіс меным Борд. Чужан муӧй серти Ме — сӧветскӧй. И странаын Быдӧн Менам ёрт. Некод водзын Сійӧс Ме ог янӧд, Сы вӧсна, Мый кытчӧ кӧть Эг мун, Балтикасянь Тихӧй океанӧдз — Тайӧ ставыс Менам чужан му.

lkejrlkelkrgner klrjnelknfrkl ekjnrjkenfrej

1