КОРКӦ АГСАСЬЛІМ ТАНІ
Вӧлӧй тільгуна, тӧв ныр моз лэбӧ, Лэбач бордъяс моз павъялӧ бурысь. Тӧлыс тшын-буссӧ сынӧдас лэптӧ, Дзугӧ-сыналӧ менсьым сьӧд юрси. Катыд керӧсӧ, кӧдза му йӧрӧ, Тӧвзям агсасьны зонпосни скачӧн. Пуӧм капуль да тучман-мӧд сьӧрын, Кыдъя тучманыс паркйыштӧ качӧн. Эз вӧв кокни сэк сиктсалы овны, Эгӧ тӧдлӧй ми преник ни кампет. Эз вӧв майтӧг ни, истӧг ни, сов ни, Бур на: ӧзйис кӧ карасин лампа. Война кад. Войнабӧрса сьӧд вояс... Ӧнӧдз син водзын нюмбантӧм войтыр. Аддза усьӧм салдатъяслысь овъяс Обелиск вылысь... Муӧдзыс копыр! Катыд керӧсӧ, кӧдза му йӧрӧ Выльысь мӧдӧдчи ветымын во мысьт. Табак тшыныс тай кытчӧкӧ тӧрӧ — Шпутка-куритча, ог чӧвтлы вомысь. Вои сэтчӧ, кӧн агсасьлім коркӧ, Кӧні лолавліс небзьӧдӧм муыс. Ӧнӧдз кыла ме вӧвъяслысь корскӧм, Аддза мусянь кыдз кыпавліс руыс. ...Талун му вылас петшӧр да ыжман, Шырпи тэрыба шыранькытш килльӧ. Менам юр весьтын тільӧдчӧ пышкай, Быттьӧ агсасян вӧлӧйлӧн тільгун.
Гижысь: 
Гижӧд
Коркӧ агсасьлім тані
Жанр: 

lkejrlkelkrgner klrjnelknfrkl ekjnrjkenfrej

1