КАД ВИЗУЛАС
(Ву вывса олӧмысь)
Уна сьӧлӧм пыр визувтӧ Ву, шогсӧ сэсь кылӧдӧ... Вермас и мӧдарӧ — мыня-изсӧ тэчас мыйта оз ков. Быдӧнлӧн тайӧ олӧмас аслас сям, и юыслӧн тшӧтш. Ыджыд мамлӧн чойыс Априк Палэй вӧлі молитчысь баб, старӧверка. Орччӧн сувта сыкӧд ичӧт ныв да тшӧтш юрбита. Ӧбразъяс — джадж пасьталаыс... Кымын ен... Налы копрасьӧ. А ӧшиньын — выльӧн на мыччысьӧм тӧвся гӧрд шонді... Ме и сылы копыртчыла... Выльвидз, Паспом, Кудін, Катша, Митьӧв, Канач, Тыйыв... Ву пӧлӧн мыйта деревня вӧлі (эг на ставсӧ и казьтышт), да нӧбӧдӧма-нуӧма кадыс. Но эмӧсь на йӧз, код пытшкын налӧн олан руыс. Горӧда Катша кыр йывсянь: кӧнӧсь нӧ ті... Шыасяс йӧлӧга, и быттьӧ став бур войтырыс тані, некод некытчӧ аб мунлӧма. Меным кӧ, енэжыс медмича Важгорт весьтын... Кымӧръясыс кывтӧны уліті, некытчӧ тэрмасьтӧг... Кыпыдӧсь, быттьӧ тулысын воалысь лэбачьяс. Татшӧмӧсь-ӧ нӧ мӧвпъясыс Пӧгӧстса йӧзыслӧн... Ӧнія кадӧ... Шулӧны, оз пӧ позь керка дорад вайны льӧм (пуктыны ас киӧн). А Ӧльга бабӧ вайлӧма. И эз кӧ вӧв тайӧ пуыс, чайта — ни ӧти кыв эськӧ эг гиж: ӧта-мӧднымкӧд сёрнитам нэм: льӧмйыс — быд вожӧн, быд чалльӧн. Ку мӧдлапӧлас вуджалам Априк пӧль да Ӧдэй баб гу вылӧ... Кодӧртны найӧс. Келам юсӧ — ваыс йи. Юр вемӧдзыд волас кӧдзыдыс, пожйыштас и сьӧлӧмтӧ... Став лёксӧ сэсь ӧти здукӧн мыськас... Путшкымдін весьтын, Ву талапӧлас, лэптӧмаӧсь кык вичко — вӧтӧн аддза. Регыд и эз лоны муса вокъясӧй — Сашко да Геня. Мича Агнейӧн йӧзыс нывбабаӧс тӧдісны... А олӧмыд олӧм. Нёль йылӧм ковмис быдтыны ӧтнасӧн: ю вомӧн тӧвся туй кариг Ваачӧв Петя верӧсыс вӧйи, да став сьӧкыдсӧ нэм чӧжыс ӧтнасӧн нуис ань. Вӧлі шонді кодь мелі Агней тьӧтӧ, скӧравны эз кужлы... век бурӧн. Карысь воа, пета горт уличӧ да асъя лысванас мысся... Мӧд муын лысваӧн он мыссьыв. Томдырйиыд и тулысыс мӧд нога... И пӧтічыс нач морӧс пытшкад тёпкӧ, сывдӧ тӧвся веськодьлунсӧ. Сэсся регыд и чукӧстчас муслун, босьтас аслас сывбордйӧ да енэжӧдз кыпӧдлас... Мый сэсь и корсян, енэжсьыс... А лолыд лэбӧ. Кор шогсян, быд пу быттьӧ тшӧтш тэкӧд шогсьӧ. А кор лолыд тырлӧ радлунӧн, мӧвпыштлан-ӧ пуяс йылысь... Сэк ӧд найӧ пуяс, и сӧмын... Берба балясӧ окышта, кутла кыдз пусӧ... менам му вылын тулыс, и муслуныс сы мында... морӧс пытшкӧ оз тӧр да тадзикӧн сэсь солькнитчӧ...
(Мамлӧн челядьдырысь)
Кытчӧ нӧ, слабудкаясыс, мӧдісны? — Гурей Марей горзӧ бӧрсяньӧд. — Гурей-марей вотны, гурей-марей вотны... — дӧзмӧдыштам сійӧс. Асъя кыа Мария... Рытъя кыа Нина... Ягсиктысь кык чой... Верӧс сайӧ петісны, олӧм панісны... Ӧтиыслӧн чужис нёль ныв да дыр виччысяна пи. Мӧдыслӧн чужис нёль пи да дыр виччысяна ныв. Кыдзи сэсся шогмис йылӧмныслӧн олӧмыс — тайӧ нин выль висьт. А меным ӧні асъя кыаыс — Мария... рытъя кыаыс — Нина... Эг важӧн на ӧд и шулӧй: Юдинъяслӧн керка дорын пелысьыс кыдзи таво ыпнитіс — сэтшӧм розъя. А бӧръя вояснас вотӧсыс пыр этшаджык и этшаджык пондіс лоны. Косьмӧ пуыс. Лэбач-кадыс пелысьлысь кокаліс став вирсӧ.
Мамӧлы
Нярмисны гожся дзоридзьяс... Но содзнысӧ восьталӧны астраяс... Мед оз сэтшӧм гажтӧм ло пемыд арыс тӧв йылын ӧтка сьӧлӧмлы. Ме гажтӧмтча ичӧтдырся сьӧлӧмысь. Сійӧ йӧгзьысь шонді югӧр койд... Мукӧд ичӧт сьӧлӧмӧ пыралас вӧлі кортӧг. А ӧні — вояс колины да — сійӧ сьӧлӧмъяслӧн ӧдзӧсъясыс пӧдсаӧсь. Торкӧдчан, да оз восьтны. — Сёкатӧ-нылӧ, — шуалӧ бабӧ, — кула да, меысь ин пов. Кулӧм мортсьыд оз ков повны. Ловъясьыс повны колӧ. Кепысь серӧдӧма бабӧ. Серыс сьӧда-еджыда. Кык рӧм сӧмын, а ставсӧ шуӧма: пемыд войсӧ и югыд лунсӧ.
Гижӧд
Кад визулас
Жанр: 
Гижан кад: 
Пасйӧд: 

* Гурей-марей — намыр
* Ин пов (диал.) — эн пов
* Ку — визув ю, усьӧ Вуӧ
* Пӧтіч — войтва
* Слабудка (диал.) — славутка, сиктын медбур ныв

lkejrlkelkrgner klrjnelknfrkl ekjnrjkenfrej

1