ВОЙСЯ ГӦСТЯ
1 Оз узьсьы меным арся вояс, Кӧть пемдӧ водз, а югдӧ сёр, Ӧд сьӧрсьӧн-бӧрсьӧн кольӧм вояс Син водзад вежласьӧны кор. И асъя югдӧмсӧ он казяв, Кӧть войбыд синъястӧ он кунь. Кор казьтылӧмысь син дор вазяс, А мукӧддырйи петлас нюм. Мем олӧм сетіс ыджыд муслун, И ёртасьӧмлысь тӧда вын. А биыд сьӧлӧмсьыд оз кус кӧ, И арся слӧта войыс пым. Мед юяс вывті шуньгӧ наридз, Йи кеньӧн вевттьӧ берег дор. Со туйяс тупкӧмны нин карӧдз — Йи поссӧ кӧдзыд эз на дор. И сӧмын думӧн чужан сиктӧ Ме верма волыны быд здук, Ӧд думыд борда тай, оз сибды, Но кодкӧ видліс ӧдзӧс вуг... 2 И мӧвпӧй ори... «Код нӧ войнас?» Эн пов пӧ, аньӧй, тайӧ ме. Вай восьтлы, ме ӧд абу шой на, Ме тэнад томлуныд, ме — тэ. И порог вомӧн, вежавидзиг, Зэв кыпыд лола пырис ныв. «О, видза олан, Ыджыдвидзӧй, Сӧдз Висер юӧй, керӧс йыв!» А воча: пӧръясян пӧ, карса, Куш кывъяссьыд ӧд кӧдзыд мем. Тэ видан туй бырӧмысь арсӧ, А кӧсйӧмыд нӧ збыль-ӧ эм? Тэ ӧні сӧмын думнад волан, Рӧспута быттьӧ потшис туй. Кань олӧм сӧмын ӧд тэ олан, Ас чужан гортӧ он жӧ уй. Ва туйыс вӧлі, теплоходӧн, Кӧть мамыд виччысис, эн лок. А петлін коркӧ карсянь подӧн, Эн думайт сэк, мый туйыс лёк. 3 Ме эг на вунӧд арся войсӧ, Кыдз мусюр вӧлӧк ӧтнам дзик, Кӧть полӧмӧйла сьӧлӧм ойзіс, Сьӧд няйтӧд кысси сиктсянь сикт. Ме волі гортӧ час джын кежлӧ, Кор югдіс, петі туйӧ бӧр. Ме весиг кӧмкотӧс эг вежлы, И синва петіс, кыдз он бӧрд... 4 А томлун ропкӧ вомгорулас: «Тэ вӧвлін коркӧ сиктса морт. А ӧні копрасян быд пулы Тэ сӧмын кывнад. Чужан горт? Тэ сиктӧ волан лун-мӧд кежлӧ, И карысь бырӧма нин гаж. Тадз мортӧс ыджыд муслун вежлӧ, Сэк кольӧмторйыс ковтӧм, важ. И меным чайтсьӧ, сӧмын ӧні Тэ аддзан олӧмсьыс бур шуд. А коркӧ лӧсьыд вӧлі кӧні, Со тэныд олӧм ӧні руд». 5 «Да, томлун, мусмис меным карыс, Тан важсьыс абу ичӧт мог. И тулыс кодь мен весиг арыс. Кӧн мӧвпӧн, сэні менам горт. Ме олӧм вуджа шуда дойӧн, Мед сӧмын муслунӧй эз быр. И тайӧ арся пемыд войын Оз узьсьы, думъяс юрын тыр. Ме шуда вӧвлі чужан гортын И сэні радейттӧг эг ов. А ӧні, со нин верстьӧ мортӧн Ме аддзи збыль вылӧ любов, Код сетсьӧ олӧмад дзик ӧтчыд И лолыд петтӧдз оз жӧ пет. Тэ кытчӧ мунан, бӧрсьыд вӧтчӧ, Ас дінсьыд пышйыны оз сет. О, кольӧм томлун, войся гӧстя, Ог тӧд ме, кузь-ӧ лоас нэм. Мый вунӧ важыс, сыысь прӧстит, Ме шуда, муслун менам эм!»
Гижысь: 
Гижӧд
Войся гӧстя
Жанр: 

lkejrlkelkrgner klrjnelknfrkl ekjnrjkenfrej

1