ПРИЗЫВАЙТЧӦМ

Сиктын йӧктӧны,
Сиктын сьылӧны.
Уна керкаын
Гажа кылӧны.

Мыйся праздник нӧ
Сиктас воӧма?
Мый нӧ йӧзыскӧд
Талун лоӧма?

Праздник праздникӧн,
Гажлун гажлунӧн.
Пӧрысь пӧльыс тшӧтш
Весиг вашмунлӧ.

Удал зонъясыс
Талун мунӧны
Видзны Рӧдина
Бура унаӧн.

Ставныс мичаӧсь,
Ставныс статяӧсь.
Гажтӧм босьтӧма
Талун Катяӧс.

Зонмыс нылыскӧд
Пӧся сывъясьӧ.
Сыкӧд сёрнитӧ
Мелі кывъясӧн.

Сӧмын виччысь пӧ
Менӧ, донаӧй.
Миян томлуныс
Уна во на ӧд.

И мед шудлунным
Нэм оз орлывлы.
Кык во кежлӧ ми
Тэкӧд торъявлам.

Сиктын йӧктӧны,
Сиктын сьылӧны.
Виччысь мусатӧ,
Авъя ныланӧй.