БЫДТОР ТӦДНЫ КӦСЙЫСЬ КАНЬ

Каньлӧн видлытӧмтор абу.
Кампет мешӧк вайис бабӧ,
Кисьтіс сакарнича тыр.
Куш мешӧкас дзик жӧ пыр

Васька сюйис ассьыс нырсӧ,
Юрыс сэтчӧ сибдіс пыр жӧ.
Думсьыс корсис сэтысь чери.
Мый нӧ сэсся сыкӧд керан?

Ӧшинь вылысь дзоридз пӧри.
Ӧдзӧс восьса — сійӧ йӧрӧ.
Струба сюрӧ зяткис юрсӧ,
Мешӧкыс оз шед, да мурзӧ.

Уськӧдчи да сэсся дорйи.
Повзьӧм синъяса со борйын
Пукалӧ да век на шензьӧ.
Бабӧ сыкӧд скӧра вензьӧ.