ТЭНАД ӦШИНЬЯССА БИ

Ме чотіг локті Емва пӧлӧн,
Шынеля, а сэн шувгис вӧр.
И сідзи тіпкис менам сьӧлӧм! — 
Ӧд вои ас муӧ ме бӧр.
Ме аддзи ассьым чужан сиктӧс,
Салдатӧ кысянь мунлім ми.
Ме аддзи жаравеча юкмӧс
И тэнад ӧшиньясысь би!

Мый сьӧлӧмын, тэн тӧдны сьӧкыд, — 
Тэ некор фронт вылын эн вӧв.
И бур, мый фронтыс муніс бокӧд, — 
Сэн менӧ дзеблісны сё пӧв.
Но аддзи ассьым чужан сиктӧс,
Салдатӧ кысянь мунлім ми.
Ме аддзи жаравеча юкмӧс
И тэнад ӧшиньясысь би!

Тэ эскы: чеччылі ме гусьыс
И водзӧ, водзӧ муні пыр,
Кӧн сотчис му и ваыс пузис, — 
Став сынӧд вӧліс тшынӧн тыр.
Но аддзи ассьым чужан сиктӧс,
Салдатӧ кысянь мунлім ми.
Ме аддзи жаравеча юкмӧс
И тэнад ӧшиньясысь би!

Лют вӧліс — лязӧдім ми врагӧс,
Оз сэсся ловзьы сійӧ бӧр,
Оз воськовт миянсьыным тагӧс,
Мед выльысь сотны му и вӧр!
Ме аддзи ассьым чужан сиктӧс,
Салдатӧ кысянь мунлім ми.
Ме аддзи жаравеча юкмӧс
И тэнад ӧшиньясысь би!