* * *

Сідз ен катехизис поп
Медводз восьтас аслас пилы;
Сэсся дінсьыс ыстас, сылы
Ӧшмысьт пельпом вылас ноп;
Сэсся кысья воас пиыс
Теологӧн — и со сійӧс
Попӧй шензьӧ-кывзӧ… Эдз
Ёсьмӧм, сёрнитнысӧ лэдз!
…………………………
«Коми кыв! Тэд раммывлыны
Ковмас. Пондам виршъяс кыны,
Виршлӧн мичаджык тай сер;
Вирш оз дӧзмӧд кыдзи проза.
…………………………
Сулав! Ӧні рифма сырйӧн
Виршӧс сыръялам и зырйӧн
Ывла вылӧ шыбитлам…
Лэптас-ӧ код, видзӧдлам…
…………………………
Коми кыв пӧ усьӧм улӧ,
Коми кыв пӧ кутшӧм кыв!
Оз кӧ талун, аски кулӧ —
Бур морт комиӧн оз сьыв…
…………………………
Коді коми, коді роч,
А оз петкӧд серам шоч…»