ЫДЖЫД МАМ


Воча чойлӧн ыджыд мам —
Тайӧ менам муса пӧчӧй.
Сылӧн сэтшӧм авъя сям! —
Гортын пыр тай мыйкӧ вӧчӧ:

Медводз чеччас, ломтас пач,
Лунтыр кежлӧ сёян пуас,
Воклысь дӧмас резьдӧм гач,
Чойлы гӧснеч — пӧсь нянь — нуас.

Уджтӧг пукавны оз куж:
Вурун печкӧ, кепысь кыӧ.
Ёг турунлысь нетшкӧ вуж,
Аслыс сьылӧ гуся шыӧн.

Рытнас паччӧр пельӧсын
Ставӧн кывзам пӧчлысь мойдӧм.
Миян челядь сьӧлӧмын
Пӧчӧ дорӧ муслун ойдӧ.