АРСЯ ВОЙ ЭЖВА ВЫЛЫН


Кӧдзыд зэв. Войвывсянь лэчыд тӧв пӧльтӧ.
Пыдӧстӧм Эжваті ветлӧдлӧ гы.
Мисьтӧмӧсь, букыша видзӧдӧ ставыс...
Тӧкӧтьӧ кылыштӧ паракод шы.

Енэжсянь дугдывтӧг кӧшысь моз зэрӧ.
Чӧскыда узьӧны сиктъясын йӧз.
Эжваыс скӧрмӧма, пыдӧснас вӧрӧ.
Пемдӧма. Абу нин важ мозыс лӧз.

Паракод саялі, кӧдж сайӧ муніс.
Чорыда узьӧны коми йӧз сэн.
Ва дорын тірзьӧны-вӧрӧны пуяс,
Кынмӧны. Найӧӧс унмыс оз вен.

Узьӧны гӧраяс. Узьӧны сиктъяс.
Шы ни тӧв сулалӧ Сыктывдінкар.
Ланьтӧма-сь пӧткаяс, оз сьывны некӧн.
Быдӧнӧс йӧртӧма керкаас ар.

Оз ланьтны пыдӧстӧм Эжвалӧн гыяс;
Увгӧны-мунӧны водзӧджык пыр.
Пессьӧны кумыльга визувкӧд найӧ,
Катӧны ва паныд косясигтыр.

Сап пемыд. Гыяслӧн тышкасьӧм кылӧ;
Найӧ оз аддзыны аслыныс ин:
Увгӧны, кайӧны берегӧ, вылӧ...
Садьмӧны коми йӧз, восьтӧны син.