ИЧӦТДЫРСЯ ОЛӦМГожся кадӧ мича лунӧ Кокни сьӧлӧм вылын: Небыд тӧвру, дзоридз уна... Ывла вылыс сьылӧ. Керка пытшкӧ зарни шонді Пырӧма нин важӧн: Дзирыд, югыд, сотӧ-шонтӧ, Керка тыртӧ гажӧн. Синтӧ восьтан: ывла-с вӧт кодь, Гажа ӧшинь сайын!.. Дырнӧс дорӧ ми чиг ӧткодь Чеччӧмӧн тшӧтш каям. Босьтам кӧвтны мамлысь чышъян, Дырнӧс дорлань мӧдам, Гумладорсянь ӧдйӧ пышъям, Туйсӧ сэтчӧ тӧдам. Сюяс пӧвстті мунам, полам — Гажа сьӧлӧм йӧктӧ: «Сюяс пӧвстын шыш пӧ олӧ, Челядьясӧс ӧктӧ». Буса туйті коськӧм йӧрті Нимкодясям мунам; Небыд туйӧд мунӧм бӧрти Кольӧ кок туй уна. Коркӧ тыдовтчас и Дырнӧс — Гажаинӧ воам! Мыйӧн матыстчам ми, пыр жӧ Варовджыкӧсь лоам. Джуджыд кыркӧтш веськыдасӧ, Нёрӧм лыс сэн узьӧ, Дзоргӧ-кывзӧ Дырнӧс васӧ — Лаптыс уна... кузьӧсь. Уна сё во лыскыс вылӧм: Дзор нин, кос нин бокыс, Копыртчӧма Дырнӧс вылӧ, Ӧшӧдчӧма шога. Изъяс вывті, кыркӧтш пӧлӧн Ыджыд паськыд юӧ Дырнӧс полігтырйи чӧла Эзысь васӧ нуӧ. Воам гажа Дырнӧс дорӧ, Сувтам ӧтилаӧ... Дырнӧс дзирыд, синтӧ ёрӧ... Пӧрччысям да... ваӧ! Зарни шонді сотӧ-шонтӧ. Небыд вирыд пуӧ. Челядь дырйи-д кӧрт кодь ён тэ — Час-мӧд олан юад. Шоныд ваысь петӧм бӧрын Тэныд гажа, долыд, Быттьӧ кыпыд пожӧм вӧрын Кокньыд ветлӧ лолыд. Челядь дырйи гажыд уна, Долыда сэк олам... Гашкӧ, дасысь ӧти лунӧ Дырнӧс дорӧ волам.
