МУДЗӦМ ВОЙТЫРЛЫ


Висьӧ кӧ сьӧлӧмыд, курыд кӧ олӧмыд,
Шудыд кӧ тэ ордӧ сутш кежлӧ волӧма,
	Сэки тэ ва дорӧ лэччы.
Бадьяслӧн кышӧдчӧм, турунлӧн копрасьӧм,
Эжвалӧн шлывгӧмыс, черилӧн тювкъялӧм
	Бурӧдас сьӧлӧмтӧ тэнсьыд.
Сьӧкыд кӧ овнытӧ, чорзьӧ кӧ сьӧлӧмыд,
Ичӧтсянь быдмигад шудтӧм кӧ вӧлӧмыд,
	Мун сэки сёордӧ вӧрӧ.
Кузь кока пожӧмыс, дзор тошка коз пуыс,
Зарниа коръяснас кышӧдчысь кыдз пуыс
	Небзьӧдас сьӧлӧмтӧ тэнсьыд.
Мудзин кӧ пессигад, усин кӧ сьӧлӧмнад,
Быри кӧ эбӧсыд лёк йӧзкӧд мырсигӧн, —
	Ветлы тэ йӧз пытшкӧ сэки.
Матысянь видзӧдлы найӧлысь олӧмсӧ,
Пидзӧсас кучкӧмӧн бӧрдӧмӧ волӧмсӧ, —
	Бӧр сэки эбӧсыд воас.