ДОНА ПИЯН
Оліс-выліс налим сера кань, Еджыд уска, пышыд бӧжа ань, Сёйис чӧскыд йӧв да выя нянь, Ачыс вӧлі мича да зэв шань. Зіль зэв вӧлі — войбыд кыйис шыр, Луннас мыськис ассьыс мича ныр, Шонді водзын вермис узьны дыр, Узигмозыс мыйкӧ мойдіс пыр. Вӧлі шыльыд, вӧлі госа, тшӧг, Ёна зэв радейтіс чӧскыд нӧк. Кӧзяйкаыс вылӧ петіс лӧг — Мыйла оз лэдз сёйны тшӧктытӧг. Талун каньыд кургӧ-сьылӧ, Лабич улын рузум вылын Нёльӧн синтӧм пиа-ныла Муртса веглясьӧны сылӧн. Пияныс зэв шаньӧсь, Любитӧны каньӧс. Со тай найӧ ӧні Зіля нёнясьӧны. Каньыд куйлӧ рузум вылын, Синсӧ читкыртӧма, сьылӧ. Сьылӧм мелі-мелі сылӧн, Мича-мича мойданкылыс: «Кос нянь гиджгӧ шыррр, Пышкай лэбзьӧ жбыррр, Сылӧн ёсь зэв ныррр, Лок жӧ татчӧ пыррр!» Пышкай пыдди пырис пон, Ош кодь скӧр да ӧш кодь ён. Кань чеччыштіс шарс, Сьӧвзис понлы — карс, Гӧн сувтӧдіс варс! Сэсся уськӧдчис пон вылӧ, Бан бокас сеталіс сылы, Ӧтарас и мӧдарас Гыжнас вӧчис сылы пас. Понйыд пышйис ылӧ, Лявзӧ ывла вылын. Каньлӧн сьӧлӧм пуӧ, Век на понлы шуӧ: «Ветлӧдлы туй шӧрӧд, Керкаӧ эн пыр! Каньпиян эн вӧрӧд, Жалит ассьыд ныр!» Лабич улын миян Тивзӧны каньпиян, Мамсӧ виччысьӧны: «Кӧн нӧ сійӧ, кӧні?» Пиян дінӧ водіс каньыд, Збой сьӧлӧма аньыд. Ставсӧ ӧтчукӧрӧ вайис, Лапанас шымыртіс найӧс, Нюмсидзис-чукыльтіс юр Да и шуис: «Куррр! Понйыс весьсӧ увтчас мед, Пиян некодлы ог сет!»
Гижысь: 
Гижӧд
Дона пиян

lkejrlkelkrgner klrjnelknfrkl ekjnrjkenfrej

1