БӦРДЫСЬ ПОМА


Код нӧ горзӧ? Код нӧ равзӧ?
Али рака чукӧр кравзӧ?
Гашкӧ, гӧрдлӧ чань?
Али авзӧ кань?

Абу чань ни абу рака:
Бӧрдӧ Таня нима кага.
Бӧрдӧ да лёкгоршӧн лӧвтӧ,
Платтьӧнас синвасӧ кӧвтӧ:
— Ы-ы-ы!..

Петіс Таня кильчӧ помӧ,
Бӧрддзис сійӧ важсьыс ёна:
— Некытчӧ ог мун!
Локтӧ менам ун!
Ӧ-ӧ-ӧ!..

Пуксис гортас ӧшинь дорӧ.
Синва петӧ жборган шорӧн:
— Гажтӧм меным гортын этан,
Бӧр ме ӧшинь улӧ пета!
О-о-о!..

Йӧв сетісны пызан сайын.
— Тасьтіыс зэв ыджыд тайӧ!
Татысь ог сёй, ог сёй нэм!
Мӧд тасьтіӧ кисьтӧй мем!..
У-у-у!..

— Мӧдӧ кисьтам, сёйышт, лок, на! —
Таня зымнитіс сэк кокнас:
— Оз ков меным тайӧ!
Чай мен ӧдйӧ вайӧй!
А-а-а!..

Узьны водтӧдісны нылӧс,
Сійӧ бара бӧрдӧ, кылӧ:
— Чечча бӧр, унмӧй оз лок,
Ог кут узьны, ог-ог-ог!
У-у-у!..

Сиктысь йӧзыс чукӧртчисны,
Ӧшинь улӧ локталісны.
Тӧдны окота ӧд ставсӧ,
Коді лун и вой пыр равзӧ.

Видзӧдӧны — ичӧт нывка
Сулалӧ сэн, тешкодь вывті:
Пыктӧм ныра, синмыс гӧрд,
Абу паськӧмас кос шӧрт.
— Ы-ы-ы!..
У-у-у!..

Мый тэ лӧвтан, бӧрдысь Пома?
Бӧрдысь Пома, паськыд вома?
Ульсалӧмыд — ставыс бак,
Вылад вермас петны тшак.