АСЛАД СЬӦЛӦМЫДЛЫСЬ ЮАВ


Дона нылӧй, муса нылӧй.
Тэ ӧд олан гажӧй менам!
Сьӧлӧм тіпкӧмтӧ ме кыла,
Ёна радейта ме тэнӧ.

Коркӧ гижлін: тэкӧд ӧні
Оз пӧ позь мем мусукасьны...
Кодсюрӧ пӧ дивитӧны...
Вай жӧ тӧдам тайӧс асьным...

Эн пӧ некодлысь тэ кывзы,
Шуан, эн пӧ эновт шудтӧ,
Сьӧлӧм пытшкад муса нывсӧ
Нимкодясиг, радліг кут тэ.

Дона нылӧй, муслун бинад,
Дона-й, тэысь кындзи некод
Морӧс бердам, сьӧлӧм дінӧ
Оз топӧдчыв, муса-й, мекӧд.

Сӧмын сьӧлӧмӧйлысь кывза,
Кывза горсӧ сылысь сӧмын,
Пыдди пукта сылысь кывсӧ
Аслам шудын и олӧмын.

Зарни нылӧй, тадз жӧ уджав:
Аслад сьӧлӧмыдлысь юав
(Туй индыны сьӧлӧм кужас),
Кывзы, мыйджык тэныд шуас.