ТӦВЛАНЬӦ

«...Тӧда ме, оз ло сэн енэж лӧзыс,
И оз гыав зарни шепта сю.
Сы вӧсна и донаӧсь мем йӧзыс,
Кодъяскӧд дзик ӧти кок ув му».
С. ЕСЕНИН.

Лымъялӧ сывлытӧм вылӧ нин,
Шондӧдлас кӧть ывла выв.
Небзьылас, сӧмын оз сыв,
Тӧвсӧ он вермы нин ылӧдны.

Тавося дзоридзлӧн овсьӧма,
Тулыснас петас дзик мӧд.
Быран да он сэсся тӧд,
Муыс мый бара на ловзьӧма.

Сійӧн и сьӧлӧмӧй нормывлӧ
Вӧр-валӧн унмовсиг пыр.
Колис мем регыд-ӧ, дыр
Тайӧ бур му вылас овнысӧ?

Лымъялӧ сывлытӧм вылӧ нин.
Едждас и тадз менам юр.
Медся лёк лунӧй мем бур:
Олӧмлӧн шыяс сэн кылӧны.