МАЙБЫР МАЙ


Войвыв пышйис
турӧб тӧлӧн
пӧрысь Певраль-пӧч;
бырзис-лёксис,
нымӧн лымнас
лёкысла эз пӧд.

Сы бӧр вӧтчис
ропкигтырйи
Йӧгра Марпа Март, —
бӧрсьыс туйсӧ
ассьыс каттис,
мед оз вӧтчы морт.

Ляшкис-муніс
сьӧкыд нопйӧн
жугыль Апрель дядь,
нуис сьӧрсьыс
пельпом вылас
тӧвся лямпа, дадь…

Тӧлыд коли.
Олӧм вежсьӧ:
кывсьӧ Майбыр Май…

Локтіс збоя
ытва вывті
Комсомолзон Май;
вайис сьӧрсьыс
йӧзлы тулыс —
гож да югыд вой.

Челядь медым
эз ло дьӧбӧсь,
козин вайис тшӧтш.
«Налӧй!» — шуис,
лэптіс няйтысь —
«рака сапӧг гоз»…

Быдӧн гажӧсь,
нимкодь-радӧсь,
сӧмын скӧтлы тшыг.
Ставсӧ быртіс,
сёйис тӧлыд,
тулыс воис — куш.
Сыысь мыжа
кольӧм тӧлыс,
(эн тулысӧс чайт).
Сӧмын тшыгсьыс
ӧні став весьт —
Май тай ӧтвечайт.

Энлӧ шогсьӧ,
лоас ставыс.
(Кулі рӧдвуж важ).
Оз нин ловзьы
кӧдзыд тӧлыд,
оз бергӧдчы бӧр.

Гӧля олӧм
колис тӧлыд,
зэв жеб овмӧс пай.
Сӧмын сыысь
оз зэв шогсьы,
оз майыштчы Май.

Мед кӧ тшыг на,
том на, веж на,
лысьӧм зэв на нэр.
Но тэ восьтін,
тулыс вайин,
восьтін ӧдзӧс рай.

Бӧрсьыс локтӧ
турун нӧбйӧн
Июнь — выль ань шань.
Тайӧ тэнад
лоӧ пӧлыд —
Комсомолныв Юнь.
Сыкӧд кыкнад
мусӧ шонтад —
воас вотӧс, нянь.
Быдтор лоас,
сӧмын дасьты
ӧтув тасьті-пань.