ВӦРСА МОЙД

Гашкӧ, сэксянь кымын и кутісны шуны Кирӧӧс тӧдысьнас да йӧй нисьӧ прӧсужнас, кор сійӧ вежон кымын кежлӧ вошлі вӧрӧ. Кайис недыр кежлӧ тшак видзӧдлігмоз. А рытӧдзыс эз во гортас. Дерт, гортсаясыс медводз кватитчисны да кутісны майшасьны. Мӧд лунас нин сиктса войтыр быдса араваӧн мӧдӧдчисны корсьны Кирӧӧс. Лунтыр рӧйлісны понъясӧн, лыйлісны ружйӧясысь сынӧдас. Гашкӧ пӧ, лыйӧм шысӧ кылас да петас йӧз дінас. Но весьшӧрӧ.

Кодсюрӧ вӧрас и узьмӧдчисны. Водз асывсяньыс кӧсйисны кытшовтлыны ылітіджык. Кӧть эськӧ кытысь вошӧм мортыд та ыджда пармаысь сюрас. Видлы сійӧс аддзыны. Ӧткымынӧн весиг шмонитны нин кутісны, мед кӧть кыдзкӧ татшӧм ногӧн нин пальӧдыштны Кирӧлысь шогӧ усьӧм матыссаяссӧ: вӧрсаыс пӧ ас дінас сійӧс, тыдалӧ, кыскис. Сідзи нинӧм абутӧг и воисны Кирӧӧс корсьысьяс. А сылӧн гортсаясыс шогысла эз тӧдны, мый вӧчны. Ловъя-ӧ, кулӧма-ӧ налӧн Кирӧыс, код тӧдас?

Но вежон мысти кымын Кирӧ, абу на пӧрысь мужичӧй, ачыс воис гортас. Тошсялӧма. Чужӧмыс сьӧдасьӧма да сарпассьӧма. Синъясыс лазъялӧны. Гӧлӧсыс киргӧ. Кокъяссӧ муртса лэпталӧ. Гортсаясыс эськӧ пыр жӧ босьтчылісны юасьны, мый пӧ тэкӧд лои, ми пӧ тэнӧ понъясӧн и ружйӧясӧн корсим. А мӧдыс сӧмын ӧвтыштчис кинас. Энӧ пӧ нинӧм абусӧ юасьӧй. Висьталӧй пӧ Енмыслы аттьӧ, мый ловйӧн гортӧдз вои.

Сы бӧрын сійӧ вежон кымын на куйліс гортас, кытчӧдз дзикӧдз эз сайкав да эз во ас садяс. Но сідзи эз ёнасӧ и висьтасьлы, кыдзи вежон чӧж оліс вӧрын. Шуис сӧмын: гыма зэр улӧ пӧ веськалі да сувті пӧ пашкыр коз улӧ. Сэні пӧ суис менӧ чардбиыс. А сэсся пӧ кор палялі, ог жӧ помнит, кыті ветлӧдлі, кӧні вӧлі. Сӧмын пӧ, кор кутшӧмкӧ ногӧн гӧгӧрвои, мый гортлань туй вылын нин, сэки пӧ тай ас садьӧ вои-а.

Сійӧ кадсяньыс Кирӧ лоис зумышджык. Эз сэтшӧм лышкыда петкӧдчывлы сылӧн чужӧмбан вылын коркӧя гажа нюмсерыс. И гӧлӧсыс лоис лӧньджык, вашкӧдчанаджык. Но синъясыс сылӧн корсюрӧ кутісны ӧзйывлыны аслыспӧлӧс биӧн. Видзӧдлас Кирӧыд да кажитчӧ, мый сылӧн синъясыс веськыда морт пырыс прӧйдитӧны да аддзӧны ставсӧ, мый мукӧдъясысь дзебӧма, весиг тӧдсаӧсь лоӧны орччӧн сулалысьлӧн гуся мӧвпъясыс. И сэки весиг шуштӧм овлывлӧ Кирӧкӧд паныдасьысьлы сьӧлӧм вылас. Кӧть эськӧ нинӧм лёксӧ мӧдыс эз вӧчлы. Мӧдарӧ, видзис на паныдасьысьяссӧ кутшӧмкӧ неминучаысь ли, загрекиысь ли. И шензьывліс мортыс Кирӧкӧд сёрни бӧрас. И эскывліс, и эз эскывлы сылӧн висьталӧмлы. Но век жӧ вӧчліс сы ног. Вывті нин йиджлісны вежӧрас Кирӧлӧн кывъясыс да ӧзйысь ёсь синъясыс.

Со тадзи жӧ ӧтчыд сиктса чери кыйысь Вась Ёгор мӧдӧдчис ю дорӧ ва шӧр подольникъяс видлавны. Оз-ӧ пӧ праздник кежлӧ кӧть кутшӧмкӧ прамӧйджык лов шед. Но вадорлань лэччигӧн сылы буретш паныдасис Кирӧыд. Зэв сюся видзӧдліс Вась Ёгор вылӧ. И тайӧ кадӧ бара ӧзйылісны сылӧн синъясыс, да сійӧ сотыштіс видзӧдласнас Вась Ёгорӧс. Мӧдсӧ весиг йирмӧг босьтліс. Но сэсся Кирӧлӧн синъясыс бӧр кусісны, да сійӧ негораа шуис:

— Ёгор дядь, вай бурджык бергӧдчы гортад. Нинӧм тэныд талун оз сюр. Бушков кыпӧдчас, да веж гыяс кутасны ю вылас валъявны. Вӧйны верман аслад дзибрӧс веткинад.

Вась Ёгор весиг чурмуніс тайӧ кывъяс бӧрас да кӧсйӧ нин вӧлі серӧктыны. Но мӧдыс сэсся нинӧм эз шу да пыр жӧ мӧдӧдчис водзлань. Эз весиг виччысь, вочавидзас али оз мыйкӧ Вась Ёгорыд. Либӧ серам выв лэптас, либӧ юасьны кутас, кытысь тайӧс Кирӧыс тӧдӧ. Сэки Вась Ёгор ёрччыштіс да век жӧ мӧдӧдчис вадорлань, кытчӧдз эз нин вӧв ылын. Но Кирӧыд збыльысь прав вӧлӧма. Рытыввывсянь кыпӧдчысь кымӧръяс вайисны аскӧдныс зэв ёсь тӧв. Ва вылын скӧралісны веж гыяс. А укшальмӧм тӧлыс шутьляліс пельясын.

Вась Ёгор тапикасьыштіс аслас домалӧм ветки дорын, но сідзи эз и лысьт петны ва вылӧ. А Кирӧыслӧн нӧ кӧ кывъясыс збыльмасны да сійӧ вӧйӧ аслас веткинас? Со нӧ кутшӧм ӧзъян синъясӧн видзӧдліс сы вылӧ. Нӧшта недыр вадорын дзӧрыштӧм бӧрын Вась Ёгор мӧдӧдчис гортланьыс.

— Мый нин сэтшӧм ӧдйӧ бӧр бергӧдчин? — чуймис Пекла гӧтырыс.

— А эсійӧ югыд синмасӧ паныдалі да тшӧктіс косны, — вочавидзис Вась Ёгор.

— Но и но, Кирӧ шуӧмысь повзин, — шлуп-шлапкерис кияснас Пекла. — Код тӧдас ӧд, мый сійӧ вермас шуны. Сылӧн ӧд вӧрас вошлӧм бӧрас, висьталӧны, мыйкӧ пӧ збыльысь эз кут тырмыны юрас.

— Энлы тэ, гашкӧ, и прав Кирӧыс, — рама воча шуис Ёгор. — Аддзылін кӧ эськӧ, кыдзи сійӧ ме вылӧ видзӧдліс, веськыда сотіс. Да и ю вылас веж гы петӧма.

— Став йӧйыс ӧд сідзи видзӧдӧны, — бара крапкис Пекла. — А тэ ёнджыка кывзы нинӧм абусӧ. Миян юыд гытӧгыс гежӧда овлӧ.

Но гозъя чуймисны, кор рытланьыс нин кывлісны, мый буретш на весьтын, кӧні юыс торйӧн нин паськыд, со тадзи жӧ вуграсигӧн орчча сиктсаяс путкыльтчӧмаӧсь ыджыдкодь пыжӧн. Некымынӧн вӧлӧмаӧсь, некод абу берегӧдзыс воӧма.

Сэки Вась Ёгор весиг пасъясис ас кежсьыс. Збыль, сідзкӧ, висьталіс Кирӧыд. Бур, мый сылысь кывзысис. А эз кӧ, гашкӧ, важӧн нин чериясӧс вердӧ.

Кӧсйис сэсся мӧдысь паныдасигӧн Вась Ёгорыд аттьӧавны Кирӧсӧ сыысь, мый отсаліс видзны загрекиысь. Но мӧдыс быттьӧ гӧгӧрвоис Ёгорлысь мӧвпъяссӧ. Кутшӧмкӧ нюмтор тыдовтчис сылӧн чужӧм вылын. Бара нинӧм эз шу, ӧвтыштіс кинас да мӧдӧдчис водзӧ. Вась Ёгор сӧмын вомсӧ калькӧдӧмӧн видзӧдліс ылыстчысь Кирӧ вылӧ.

А со мый нӧшта висьталіс Кирӧ йылысь лавкаӧ чукӧртчӧм аньяслы Варук тьӧт, сэтшӧм быргысь, мый весиг узигас вомыс оз пӧдласьлы.

— Кывзӧй, кывзӧй, бобӧяс, — шуаліс сійӧ пекарняысь нянь виччысигмоз. — Тӧрыт асывнас тайӧ лои. Буретш петі ӧшинь улӧ турун разӧдны. Мися, косьмыштас да, рытнас позяс чӧвтны. Но друг пельӧс сайсянь эсійӧ Кирӧыд петіс да шуӧ: енэжсянь пӧ зэр киссьыны кыйӧдӧ, а тэ пӧ турун разӧдан. Ме пузи сэтчӧ да и шуи, мися, сир пинь тэныд горшад. Ачым разӧді турунтӧ да пыри гортӧ. Эг и тӧдлы, кытыськӧ сэк кості кымӧр кыпӧдчӧма. Тэрмасьӧмсорӧн эськӧ уськӧдчи куртны, но кытысь нӧ верман кымӧртӧ ордйӧдны. Ставсӧ кӧтӧдіс. Код тӧдас, дыр-ӧ сэсся сійӧс ковмас косьтыны. Со и эн эскы та бӧрын Кирӧыдлы.

Бабаяс сэк кості кывзісны Варук тьӧтлысь висьталӧмсӧ, а асьныс мый йылысь кӧ гусьӧн вашкӧдчисны. Кирӧлӧн олӧм йылысь, тыдалӧ.

Но нӧшта тешкодьтор лоис Микулай бригадиркӧд. Сійӧ вӧлі буретш лӧсьӧдчӧ нуӧдны карӧ аслас машинанас племянниксӧ, коді гожӧм кежлас сиктӧ гӧститны воліс. Машинаӧ пуксигӧн нин друг сы водзын кытысянькӧ тыдовтчис Кирӧ. Югнитліс синъяснас Микулай вылӧ да шуис:

— Кытчӧ нӧ сэтшӧм ёна тэрмасян, Микулай Иванович? Тэрмасьысьястӧ ӧд Енмыс оз радейт.

— Мый нин сӧран нинӧм абусӧ, — дӧзмис Микулай.

— Код тӧдас, сӧра али ог. Но Изъя шор вомӧн поскыд вермас сконъявны тэнӧ. Эн, колӧкӧ, тэрмась.

Микулай весиг ёрччыштіс тайӧ кывъяс бӧрас. А Кирӧлӧн дукыс нин абу. Быттьӧ тӧдӧ, мый оз кут сылӧн шуӧмлы эскыны бригадирыд. А сылы нӧ мый, висьталіс, и ставыс. Сэсся мед ачыс мӧвпыштлас.

Ӧні Микулай эз тӧд, кывзыны-ӧ Кирӧлысь шуӧмсӧ, али нӧ пыр жӧ вӧрзьӧдчыны. Сійӧ зэв бура гӧгӧрвоис, мый Изъя шор вомӧн поскыс важ. Талун-аски сулалӧ. Туй вӧчысьяс выль поссӧ эз на эштӧдны. Позьӧ эськӧ кытшовтны, но кытшолыс зэв кузь, а туйсӧ дженьдӧдӧм могысь ӧні став машинаыс тайӧ важ поскӧдыс вуджӧны. Микулай, мыйлакӧ, нӧшта ӧтчыдысь пыраліс гортас. А юрас пыр бергалісны Кирӧлӧн кывъясыс. Эскыны-ӧ, абу-ӧ? Збыль али лӧж висьталӧ тайӧ йӧй нисьӧ прӧсужыс? Но сэсся ӧшинь пыр кылісны машинаын пукалысьяслӧн гора гӧлӧсъясыс. Налы эз терпитсьы ӧдйӧджык мӧдӧдчыны карлань. Медбӧрын Микулай шуис аслыс, мый лоан ло, а сійӧ петас туйӧ. Мед сӧрӧ, колӧкӧ, Кирӧыд. Ачыс ӧд абу жӧ сыысь йӧйджык. Но сыысь, мый аддзис Микулай Изъя шор вомӧн пос дорӧ матыстчигӧн, пыр жӧ топавліс сьӧлӧмыс. Тайӧ пӧрйӧ пос вомӧн коркӧ вольсавлӧм важ плакаясыс абу вермӧмаӧсь кутны груз тыра машина, да сійӧ кабинанас увлань юрӧн куйліс пыдӧсас. Орччӧн гораа горзігтыр котралісны да ноксисны йӧз. А Микулай тайӧ здукъясас весиг аттьӧаліс Кирӧӧс сыысь, мый висьталіс сылы, мед ёна оз тэрмась. Сійӧн ӧд и педзыштіс на гортас. И бур, мый тадзи вӧчис.

Та бӧрын сиктсаяс мӧд ногӧнджык нин кутісны видзӧдны Кирӧ вылӧ. Эз нин пондыны серавны сы вылын, мый пармаын быдмӧм морт вошліс вӧрӧ да та дыра сэні оліс. Кӧть эськӧ водзтіджык дивитлісны таысь, кыдзи нӧ пӧ сяммис ылавлыны ас ягӧ. А ӧні эз и тӧдны, мый шуны Кирӧ йылысь. Кытысь сійӧ тӧдӧ, мый виччысьӧ кодӧскӧ водзӧ вылӧ, мыйла друг сэтшӧма югзьывлӧны сылӧн синъясыс, кор видзӧдлывлӧ кодсюрӧ вылӧ да быттьӧ сотыштӧ найӧс аслас видзӧдласнас.

А Кирӧ оліс аслас олӧмӧн. Уджаліс кочегарӧн школаса котельнӧйын. Прӧст кадӧ ветлывліс вӧрӧ, вадорӧ, ноксис горт гӧгӧрын. Сійӧ эз ёна кӧсйы тӧдны, мый шуасьӧны сы йылысь сиктсаяс. Мед, колӧкӧ. Ӧд сійӧ налы дзик некутшӧм лёк оз вӧч. Сӧмын видзӧ неминучаясысь. Збыльысь ӧд овлӧ Кирӧлӧн олӧмын сэтшӧм здук, кор сійӧ кутӧ тӧдны ас сиктса кутшӧмкӧ олысь йылысь ставсӧ и сылысь воддзаджык и водзӧ олӧмсӧ. И друг аддзӧ, мый вермас лоны мортыскӧд кутшӧмкӧ омӧльтор, он кӧ кутышт, он кӧ ӧлӧдышт. И сэки Кирӧ тэрмасьӧмӧн мунӧ сы дінӧ, мед отсавны мездысьны неминучасьыс. Ачыс оз тӧд, мый тайӧ, но кодкӧ быттьӧ Кирӧӧс тойлӧ, йӧткӧ мышсяньыс. Мун пӧ да висьтав, мед видзчысяс. И Кирӧ век удитӧ ас кадӧ. Ачыс тӧдӧ, мый оз дзик пыр кутны эскыны сылы. Да, гашкӧ, сералыштасны на. Но кор бӧрынджык нин аддзӧ, мый нинӧм эз ло мортыскӧд, сэки и Кирӧлы нимкодь сьӧлӧм вылас.

А сёрнитӧны кӧ сы йылысь, мед, колӧкӧ. Кирӧлы таысь пӧсь ни кӧдзыд.

Вочасӧн век жӧ Кирӧлӧн вежӧрын воссьӧны вӧрын коллялӧм сійӧ лунъясса серпасъясыс. Но сӧмын вӧтын. И ӧтчыд, и мӧдысь, и коймӧдысь вӧтасьӧ Кирӧ та йылысь. И со нин сійӧ ӧні быттьӧ помнитӧ ставсӧ, мый сыкӧд вӧлі вӧрас сійӧ лунъясӧ...

Кымынысь сылы ичӧтдырсяньыс на шулывлісны, мый гымалігӧн оз позь сулавны пу бердын. А сійӧ сувтіс коз дінас дзик орччӧн. Быттьӧкӧ вунӧдіс коркӧя шуӧмъяссӧ. Эз вӧв окота кӧтасьнысӧ да. Сэки и лыйис чардбиыс коз пуас да Кирӧ воштіс садьсӧ. А сэсся быттьӧ, кор воис ас садяс, сійӧ абу нин морт, а ыджыд коз пу, сӧмын дзик морт моз жӧ кужӧ мӧвпавны-вежӧртны, шогсьыны-серавны. И гӧгӧрвоӧ мортлысь гуся мӧвпъяссӧ, аддзӧ сылысь водзӧ олӧмсӧ.

И сы гӧгӧр сулалысь ниа пуяс, козъяс, пожӧмъяс, кыдзьяс, пипуяс сідзжӧ сёрнитӧны Кирӧкӧд, лыддьӧны сійӧс асӧн. Но найӧ тӧдӧны нин, мый Кирӧ на дінӧ воис недыр кежлӧ. Медыджыдыслӧн шуӧм сертиыс. Регыд бӧр мунас йӧз дінӧ. Та вӧсна и шогпырысь висьталӧны Кирӧлы кияснас ӧвтчигмоз асланыс майшасьӧмъяс йылысь. Тайӧ майшасьӧмъясыс чукӧрмисны уна во чӧж нин и окота пуяслы кодкӧдкӧ юксьыштны наӧн. Мед жӧ кывласны, мед жӧ тӧдласны, мый и найӧ абу дзик кывтӧм пемӧсъяс, а ловъя ловъяс. Налӧн сідзжӧ эм сьӧлӧм дой. Ӧвтчӧны ниаяс и козъяс, пожӧмъяс и кыдзьяс асланыс лапъясӧн-вожъясӧн да негораа, тэрмасьтӧг висьталӧны Кирӧлы чукӧрмӧм дойяс йылысь, мый важ сертиыс ёна омӧльджыка пондісны овны найӧ, вӧрын быдмысь пуяс. И сынӧдыс лоис кутшӧмкӧ аслыссикас кӧра да гудыр, код вӧсна сьӧкыд лолавны. И поводдяыс сэтшӧм асныра, сэтшӧма кутіс друг вежласьны, мый пуяслы то вывті жар, то вывті кӧдзыд. Кӧсйӧны найӧ кор лэдзны, а сэк кості кынтӧ. И гожӧмнас кутшӧма полӧны пуяс, кор став вӧрыс тырӧма котшӧс дукӧн. Кӧнкӧ ыпъялӧны вӧрса пӧжаръяс, сотчӧны биын налӧн ёртъясныс, кодъяс быдмисны-верстяммисны сё воясӧн. И со ӧти здукӧн биыс ньылыштіс вӧрса багатыръясӧс. Тӧкӧтьӧ кӧ, и татчӧдз би кывъясыс воасны. А мый найӧ вермасны вӧчны паныд.

А сэсся кутшӧмкӧ идӧртӧм кык кокаяс шӧйтӧны-ветлӧны вӧрӧд. То нем думайттӧг пӧрӧдасны медся мича козсӧ либӧ пожӧмсӧ, кодъясӧн ёртъясыс нимкодясьлісны, да сідзи и эновтасны сісьмыны. То кутшӧмкӧ кӧрт машинаясӧн нырыштасны быдса рас. То сералігмоз чегъяласны вӧрса пуяслысь медся мича вожъяссӧ. И бурдлытӧм дойяс кольӧны та бӧрын пармалӧн пельӧсъясын, плешкассьыны пондӧ пармаыс.

Асланыс татшӧм негораа сёрниӧн то вашкӧдчигмоз, то шувгигмоз пармаса пуяс тшӧктӧны Кирӧлы, мед жӧ сійӧ висьталас йӧзыслы, мый оз кӧ лоны найӧ, вӧрса багатыръясыс, свет вылас, и йӧзыслӧн олӧмыс дзикӧдз торксяс. Кӧть эськӧ кык кокаяс асьнысӧ лыддьӧны медся сюсьӧн да вынаӧн...

...Садьмӧм бӧрас Кирӧ дыр мӧвпалӧ вӧт йывсьыс. Збыль ӧд, гашкӧ, тадзи и вӧлі да. Гашкӧ, збыль сійӧ коз пуӧ и пӧрлі. И дзик некытчӧ эз вошлы. Вӧлі гортдорса вӧрас. Сӧмын некод та йылысь эз тӧдлы. И правӧсь ӧд пармаын быдмысь веж багатыръясыс. Веськыда висьталісны найӧ асланыс дойяс йылысь Кирӧлы. Кирӧ бура гӧгӧрвоӧ найӧс. Но гӧгӧрвоасны-ӧ Кирӧӧс сылӧн сиктсаясыс, кутас кӧ сійӧ со тадзи жӧ восьсӧн висьтавлыны вӧрын быдмысь пуяслӧн норасьӧм йылысь. Оз-ӧ бара пондыны серавны?

Но ӧтчыд со тадзи Кирӧ паныдасис вӧрысь лэччысь челядькӧд, кодъяс вӧлі кайлӧмаӧсь вотчыны да ӧні тыра пестеръясӧн восьлалігмоз гажа висьтасисны ӧта-мӧдныслы, мый аддзылісны пармаысь.

Но Кирӧкӧд паныдасьӧм бӧрын челядь пыр жӧ сувтыштісны. Верстьӧяссянь найӧ кывлісны, мый Кирӧ ылавлӧма вӧрӧ да тайӧ кадсяньыс сійӧ лоӧма кутшӧмкӧ зэв аслыспӧлӧсӧн. И ӧні нывкаяс да зонкаяс эз тӧдны, пышйыны-ӧ сыысь либӧ водзӧ восьлавны асланыс туйӧд, быттьӧ эз и казявлыны Кирӧӧс.

Но Кирӧ вӧлі тэрыбджык да ачыс шыӧдчис челядь дінӧ:

— Ак кутшӧм уна ті вотӧмныдӧсь! Кутшӧм лышкыд вӧлӧма тіянлы вӧрыс! А кӧсъянныд миян вӧр йылысь мойд кывзыны?

— Кӧсъям, кӧсъям, Кирӧ дядь! — горӧдісны челядь, кодъяслӧн тӧкӧтьӧӧн кытчӧкӧ воши став полӧмыс. И найӧ кутісны восьлавны Кирӧкӧд орччӧн.

И со нин Кирӧ пондіс висьтавлыны челядьлы, мый сыкӧд вӧлі неважӧн вӧрас, кыдзи сійӧ тӧдмасис пуяслӧн олӧмӧн да мый тшӧктісны висьтавны пуясыс йӧзыслы. Кирӧлӧн висьталігмозыс югъялісны синъясыс. Сійӧ то ньӧжмӧдліс да чинтыліс гӧлӧссӧ, то чорзьӧдліс да гораммӧдліс. А челядь вом паськӧдӧмӧн кывзісны Кирӧӧс. Збыль-ӧ, лӧж-ӧ висьтавліс Кирӧ. Збыльысь-ӧ сійӧ тадзи сёрнитіс пуяскӧд, а, гашкӧ, вӧтасис, но татшӧмторсӧ сиктса нывкаяс да зонкаяс некор на эз кывлыны, мед морт вӧлі коз пуӧн, а асьныс пуясыс кужисны сёрнитны-висьтасьны асланыс олӧм йылысь. И та бӧрын эз на ӧтчыдысь Кирӧкӧд паныдасьӧм бӧрын челядь корлыны сійӧс выльысь висьталыштны коркӧя вӧрса мойдсӧ.

Верстьӧяс, дерт жӧ, кывлісны Кирӧлӧн мойдӧм йылысь. Сӧмын бара сералыштісны та вылын. Мед пӧ, колӧкӧ, мойдӧ. Мый сэсся сылысь босьтан. Сэтшӧм кӧ пӧ нин мортыс.

А Кирӧ сӧмын шогпырысь видзӧдлывліс аслас сиктсаяс вылӧ да гӧгӧрвоис, мый весьшӧрӧ налы висьтавны вӧрын пуяслӧн олӧм-вылӧм йылысь челядьлы мойдӧм мойдсӧ. Оз воны верстьӧясыдлӧн сьӧлӧмӧдзыс Кирӧлӧн кывъясыс, кодъяс сэтшӧма йиджисны челядь вежӧрӧ. Ӧд дзик мӧд олӧмӧн олӧны ӧнія верстьӧясыс, Кирӧлӧн ас коддьӧмъясыс. Абу асланыс пӧль-пӧчьясныс кодьӧсь, кодъяс вӧліны и гортаныс, и вӧрын бур кӧзяинъясӧн. Гӧгӧрволісны, мый вӧрыс видзӧ найӧс уна омӧльторйысь, лоӧ и налӧн мыджӧдӧн, да пуктылісны сійӧс Ен пыдди.

Сӧмын бурдӧдӧ Кирӧлысь сьӧлӧмсӧ ӧтитор, мый сиктса верстьӧ войтырлӧн талунъя челядьыс кутісны гӧгӧрвоны сійӧс. Гашкӧ, найӧ мӧдысьджык оз вунӧдны Кирӧлысь вӧрса пуяслӧн олӧм-вылӧм йылысь мойдсӧ да лоасны пармаыслӧн бур ёртъясӧн.