ГӦРД ЛУН


Важӧнкодь нин тайӧ вӧлі, да быд посниторсӧ, гашкӧ, ог нин и помнит, а быттьӧ век жӧ син водзам сійӧ ветлӧм-мунӧмыс. Йӧз серам жӧ эськӧ, да висьтала нин...

Вояс сэсянь колисны. Вермут дозйыс сэки, кыдз помнита, шайт да джын сӧмын вӧлі, а Первомай водзвылын миян удждон сетісны. Совхозсаяс ми. Чукӧртчим удж бӧрын куим друг да ньӧбим сійӧ вермутсӧ, гашкӧ, ноп тыр. А тулыс. Поводдяыс шоныд, лун тӧв пӧльтӧ, быттьӧ шӧпкӧдӧ миян: «Юыштӧй, юыштӧй, пасйӧй тулыс воӧмсӧ». Ми вокӧс ӧд век кодікӧ ышӧдӧ, тшӧтш и татшӧмторйӧ, кор нӧшта и голяыд доналӧма, да сэтчӧ чӧвтыштны колӧ.

Вермут нопнас сэсся берег дорӧ лэччим. Юыс абу на восьса, но йиыс вылын нин, бовгысьӧма. Берег пӧлӧнсӧ кузяла восьса. Татшӧм шоныднас лун-мӧд мысти чашкӧдлас йисӧ, сёрни абу.

Кӧк Вась будка дорӧ и лэччим — матынджык магазинсяньыс. Васьыс шуӧ, восьтам ли мый ли пӧ гожся рестораннымӧс. Будкаас эг пырӧй — мый сэні бензин дукнас лолавны. Ачыс кӧзяиныс пыраліс стӧканла да селёдка лов на аддзӧма.

— Тайӧ, — шуӧ, — кольӧм сезонсяньыс на заптылӧма.

— Этшаджык жӧ эськӧ да, — кывлысьӧ миян коймӧд другным, Илля Виктор. — Бур закускатӧг пӧрам ставным та мында винаӧн да гӧгыльтчам ваас. Со тай сійӧ дзик нин кок уланым солькӧдчӧ.

— Менам будкаас багыр эм, эрдӧдны колӧ. Коді гӧгыльтчас, сійӧн пондам нетшны ӧта-мӧднымӧс.

Моздӧдчим, коді кытчӧ. Газет вылӧ селёдкасӧ вундалім, да сэтчӧ сов дукланьыс пыр жӧ и воис лӧз гут чукӧр. Водз таво палялӧмны.

— Ловзьӧмны этійӧ гадъясыс. Оз тай ков корны, небось, кылас нырыс.

— Митрей Улейыс помӧйсӧ тӧвбыд йӧр бокас улькӧдӧма, да сэтысь кӧ лэччисны-а.

— Дерт, сэтысь. Ноко, ланьтӧдчылӧй, дзодзӧгъяс, буракӧ, кылӧны.

Пошкӧдім пельяснымӧс. Дзодзӧгъяс и кылӧны, а сэсся и кельӧбсӧ аддзим.

— Эк, другъяс, — шуӧ Илля Виктор, — тайӧяс Гӧгрӧс нюрӧ ӧдӧбтӧмны, лэччӧмны нин пуксигвыв. Дерт, сэтчӧ. Ме тӧда, мый ӧні вӧчсьӧ сэні, Гӧгрӧс нюрас. Войдӧр во кыдзкӧ татшӧм жӧ кадӧ слӧйми сэтчӧ ветлыны. Сергей шуринкӧд вӧлім. Кутшӧм пӧтка сӧмын и эз вӧв сэні. Горзӧны-шыалӧны быдӧн ас ногыс, весиг войнас оз чӧвпетлыны, да менам пельӧ сьӧдйис найӧс кывзӧмӧн. Ми нюр шӧрас резинӧвӧй пыжӧ лӧсьӧдчим, вевттьыштім асьнымӧс неуна чальясӧн. Этійӧ ныра куликыс вермис войбыд лэбавны ӧтарӧ-мӧдарӧ нюрсӧ вомӧн да ещӧ на и горзігтыр. Ме весьтті и лэбалӧ. Лыйлі эськӧ, да эг веськав. Вежис лэбалан туйсӧ. Зэв мудер лэбач. Яйыс сылӧн сёйнысӧ зэв сэтшӧм аслыспӧлӧс. Сідз быттьӧ абу дозмӧр яй, но и абу жӧ утка кодь, а шыдтӧ бура вӧчас, дугӧдчыны он вермы.

— Вай висьтав, висьтав, — шуӧ Кӧк Вась. — Быттьӧ ми некор кулик эг лыйлӧй да эг пулӧй сэтысь шыд.

— Ме нинӧм ог шу, мый некор эн видлӧй кулик яйсӧ, но ӧдвакӧ тэныд, Кӧк Вась, аслыд удайтчыліс куликӧс кыйны. Батьыд жӧ кӧ вомад воштыліс-а.

— Тэ тай со тожӧ юр весьтассьыд абу вермӧмыд лыйны. Сійӧ ӧд абу писти — сэтшӧм ӧдйӧ оз лэбав.

— Но вот, сэсся водзвыланым турияс пуксисны. Ветлӧдлӧны-гоннялӧны, кольӧм вося турипувсӧ ӧктӧны. Но ылынӧсьджык, абу лыян метьынӧсь.

— Быттьӧ эськӧ и лыйин? — Васьыс юалӧ.

— А мый эгыс, лыйи эськӧ.

— Юсь да тури оз позь вӧрзьӧдны — вермас аслыд лёктор лоны.

— Педӧр Парась вежаньыдлы висьтав, эн миянлы.

— Вежаньыдлы пӧ висьтав. Вояс сайын, Петраков дядьсӧ ӧд тӧданныд, мастерӧн на уджавліс лесопунктас, юсьӧс вӧлі лыйӧма. Первой гӧтырыс пышйис кутшӧмкӧ роч инженеркӧд, сэсся асьсӧ парализуйтлӧма ли мый, аддзывла да, люги-леги ветлӧдлӧ.

— Юсь пондаыс али мый? Стӧкан пыдӧссӧ мед этшаджык исаліс.

— Ставыс ӧтлаын.

Даръясьыштім мыйтакӧ тувсов шонді водзас, куим-ӧ-нёль доз ректім. Ӧти сулея пыдӧсысь, тыртӧм нин вӧлі, аддзим истӧг тув кузя сьӧд номыр. Путкылясьӧ сэні.

— Ой-ой, вокъяс, — шуӧ Кӧк Вась, — мый нӧ тайӧ татшӧмыс?

— А тайӧ и эм вина гагйыс, — воча сылы шуӧ Илля Виктор. — Менӧ на ӧд гӧтыр век шуӧ, вина гагйыс пӧ тэ и эм... Мыйкӧ менсьым нутрӧӧс песовтіс, аддзи да. Восӧдчыны али мый?

— Коркӧ ӧтчыд аддзылі жӧ татшӧмторсӧ, — ме кывлыси. — Вермут жӧ вӧлі, помнита. Пробкаа на сулеяыс. Видзӧдлім югӧр вылас, зэв-ӧ гудыр, а сэні татшӧм жӧ гагйыс абу ӧти, а куим. Юим жӧ тай, некодӧс эз восӧд.

Илля Виктор муніс будка саяс восны. Ми кылам, кыдзи ыксӧдӧ сійӧс: «Ыр-р-р, ыр-р-р!» Петіс сэсся. Чужӧмыс вазьӧма ньылӧмсьыс, синваыс шорӧн киссьӧ. Коньӧрӧй да мортӧй.

— Абу нин коньӧр ӧні. Вайӧ ещӧ доз восьтӧй, мед лоас бурджык. Став вермутыс бӧр петіс, эз вевъяв вирам сӧдзны.

Нӧшта дозсӧ кыпӧдлім шонділаньыс, но нинӧм оз тыдав, сэтшӧм пемыдгӧрд вӧснаыс.

— Ме кывлі, — шуӧ Кӧк Вась, — тайӧ вермутсӧ пӧ миянлысь Америкаӧ зэв уна нуӧны. Садъяссӧ пӧ сэні койӧны вредительясысь.

— Вермас лоны, — ме шуи. — Сӧмын тӧлкыс кутшӧм? Первойсӧ, гашкӧ, и таркавласны, а сэсся велаласны вермут дорас да ещӧысь койӧмсӧ пондасны виччысьны.

Сьӧд номыра сулеясӧ шыбитім дор ваас, пондіс кылавны гоньнас вылын, а сэсся визӧбыс пыртіс сулеясӧ бовгысьӧм йи горулас.

— Дзодзӧгъясыс век на дум вылам, — шуӧ Виктор. — Ме со мый думышті, вокъяс. Водзын миян куим прӧст лун. Вайӧ ветламӧй Гӧгрӧс нюрас дзодзӧг лыйны. Этійӧ дзоля тракторсӧ босьтамӧй, кодлӧн тай кӧрт кузолыс водзвылас. Вадшор туйыс эськӧ и вывті лёк, но тракторыд мунас, ог сибдӧй. Ме ӧні жӧ и кайла гаражӧ да лэчча тракторнас нин, а ті чукӧртӧй мыйсюрӧ куим лун кежлӧ да вермутсӧ ещӧ босьтӧй. Тані тай со мыйтакӧ эм на.

Шуӧма — вӧчӧма. Ме чукӧрті ташкаӧ сёян-юантор да патрон мыйтакӧ. Гӧтыр эз вӧв гортын, а челядь школаынӧсь на, да гижӧд коли, мед ог вош. Муні Кӧк Васьӧ. Викторыс сэтчӧ кӧсйис локны тракторнас. Васьлӧн гӧтырыс, Юляыс, гортас.

— Но ветлӧй, ветлӧй, — шуӧ. — Воштысьлӧй кӧть праздник кежлас, этшаджык вина юысь. Ті помысь эськӧ прӧмысыс код тӧдас да... Быттьӧ и вина он босьтӧй сьӧрсьыныд? Ноко, коль сьӧмсӧ, — шуӧ верӧсыслы. — Талун тай тіян сетӧмаӧсь.

— Быдтор и кывлан, висьталысьыс эм и.

— Синмыд тай гудыр нин, дзодзӧг лыйысь. Вевъялӧмныд нин, куим друг, голяястӧ полёвтны. Ок эськӧ тіянӧс...

Викторӧс дыр виччысьны эз и ков — гурк воис ӧшинь улӧ. Вывсянь тыдалӧ — турунтор сӧвтыштӧма кузолас, мед миян небыдджык вӧлі пукавны ли куйлыны. Пырис. Юля китшкӧдӧ миянӧс:

— Гожӧм улӧ да, вывті уна кӧть эн жӧ лыйӧ дзодзӧг-уткасӧ. Сідз жӧ тшыксяс, да понлы ни порсьлы.

— Пиньтӧ эн кеслы, — шуӧ Васьыс, — а кушӧн ог воӧй, эн пов. Ружьеяс миян ставнымлӧн двустволка, майбыр, мед локны пондас-а.

Петкӧдлім олас-выласнымӧс, сӧвтысим да вӧрзим. Руль саяс ачыс Илля Виктор. Тракторыс тайӧ абу сылӧн эськӧ да. Сійӧ гусеничнӧй вылын уджалӧ, но мед нуӧдас. Магазин дорас сувтлім жӧ да содтім вермут запаснымӧс. Мед нин, шуам, тырмас, кынмам ли мый ли. Сиктыс саяліс, да пыр жӧ и сувтлім даръясьны. Виктор ми дорӧ кавшасис кузолас.

— Мӧдысь кежлӧ, — шуим, — тэ эн и сувтӧдлы трактортӧ. Кабинаад мыччам ӧшиньӧдыс. Быд стопка юны кӧ пондам сувтлыны, некор ог воӧй Гӧгрӧс нюрӧдзыс.

— Меным нӧ мый — ог кӧ и ог. Тані тіян, дерт, лӧсьыд мунны чӧскыд дука турун пӧвстас. Тяпнитанныд сьӧд номыра вермутсӧ да сӧмын нимкодясянныд ловзьысь вӧр-ванас.

Сідз кӧ сёрнитны, вывті нимкодясьнысӧ нинӧм вылӧ на. Туй бокас, ӧтарас и мӧдарас, кыддза-козъя вӧр сулалӧ. Кыддзыс дзик на пасьтӧм. Уна шоныд лун на ковмас, мед поткӧдас-писькӧдас гарсӧ ловзьысь корйыс. Сэсся ӧд миян тані сэтшӧм на тулысъясыс: талун лун тӧв, а аски пӧльыштас кӧдзыд саридзсяньыс да майсӧ помся сідз лоас, бур тулыссӧ тӧлысь помӧдзыс эн и виччысь. Ва воссьӧм бӧрын век войтӧвтлас. Тайӧ быттьӧ закон миян войвывса природа-мамыслӧн. Дерт, кӧнкӧ туй бокас лэбачьяс шыалӧны, но кылан ӧмӧй найӧс тракторӧн мунігӧн?

Шоныд кӧть-а, рытгорув нин да ыркаммис сынӧдыс. Васькӧд ми пасьясным вылӧ тупыльтчим, а Викторлы юрас жӧвгис, да гу ни гӧп эз понды синйыны. Дзоляник тракторыс чеччавны пондіс ай кӧзапи моз, да тшӧтш и миян сэсся пукавны ни куйлыны. Сійӧ и видзӧд, мед оз шыбит кузовсьыс. Туйӧдыс таті ӧні оз ветлыны, да эндӧдӧмаӧсь, оз шыльӧдлыны. Сувтлыны тшӧктім Викторлы. Сувтіс, кайис миян дорӧ.

— Тэ нӧ мый? — шуам, — синтӧг али мый тракторсӧ нуӧдан? Гӧпъяссӧ ни ӧти он видзӧд. Чайтан, некымын турун сіыд тэнад кык пӧвста гӧн перина али мый? Сэсся ог кисьтӧй тэныд.

Вермут дозъяссӧ нопсьыс ковмис ректыны, мед оз жугласьны сэні ӧтлаыннас. Быттьӧ кагаясӧс, ӧкуратнӧя дорсьӧдім небыд турун вылас, да мед эз тшукны ӧта-мӧдланьыс. Синнымӧс моз видзам.

— Он кӧ кисьтӧй, — шуӧ Виктор, — ме верма и дзикӧдз унмовсьны руль саяс. Но либӧ тэ, Кӧк Вась, пуксьыв кабинаас, а ме тані мунышта.

— Менам правоыс абу, кольӧм во на босьтлісны.

— Тӧдам, мый босьтлісны, но тані нӧ коді тэнсьыд кутас правотӧ юавны? Вӧрса кузь кокаыс али мый сувтӧдас?

— Вежлы, вежлы, Васьӧ, — ме шуи. — Викторыс, гашкӧ, и збыльысь унмовсян выйын. Лэччӧдас кытчӧкӧ туй бокас ва гуранӧ, дай тысь корсь.

— Но пуксьыла инӧ. Сӧмын меным кык пай кисьтӧй ӧтпырӧн. Ог сувтлы сэсся нюр туяс кежанінӧдз.

Туй вожӧдзыс бура мунім, а кыдз кежим, тракторыс пондіс кодавны. Первой ӧтар туй бокас шыбитчылас, сэсся мӧдарас. Медбӧрын зурасис зэв кыз пожӧмӧ. Ми Викторкӧд пуксаинаным юзӧн мунім водз бортӧдзыс. Дозъясным тожӧ исковтісны, коді гӧгыльтчис водзлань. Жугаліс ӧти. Илля Викторлӧн матькӧмыс. Тракторыс чих-пых и кусіс. Виктор чеччыштіс кузовсьыс, восьтіс кабинасӧ да лёкысь нетшыштіс сэтысь Кӧк Васьӧс. Мӧдыс эз куж видзчысьны да шнёпкысис кына-няйта туй вылас.

— Ой-ой, — шуӧ, — ордлыӧй чегис. Он вермы али мый ӧкуратнӧяджык, нюзьвыв сир. Быттьӧ ме мыжа, мый тані пожӧм быдмӧма.

Виктор ачыс кайис кабинаас да видліс лэдзны двигательсӧ, но нинӧм эз артмы. Аккумуляторыс пуксьӧма.

— Воимӧй, вокъяс, — шуис лэччигмозыс. — Тані и ковмас узьны. Вӧрыс тай со лӧсьыд зэв, пожӧма яг выв. Пескыс тані тожӧ мыйта колӧ. Сёян-юан эм — яг выв пир восьтылам...

Сэсся ставӧн разӧдчим, коді кытчӧ, пес корсьны. Кос мыръяс, кодъяс шедӧны вӧлі вужлянас, кыскалім туй бокас, вӧсньыдджык пожӧм кондаяссӧ, коркӧ пӧрлӧм кос пожӧм увъяссӧ. Ставсӧ, мый позьӧ сотны. Бипур ӧзтім, да матӧ оз лэдз, сэтшӧм жара сотчӧны вужляясыс. Сэтчӧ жӧ тӧвсӧ тані бергӧдлӧ, ӧтарсянь и мӧдарсянь пӧльыштлас, да он тӧд, кодар бокӧ и лӧсьӧдчыны би дорас.

— Пессӧ вывті уна ӧтпырӧн сетім биыслы, оз ков сэсся содтыны, мед усьпаньвыв пуксяс, — шуи другъяслы. — Со татчӧ тай озджык бисӧ пӧльыштлыв да позьӧ моздӧдчывны.

Лым сылӧм бӧрас ялаыс абу на косьмӧма, да пожӧм чальяс керавлім улысаным. На вылӧ пасьяснымӧс павкнитім. Чайник пуктім бипур бокас. Шуим, оз ков ӧшӧдны, ачыс пузяс татшӧм жарас. Васӧ корсьӧмыс на ӧд вӧлі — Кӧк Вась быдса час ветлӧдліс. Вошӧмӧн нин чайтім да тӧкӧтьӧ корсьны эг зырӧдӧй. Гажа юрыд код тӧдас кытчӧ вермас шеновтны. Воис жӧ тай. Кодӧс бӧръя ёльсӧ вуджим локтігӧнным, сэтчӧдз ветлӧма.

— Тэнӧ смертьла сӧмын мӧдӧдны, — шуӧ Виктор.

— Мӧдысьсӧ тэ ветлан. Видзӧдлам, дыр-ӧ шӧйтны пондан тыртӧм чайникнад яг вывтіыс.

— Мӧдар бокыс увтасінджык, да сэні, гашкӧ, эз на косьмыны лым сылан ва гӧпъясыс. Ме кӧ, быттьӧ, сэтчань сетчылі эськӧ первой.

Регыдӧн и шутёвтіс чайникнымлӧн сьӧд сюр нырыс.

— Заварит, — шуи Васьлы. — Тэнад, гашкӧ, индийскӧй чайыд, гӧтырыд орсын да?

— Дерт, индийскӧй. Тэнад тай доярка да, тӧдӧмысь, нӧк банка судзӧдан мешӧксьыд.

— Эм менам нӧк банкаыс, но магазинысь ньӧбӧмтор. Сы мында он гӧгӧрво кӧк юрнад, мый нӧксӧ йӧв заводын вӧчӧны.

Ме пыралі нопъям нӧкйысла.

— Со, Василей, муса зон, тюпав колӧкӧ.

— Лышкыд тэнад гӧтырыд. А, гашкӧ, мед сійӧ дум вылад век вӧлі да сы вӧсна? Но бур, дорсьӧдӧй кружкаястӧ — юны пондам. Пасъямӧй аскися гӧрд лунсӧ. Йӧзыс культурнӧя пызан сайын пукаласны, а миянлы ковмас лунтыр тракторнымӧс пыклавны кыр бӧр. Кыдз сэсся заведитан? Сӧмын буксирӧн.

— Кыр бӧртӧ эськӧ пыка нин, но ӧд сійӧ кыр паныдтӧг оз овлы. Думыштлӧй, другъяс, кутшӧм катарга аски миянӧс виччысьӧ.

— А вайӧ вунӧдламӧй та йылысь, асылыс ӧд мыйкӧ петкӧдлас.

Бипур жарыс да тшыныс кытчӧ озджык лок, сэтчӧ и дорсьӧдчим ӧта-мӧд дораным да сідзжӧ и кружкаяснымӧс вермутнас дорсьӧдлім. Юим.

— А и бур, сідз кӧ нин сёрнитны, — шуӧ Виктор. — Гӧг дорӧс тай ӧзтіс нин-а.

— Тэнсьыд мыйлакӧ оз йӧз моз и сотышт первой. Гӧг дорӧс пӧ. Сідзкӧ, язва эм кӧнкӧ сювъясад.

— Лешакыс тӧдӧ, мый сэні эм. Дерт, кыті вӧсни, сэтчӧ первой и зырӧдас винаыс, кыті вирӧдзыс матынджык. Тайӧс весиг пӧрысь мамӧй менам тӧдӧ. Ассьыс лекарствосӧ, турунӧн сулӧдӧм водкасӧ, ньылыштас паньнас да шуас: ӧні сьӧлӧм вуж дінӧс ӧзтас, сэні менам вӧснииныс.

— А кутшӧм турун нӧ заваритас водкаас? — ме юалі.

— Быдкутшӧмӧс. Разнӧй висьӧмъясысь тай шуӧ-а. Томан сайын видзӧ лекарствосӧ, сундукын. Меысь думсьыс дзебӧ, а томансӧ эськӧ сотка кӧрт тувйӧн восьта и пӧдлала. Турун сора водка дозъяссӧ ме эг вӧрзьӧдлы, но сэні сылӧн запасын век эм водкаыс. Чиныштас лекарствоыс, бара водкасӧ содтыштас. Сэсся сэні сылӧн куим спирт доз на эм, ставыс сургуча. Код тӧдас, корсянь нин видзӧ. Ме нин ог помнит-а, кор татшӧмъяссӧ вузавлісны. Кулігкежлас, тӧдӧмысь, заптӧма. Дзебсян паськӧм улас став дозйыс, быдӧнӧс торйӧн рот пытшкӧ тупыльтӧма. Казялі кыдзи? Коркӧ ӧтчыд резина сапӧгӧ дӧмас клейті да лички клейтӧм сапӧгсӧ сундукнас. Кор кыпӧдлі сійӧс, кылі — сундукас мыйкӧ сольксьӧ, булькакылӧ. Сэки жӧ и восьтылі кӧрт тувйӧн видзӧдлігмоз, мый сэні сэтшӧмыс. Спирт дозсӧ дыр куті киам, крепыда думӧ усьлі, босьтны абу. Эг лысьт, другӧ, эг лысьт сибӧдчыны. Мамлӧн слаб сьӧлӧмыс, да пола. Казялас да мед кӧть оз жӧ письты вӧснииныс, кыдзи ачыс висьталӧ.

— Ме тай сибӧдчи, — шуӧ Кӧк Вась, — гӧтырлысь дзебӧм дозсӧ аддзи да. Но ме кӧть, шуам, нырӧн-могӧн корсьыси, юрӧс вӧлі вывті нин ёна чашкӧдлӧ да. Аддзи диван горув кудсьыс. Юи, дерт. Юны юи-а, гӧтыр кӧ казялас, тшын пыр лэдзас. Колӧ аслым висьтавны первойӧн, сэки, гашкӧ, бушколыс боктіджык мунас. Коркӧ лӧсьӧдчим узьны. Ме и шуи, мися, Юля, тэнад дзеблӧм дозйыд менсьым сьӧлӧмӧс спаситіс.

«Юин али мый?» — шуӧ. Сэсся кыдз тай пондіс юрсиӧд нетшкыны.

«Энлы, энлы, — шуа, — кывзы менӧ. Эг кӧ аддзы сэки, ӧні эськӧ тэкӧд орччӧн эг куйлы. Тӧдан-ӧ, мый ме сэки корся вӧлі? Ӧшӧдчан гез. Сэтшӧма висьӧдіс, мый овнысӧ эз вӧв окота. Кыпӧдлі дивансӧ, кӧні тай тэнад бечӧв тупльӧдыс. Сэтысь и аддзи. Збыльысь ӧд, Юля, ӧшӧдчан выйӧдз волі».

«Но и алкоголик, — шуӧ. — Мед нин эськӧ ӧшӧдчин и эм...»

Чайникным рекмис, да ӧні кодлыкӧ ковмас вала ветлыны.

— Ме ветлі нин ӧтчыд, — шуӧ Кӧк Вась. — Сэсся ті кодныдкӧ.

— Но и мый, ветлін кӧ? Ачыд вӧзйысин. Пудъясямӧй, кодлы ветлыны.

Виктор перйис куим истӧг тув, джынъяліс ӧтисӧ. Ноко, шуӧ, вокъяс — да меным мыччӧ первойӧн. Сё морӧ, чегӧм тувйыс меным локтіс. Мед саймовтны кытчӧкӧ, чайникнас мӧдӧдчигӧн другъясысь гусьӧн куим вермут доз босьті. Тайӧяс кольны оз кужны, а асывнас нёрпавны пондасны. Зэв ӧмӧй бур татшӧм юанторйыд. Воськовті ӧдӧбӧн яг вывтіыс. Муна и муна, ягыслӧн помыс некӧн на оз тыдав. Быттьӧ тай увлань жӧ эськӧ лэчча да. Юрӧс на сэсся лёк вермутыс йӧйтӧдлӧ, да эз жӧ кӧть ков воштысьны. Яла горулыс абу на косьмӧма, муннысӧ ладтӧм — нильӧг кок улад, ислӧдлӧ. Неыджыд гуранъяс воласны, но васӧ сэтысь юӧма нин муыс, косьмӧма ли. Водз таво яг вывсьыс васӧ кыскис. Водзынджык тыдовтчис жӧ тай сэсся козъя-кыддза вӧр визь. Буракӧ, ёль лэччӧ нюрсьыс. Матыстчи. Ёльыс ыджыд на. Кевны кӧ быттьӧ, он на и во некыті, а васӧ кӧть ведраӧн гумлав. Та ылнаӧ локті да ӧти чайник сӧмын верма нуны. Куритчыны пукси пӧрӧм конда вылӧ. Локтігкості рӧмдыштіс, да пемыдлӧз енэжас кодзувсӧ содз тырнас сявкнитіс локтысь войыс. Кок улын ёльыс шумитӧ-ызгӧ. Эм на, сідзкӧ, нюрас ваыс, эм на кытчӧ шыбитчывны локтысь дзодзӧг-уткаыслы.

Ёль ызгӧм шы улас сёрни понді кывны. Думайта, вермутыс юрсьым петны пондіс, да мутияссӧ али мый кыла. Бергӧдчи да гежӧдіника быдмысь пожӧмъяс косттіыс аддзи вуджӧръяс. Кыкӧн лэччӧны ёль кузяыс. Гӧгрӧс нюрысь, дерт, лэччӧны. Гӧлӧсъясыс тӧдсаӧсь, а кодъяс, ог куж вежӧртны. Ме ёльланьыс воськовті да дзебси коз улӧ. Со матынӧсь нин. Пиля Ёгор тай ӧтиыс, а мӧдыс свӧякыс, Аврамов. Кор воисны ме весьтӧдз, мурӧсті ош моз кыз гӧлӧсӧн.

— Ёгор, ошкыс.

— Кыла. Йӧткы пуляа патронъяссӧ.

Кыкнанныс тэрмасьӧмӧн чегисны ружьеяссӧ, пуляӧн зарадитісны. Пезьгӧдасны ӧд, думышті, ковмас усйысьны татысь. Зэв чӧла, рутш ни ратш, вешйи ёль бокӧдыс, вывлань кайышті да лои на мышкын.

— Эй! — горӧді. — Дзодзӧгыс эз сюр али мый, ош яй вылӧ дульныд сӧдзӧма. Эн кӧть лыйӧ ош пыдди.

— Сё сюра лешакыд, со тай коді мурзӧма, миянӧс повзьӧдлӧ. Лыйим кӧ? Повзьӧм йӧзыдлысь он на и юав уна. Оз позь тадзи шмонитны пищаля войтыркӧд. Свӧяк аддзӧма, кыдзи коз увсьыс петін, да бур мый осечкааліс ружьеыс.

— Збыль али мый?

— Збыль но, — шуӧ Аврамовыс. — Рӧмыд да код тӧдас, морт ли, ош ли сэні вуджрасьӧ. Тэ на ӧд сэсся лажыньтчӧмӧн мунін, эн и морт моз весиг. Сэсся мурзан йӧй моз. Шуда на вӧлӧмыд, эз пезьды.

— Шыбит ружьетӧ ёляс, мый сыысь тӧлкыс.

— Ог, ог. Коркӧ тай сэсся пезьдылӧ жӧ унаысь клётшнитлӧм бӧрын.

— А мый, нюрас эм-ӧ кутшӧмкӧ лад? Кӧсйим жӧ кайлыны да...

— Сёрминныд, другӧ. Нюр тырыс ва, он вермы келавны. Дзодзӧг-уткаыс ставыс шӧрас пуксьӧ, видлы судзӧдны. Первой кык лунсӧ ми келалім на, шедіс миян пай вылӧ, а сэсся нюр дорас пукавлім сайӧдын, сьӧвзим дай мӧдім. Резина пыж колӧ.

— Пыж миян, дерт, эз вӧв, сідзкӧ, и нюрас мунӧмсьыс тӧлкыс абу.

Матыстчи другъяс дорӧ да сувті неылӧ. Найӧ менӧ оз аддзыны — бура нин пемдіс. Меным би югӧр улас зэв мичаа тыдалӧны. Варовитӧны гажаа, вина гагйыс кыв вужъяныс пырӧдчӧма да. Кӧк Вась шуӧ, вошис пӧ ёртным чайникнас, вай кисьт ещӧ. Гашкӧ, и войбыд пондас шӧйтны.

— Метӧг али мый кӧсъянныд? — горӧді пемыдсяньыс.

Шай-паймунісны да бергӧдчисны мелань.

— Воин, шатун ош? Вай татчӧ чайниксӧ.

Бара сэсся чаюйтім да даръясим. Винаыс ёна оз гажмӧд, а юрыд быттьӧ век неуна кольмӧма. Виктор висьтасьӧ кольӧм вося утка лыйӧмсӧ, кыдзи Педӧр Сандыркӧд Пузлаті кылӧдчӧмны резина пыжӧн.

— Пӧльтім пыжнымӧс да югыдыслы воча и вӧрзим. Мозын вылас йи на, да уткаыс посни юясас локтӧ. Кывтам. Кӧдзыд, кынмим, но миян водка вӧлі да, шуам, вай шонтысям. Сандыр кисьтіс водкасӧ кружкаӧ. Нянь да порсь тшӧг вундыліс да сатшнитіс пуртсӧ пыж бокас. Чайтӧма, мый пу пыжӧн кывтам. Эг и тӧдлӧй, кыдз ваын лоим. Эз вӧв йир, коскӧдз сӧмын, да воштысим берегас. Пыжсӧ кыским и. Быдторйыс овлӧ.

— Войдӧр тулысӧ, — висьталӧ Вась, — Коль братанкӧд Бадь юын кыйсим кулӧмъясӧн. Ойдас, да местаясыс сэні паськыдӧсь. Чӧжыс сьӧд кымӧрӧн локтӧ. Сы мындасӧ ӧти чукӧрсьыс ме эг на аддзыв, да дивӧ босьтіс. Коль вок шуӧ, со пӧ кӧні яйыс лэбалӧ, да он на босьт. Дерт, мыйтакӧ лыйим жӧ. Мӧдӧдчан асылас нин петалім водзнас, дасӧс лыйим. Коль пукалӧ пыж шӧрас, а уткаясыс нырланьыс. Ме мотор дорын. Видзӧда — ӧти горда борднас кутіс швачӧдны, кыпӧдчыны дась. «Кольӧ, лый, лэбзяс», — горӧді. Сійӧ дыр думайттӧг пезьгӧдіс чӧж чукӧрас да ещӧ на и кыкнан стволсьыс. Ӧти йӧй горӧдас, мӧд йӧй пезьгӧдас. Ваыс пыжас пондіс зӧм кайны. Берегӧдзыс кӧть воӧдчыны колӧ, а розьыс кулак тӧрмӧн. «Тупкы, тупкы мыйӧнкӧ», — горза. Сійӧ жӧ горданас сэсся и тупкис, йӧткис юрнас увлань. Воим. Лун джын сэсся пыжсӧ дӧмим.

— Но, вокъяс, со ещӧ ӧти доз кольӧма. Юам да шойччыштамӧй югыдӧдзыс, аски сьӧкыд лун виччысьӧ миянӧс.

— Ме би дорас узя, — шуӧ Вась, — а ті колӧкӧ кузолас кайӧ, турун вылас.

Сійӧ шыбитіс биас медыджыд вужлясӧ, мед пӧ войбыд сотчӧ, чукӧртіс став лыс-чальсӧ улысас, пӧрччис кузь чӧръя сапӧгъяссӧ да бипур дорас пуктіс косьтыны.

«Эг и велавлы, — шуӧ, — сапӧгӧн узьны».

Ми Викторкӧд кузолас кавшасим. Шоныд на эськӧ войыс, но асъядорсӧ, тӧдӧмысь, ёна ыркыд лоас. Со тай кутшӧм кодзула енэжыс. Но мед, пасьяс миян эмӧсь, шебрасям. Виктор на шуліс, вай пӧ кок уланым тожӧ бипур вӧчам дзоляникӧс, гаж пыдди кӧть. Ог, мися, турунас кутчысяс, да асьным чишкасям.

Турун пиас шебрасим Викторкӧд пасьяснаным да зэв на и чӧскыда эськӧ унмовсьлім. Содтӧд на первойсӧ вермутыс вӧлі личкӧ, кор юрыд нӧш кодь. Садьми эг сы вӧсна, мый унмӧй паляліс, а кынми. Асъя кӧдзыдыс пырӧдчӧма кӧрт кузолас да мышнымӧс увсяньыс пондіс сотны. Ме пукси. Видзӧда вывсянь — Кӧк Вась тожӧ нин оз узь. Чаль босьтӧма да бипур местаас мыйкӧ гудйысьӧ. Бурджыка видзӧдлі: вӧлӧмкӧ, сотчӧм сапӧг гозсьыс каблукъяссӧ лӧсьӧдалӧ, мед ырзясны да оз-ӧ кӧть кутшӧмкӧ битор артмы.

— Эй! — горӧді. — Тэ мый сэні вӧчан?

— Каблукъяссӧ жарита, а сапӧг пӧвсӧ биыс нямӧма, ад горшыд.

Лэччим Викторкӧд Вась дорӧ. Сійӧс быттьӧ трасича висьӧм босьтӧма. Кынмӧмсьыс ли, вермутсьыс ли, но, тӧдӧмысь, кыкнансьыс ӧтлаын. Ми асьным эськӧ эг жӧ вӧлӧй бурджыкӧсь да... Васьӧс на содтӧд тайӧ ускӧттьӧыс суис — сапӧг пӧвсӧ биыслы вердӧма. Корсьлӧй, шуӧ, гашкӧ, кабинаас кутшӧмкӧ сутуга эм. Сутугаыс эз вӧв, а изолента аддзим да сійӧн и домаліс нямӧдсӧ.

— Но и мый кутан вӧчны? — юалі ме.

— Первой мунӧ ветлӧй песла, — шуӧ Кӧк Вась. — Сывдысьны колӧ. О-о, а юрӧй менам. Кыдз лёк ногджык вӧрзя, сідз быттьӧ и солькъялӧ юр вемӧй. Дзикӧдз кизьӧрмӧма.

— Дерт, вермутнас кизьӧртін да.

Бипур лоис, да сэсся, гашкӧ, ловзям. Чайыс на вӧлӧма, да пымтім. Кор ме вайи тӧрыт дзеблӧм куим дозсӧ, Кӧк Вась куимысь чеччыштіс бипур вомӧныс.

— Чеччав, чеччав, — шуӧ Виктор. — Видзӧдлам, кыдз няйтӧдыс пондан чеччавны трактор дорас. Вайӧ тэрмасямӧй. Сылас няйтыс, да сё пӧв сьӧкыд лоас.

Ме видзӧдлі трактор вылас. Зургӧма нырсӧ пожӧмланьыс, быттьӧ лёкӧдчӧм дув ӧш. Татысянь вӧрзьынысӧ эськӧ кыр бӧр, сӧмын заднас водзын ковмас. Водзнас кӧть заднас — ӧткодь, мед сӧмын заведитчас. Колӧ на ӧд кыдзкӧ места вывсьыс вӧрзьӧдны.

Кӧк Васьлы лада лои сьӧлӧм вылас да сідзи и триннялӧ яла вывтіыс нямӧда кокнас, кос чаль корсьӧ биас шыбитны. Ме Викторлы шуи:

— Таті кӧ кырйӧдыс оз босьт двигательыс, мый эськӧ пондам вӧчны?

— Мый пондам... Тракторла мунам.

Сідз эськӧ и лоис да, но заведитчыліс тракторыс, туй джынсӧ мунім сьылігтыр. Мед и эз шед миян некутшӧм дзодзӧг да утка, а век жӧ воам гортаным праздник шӧрас, да оз ӧмӧй мыйкӧ кисьтыштны? Вась шуӧ, гӧтырлӧн пӧ важӧн нин запаситӧма май кежлас. Сӧмын оз гортын видз, а Микаль Дуньын.

Ме тӧда. Аддзылі сумканас пырӧмсӧ.

— Оз лысьт гортас вайны. Дерт, юан да. Алкаш.

— А тэ нӧ коді? — скӧрмӧ Вась. — Видзӧда да, румкаястӧ тай он жӧ пеляд новлы. Меысь на, гашкӧ, и унджык сакан. Винасӧ травитлан сӧмын. Сетін кӧ ассьыд пайтӧ миянлы Викторкӧд, кӧть гажъялыштім-а. Тэныд ни миян артмис. Но тэ молодеч — куим дозсӧ сяммӧмыд дзеблыны. Ошка, ошка. Не кӧ сійӧ, век на эськӧ кулан выйын вӧлі. Но мед. Воам да миянӧ и пыралам веськыда. Меным ӧтнамлы дозсӧ, гашкӧ, оз восьт, а тікӧд... Ог тӧд эськӧ да. Видзӧдлам.

Мунім, мунім, да тракторнымӧс друг несйӧдлыны пондіс. «Чих-пых» — и лэдзис ловсӧ сьӧд тшынӧн.

— Воим! — Виктор мыччис кабинасяньыс гӧна юрсӧ. — Мый пукаланныд? Лэччӧй. Ог тӧд, мыйла лэдзис ловсӧ. Ӧні сэсся ог нин вермӧй заведитнысӧ...

— Да-а, — шуӧ Вась. — Сідз и тадз ковмас тракторла ветлыны. Ме, дерт, кольччысь лоа, дзодзӧг тыра нопъястӧ кута стӧрӧжитны.

— Тэ прав колин, сапӧг гозтӧ сотін да. Туйыс на кын — верман и тэ ветлыны. Кокад куш сӧмын нямӧд, да кокни лоас восьлавнытӧ.

— Тіянлы, гашкӧ, и теш, а сапӧгсӧ сотӧмысь гӧтыр менӧ Петыр лунӧдз пондас пилитны. Но мед. Кузь чӧръяыс менам ещӧ на эм. Кӧмавлытӧм. Тэ, Виктор, кутшӧмкӧ сапӧг гортсьыд кватит. Гӧтырлысь эн кор — гортӧ оз лэдз. Ог кӧ висьтав, гашкӧ, оз и кватитчы регыдӧн. Но, мунӧй, мунӧй, эн сёйӧй Гӧрд вой-лунсӧ. Окота на праздниксӧ сиктын суны.

Ми Викторкӧд воськовтім сиктлань. Кын вывтіыс абу сьӧкыд муннысӧ, да ӧдӧбӧн на и восьлалім. Со и сиктӧ нин воим. Быдлаӧ лозунгъяс ӧшлӧмны. Миян рӧдимӧй магазин стенын ӧшалӧ: «Да здравствует КПСС — оплот мира и спокойствия на планете». Ачыс магазиныс пӧдса на, водзджык на кадыс, а гашкӧ, талун оз и восьтны, праздник лунад...

Воим совхоз гаражӧдз. Шуим стӧрӧжыслы, босьтлам, мися, гусеничнӧйсӧ, трактор колӧ кыскыны. Сӧмын чӧв ов.

«Ме пайысь, — шуӧ, — абу ӧд чужӧй войтыр».

Бӧр мунігӧн Виктор пыраліс гортас сапӧг гозла.

— Мый нин гӧтырыд шуис? — юалі.

— Выльӧн на ломтысьӧма. Сувтӧдіс ме вылӧ синсӧ. Ноко, шуӧ, кушты дзодзӧгтӧ, пуны кута. «Миян, — шуи, — жугаліс тракторным, ковмис мӧдла волыны. Кыскыны колӧ». «Ті, — шуӧ, — сулея увтӧдны сӧмын верманныд. Быттьӧ ӧні менсьым он и кор румка-мӧд? Юрыд, кӧнкӧ, висьӧ коньӧрлӧн. На, на, кисьта праздник кузяыс.

Кисьтіс сё грамм водка.

— Тэныд кокниджык. Но ладнӧ. Вӧрзям.

Мунім, мунім, эгджык воӧй Кӧк Вась дорӧдз, дай асланым тракторным кусі. Кватитчим, а бакас соляркаыс войт абу кольӧма.

— Эг ӧд и сяммӧй видзӧдлыны. Мый кутам вӧчны? Гашкӧ, омлявны заводитлам татшӧм олӧмсьыс?

— Омлявны кӧ и омлявны, — шуӧ Вась. — Давай.

Первой сійӧ заводитіс, да зэв на и бура сылӧн артмӧ, дзик кыр понлӧн моз, кодлы важӧн нин абу вичмылӧма. Сэсся тшӧтш заводитім кык гӧлӧсӧн. Миянлысь эськӧ серам пычкӧ ас выланым, но серавны и омлявны ӧттшӧтш он вермы. Дугӧдчим сэсся. Ме видзӧдлі кабина ӧшиньӧдыс, а трактор дорас Кӧк Вась сулалӧ. Юрсӧ доровтӧма, вомыс кальк. Миянӧс кывзӧ.

— Мый нӧ, Васьӧ? — юалі.

Нинӧм эз шу, а пондіс клопӧдны. Сэсся тай кывлысис жӧ:

— Ме виччыся, весиг воча веськӧдчи нямӧда кокнам, а найӧ тані кӧин концерт петкӧдлӧны. Мися, йӧймӧмны кӧ-а.

— Кыдз тэ посттӧ эновтін — сэні жӧ квайт ствол, боеприпасъяс? Да ещӧ на и техника. Миян солярканым бырис.

— Но и мый? Сэтысь тракторсьыс колӧ вайны.

— А ведраыс?

Збыльысь ӧд, мыйӧн на сэтысь вайны соляркасӧ?

— А мый, вокъяс, — шуи. — Инструмент эм, разям сэтысь баксӧ дай кыскам артельӧн татчӧ. Зэв ӧмӧй сьӧкыд?

— Вермам кӧ-а, — шуӧ Виктор. — Да, да, тадзи и вӧчам. Юр вемтӧ абу на кизьӧртӧма вермутыс.

Баксӧ эськӧ регыдӧн разим, но сійӧс кыскӧмыс кутшӧм вӧлі. Кокниджык вӧлӧма сиктас ведрала ветлыны. Но мый лоӧма нин — лоӧма. Медбӧръя вынъяс колисны, мед кыпӧдны баксӧ да кисьтны соляркасӧ мӧдас. Но первой бура куритчим, пуксьылӧмӧн. Быдӧн вӧзйӧ, кыдзи кокниджыка вӧчны. Кӧк Вась шуӧ, кокниасӧ пӧ оз шед, но трактор задас ковмас думыштлыны кутшӧмкӧ вывтасін йылысь, мед ставлы сэтчӧ сувтны позис.

— Нинӧм татысь оз сюр, — Виктор шуӧ. — Кӧк Вась кокын сапӧгыс важ, розя, шыбитлі нин чуланӧ. Абу нин видзантор — позьӧ и дуксьӧдны. Сапӧг пӧвнас и заправитам тракторнымӧс. Сідз али абу?

— Дельнӧ эськӧ да, — шуӧ Вась, — но менам ӧд кок пӧлӧ дуксяс...

Зэв кокниа заправитчим. Виктор сэсся ӧтнас и ветліс ассьыным тракторсӧ буксир вылӧ босьтны да со локтӧ нин кылӧ.

Сиктӧ вотӧдз аддзим — восьса берег дорас жыдач пӧв уялӧ. Виктор лэччыліс да лыйис. Тайӧ и став прӧмысным лои.

— Тайӧс Кӧк Васьлы сета. Сы ордӧ кӧ мунам, Юляыслы оз-ӧ ладнӧджык ло сьӧлӧм вылас.

— Жыдачнад сылысь сьӧлӧмсӧ он небзьӧд, дзодзӧг виччысьӧ. Мый ми воим нин, сійӧ и думайтны оз куж да вермас на и йӧймӧдчыны.

Сикт сай туйӧдыс мунім гаражӧ, мед этшаджык син аддзыліс миянӧс. Сувтӧдім тракторъяссӧ да мунім Кӧк Васьясӧ. Посводзас пӧрччим кӧм и паськӧм.

— Ті, — шуӧ Вась, — нӧрӧвитлӧй на тані, а ме разведкаӧн пырала. Сӧмын калькӧдыштіс ӧдзӧссӧ, киыс ӧдзӧс костас слӧймис, а Юляыс порог дорас нин сулалӧма. Сійӧ пӧдлаліс мый вынсьыс Васьсӧ не лэдзигтыр, да мӧдыс горӧдчис лёк ног. Киыс вир юк. А горзӧмыс.

— Васюк, Васюк, эг-ӧ дойд ме тэнӧ, — небзьыштіс Юляыс. — Ноко петкӧдлы китӧ. О-о! Лок ӧдйӧджык йодӧн мавта да тӧбышта. Ті тожӧ пырӧй, пырӧй.

Юля ладитіс Васьлысь кисӧ да пызан лӧсьӧдіс, пуксьӧдіс ставнымӧс. Водка доз кыпӧдіс.

— Со тіян, дзодзӧг лыйысьяс.

— Юля, — кывлысьӧ Васьыс, — ыджыд прӧмысӧн ошйысьны ог вермӧй, но кӧть тайӧс пу — мыччӧ жыдачсӧ.

Юляӧс татшӧм прӧмыссьыс серам висьӧм босьтіс, да некыдз и дугӧдчынысӧ оз вермы. Шуӧ, он ӧмӧй пӧ куим пельӧ юкӧ. Миян ставлы лои зэв гажа, и ме думышті, мый Васьыс абу весьшӧрӧ горзӧма посводзас. Артист.

Ми ордӧ сэсся ветлім, Юляӧс босьтім жӧ. Викторъясӧ ветлім.

Бабаяс кӧ ышмасны, нинӧм оз жалитны...

* * *

Со тадзи ставыс сэки помассис. Колисны нин вояс, но сійӧ кыйсьӧмсӧ век на казьтылам. Первомайсӧ ӧні пыдди на пуктӧны. Важ лозунгъясыс, дерт, вошисны, а выльяссӧ эз на думыштны, оз на тӧдны, кытчӧ чуксавны йӧзсӧ. Кӧк Вась ӧні оз ю. Во нин оз босьтлы вомас. Коркӧ ӧтчыд Юляыс лыддьӧма газетысь, мый карӧ кутшӧмкӧ экстрасенс воӧма Петербургысь да нуӧдлас сэтчӧ Васьсӧ. Куимсё сюрс шайт мынтӧмаӧсь. Васьыс шуӧ, тайӧ пӧ куим тӧлысьӧн асьсӧ вештіс, а сэсся пондіс прибыль сетны.

Илля Виктор оз жӧ ю. Висьталӧ тай, быттьӧ ассяньыс шыбитӧма, гӧтырыс торйӧдчыны грӧзитчӧма да. Ме босьтлывла на получка бӧрын, а получкаыс миян совхозсаяслӧн куим тӧлысьнас ӧтчыд. Дай кутшӧм нӧ миян удждон, тшыглы кулӧмысь сӧмын. Гӧтыр на сэсся ньӧблас, лад вылас кӧ. На, шуӧ, горшыд кӧнкӧ косьмӧ жӧ нин-а. Татшӧм здукъясас шулывла сылы: «Ольга, ме век на радейта тэнӧ».


Гижӧд
Гӧрд лун
Жанр: 

lkejrlkelkrgner klrjnelknfrkl ekjnrjkenfrej

1