ПАСЬКЫД ОЛӦМӦ ПЫРИГӦН


Ӧдзӧс костӧд мӧд комнатаысь кыліс радио. Лида пукаліс пызан дорын да сюся видзӧдіс керка пытшкӧссӧ. Нинӧм синмӧ шыбитчанаыс сэні эз вӧв. Сера клеёнкаӧн вевттьӧм пызан, важиник диван, лабич, цветъяс. Пызан дорын зеркалӧ рамаӧ ӧшӧдӧма еджыд кузьчышъян, кодлы помъясас гӧрдӧн вышивайтӧма зэв тшапа гогнитчӧм петукъясӧс. Пызан вылын ломалысь кузь кока лампа би улын найӧ кажитчисны торъя нин мичаӧн.

Лида сӧмын на пырис тайӧ керкаас. Сійӧ первойысь петіс гортсьыс ылі туйӧ, локтіс тайӧ сиктас удж вылӧ. Том ныв лӧсьӧдчис пырны паськыд олӧмӧ. Туйын аддзылӧмторъяс вӧліны син водзынӧсь на. Лида быттьӧ дзик на ӧні прӧщайтчис пӧдругаясыскӧд, локтіс пароход вылын, лайкъялысь трап кузя полігтыр петіс берегӧ. Сійӧ эз вевъяв вӧтчыны Н. сиктӧ чеччысь йӧз бӧрся, коли вадорас ӧтнасӧн. Сап пемыд. Буситӧ кӧдзыд зэр. Кӧнкӧ вылын (лоӧ видзӧдны юртӧ чатӧртӧмӧн) ӧшиньясын дзузгӧны бияс. Туйыс тӧдтӧм.

«Кодарӧ и мунны?» — тӧждысис Лида, но, сы шуд вылӧ, суӧдіс тайӧ бур тьӧткаыс, вайӧдіс сиктӧдз да узьны пыртіс ас ордас.

Тьӧтка ӧні мыйкӧ ноксис камод дорын, а Лида, пӧрччысьӧма, пукаліс шоныд керкаын да думсьыс аттьӧаліс сійӧс.

Самӧвар пуктӧм бӧрын кӧзяйка пуксис пызан дорӧ Лидалы паныдӧн, видзӧдліс сы вылӧ да чуймис:

— Тэ тай зэв на том вӧлӧмыд! А ме, выжывыд, тэнӧ ичмоньӧн чайті.

Збыль, Лида вӧлі зэв том. Ӧдвакӧ кодкӧ сылы сетас дас кӧкъямыс арӧс. Пелькиник тушаа, вӧсньыдик. Платьесӧ польдыштӧмаӧсь полігтырйи чургӧдчӧм кык морӧс. Сьӧд нисьӧ руд юрсиыс быттьӧ асык пиӧ босьтӧма ёсиник ныра векньыдик чужӧмсӧ. Синмад шыбитчӧны розя тшӧкаыс да челядьлӧн моз на нёптола банбокъясыс. Кызкодь паръяссӧ олӧмыс ньӧти абу на вӧрзьӧдӧма. Карӧй рӧма, неуна руалыштӧм синъясыс кыдзкӧ торйӧн тӧдчӧны, мичмӧдӧны став чужӧмсӧ асланыс збойлуннас да том вильышнас.

— Абу нин том, — серӧктіс Лида, и мыччысьлісны рысь кодь еджыд посни пиньясыс.

— Кыдз нӧ тэнад нимыд? — юаліс кӧзяйка.

— Лида, — шуис ныв.

— Карысь, кӧнкӧ?

— Карысь.

Водзӧ кӧзяйка нинӧм эз юась (этша ӧмӧй карсаясыд быдсяма могнас волӧны), а заводитіс висьтавны ас йывсьыс. Сійӧс, вӧлӧмкӧ, шуӧны Катеринаӧн, овыс — Савина. Комиӧн шуӧны Педӧр Катьӧӧн. Гортын пӧ Катьӧӧн жӧ шулісны. Верӧс пӧ мусукасигӧн шулывліс Катяӧн, мукӧддырйи, гажа юрӧн, Катюша кыв на эз жалитлы. А гӧтрасис да Катьӧӧ жӧ пӧртіс.

— Мед, ме ог лӧгась, — кывкӧрталіс кӧзяйка. — Мый нӧ лӧгасян, Катьӧ и эм да.

Катерина тайӧ жӧ сиктысь, катыд помысь вӧвлӧма. Дас во сайын, кызь нёль арӧсӧн, муніс Ёгор Кольӧ сайӧ. Верӧсыс ӧні Сыктывкарын велӧдчӧ сельскохозяйственнӧй школаын.

Ачыс Катерина уджалӧ дояркаӧн. Дас вит во нин мӧсъясӧс лысьтӧ. Ёгор Кольӧлӧн да Катериналӧн эм сизим арӧса ныв Таня. Сійӧ ӧні узьӧ пӧлатьын.

Ас йывсьыс висьталӧм бӧрын Катерина мӧдіс висьтавны колхоз йылысь.

— Ошйысьны ог кут, — шуис сійӧ. — Элясьны нинӧм вылӧ жӧ. Уджалан кӧ, ӧні колхозад позьӧ овмӧдчыны. Мукӧд тай со шуасны: йӧвтӧ пӧ дояркаяслы сетӧны сы мында, кӧть купайтчы. Ме, дерт, скуп баба и купайтчыны ог кут, — нюммуніс сійӧ, а сэсся юаліс: — Тэ, гашкӧ, Лида, колхозӧ жӧ локтін?

— Эг, Катерина тётя. Ме локті татчӧ... учительницаӧ.

Катерина чуймис:

— Татшӧм томыс?! Ачыд на челядь кодь да.

Лидалы чушисны кӧзяйкалӧн кывъясыс, но сійӧ зілис тайӧс не петкӧдлыны.

Рытъя сёрни та вылын и помасис. Катерина вольсаліс Лидалы пӧлатьӧ, ачыс водіс паськыд пу крӧвать вылӧ. Сійӧ сэтшӧм сьӧкыда водіс, мый крӧватьыс быдӧн скӧрысь дзуртыштіс.

Лида лунтыр и рытывбыд вӧлі кок йылын да юр бергӧдчымӧныс мудзис. Долыд вӧлі куйлыны гӧн вольпась вылӧ нюжгӧдчӧмӧн, но унмовсьны эз вермы. Дум вылӧ уси челядьдырыс, а сэсся тайӧ думыс шӧрт моз каттьысис водзӧ. Ныв важӧн нин мечтайтіс удж йылысь. А со и помаліс педучилище да локтіс удж вылӧ.

Бать-мамыс тшӧктісны пырны пединститутӧ да водзӧ велӧдчыны. Но Лида ассьыс томлунсӧ мӧдног донъяліс: уджалышта пӧ, а сэсся и водзӧ велӧдча. Бать-мамлы лои сӧгласитчыны. Лидалы практика дырйи на зэв ёна сьӧлӧм вылӧ воисны посни челядь, и шуис непременнӧ заводитны велӧдны первой классянь. Татшӧм кӧсйысьӧм сійӧ сетіс и выпускнӧй вечер вылын.

Вечерыс муніс зэв гажаа да кыпыда. Ӧні, небыд вольпась вылын куйлігӧн, Лида казьтыліс тайӧ вечер йывсьыс, ёртъяс йывсьыс. Думайтіс сійӧ и горт йывсьыс, бать-мам йывсьыс. Прӧщайтчигӧн мамыс синва пыр шуаліс: «Ас кежад, нылукӧй, бура ов», а батьыс велӧдіс: «Тэ, Лида, пыран асшӧр олӧмӧ. Бур йӧзысь эн пышйы, а лёк йӧзлы эн сетчы».

Лида сэки шуис:

— Коді нӧ, батьӧ, меным лёксӧ вӧчас? Мыйысь? Ме ӧд ог кут лытайтны да дышӧдчыны.

Ичӧт вокыс, Витя, корис: «Лида, гиж письмӧ менам ним вылӧ», Лида копыртчис, окыштіс воксӧ, кӧсйис шуны: «Гижа, Витя, гижа», но эз вермы: горшыс гӧрддзасис.

«Ок, Витя. Тэ ӧні мам дінын, а ме нин йӧзын, и регыд ковмас босьтчыны уджӧ», — водзӧ думайтіс Лида, а сэсся ачыс эз тӧдлы, кыдзи унмовсис.


* * *

Аскинас Лида муніс школаӧ. Том учительница кӧсйис аддзӧдлыны школаса директорӧс, тӧдмасьны, лӧсьӧдчыны удж кежлӧ. Но директорыс школаын эз вӧв: мунӧма пӧ чери кыйны. Та йылысь сылы висьталіс школаса стӧрӧжикаыс. Мортыд гожӧмбыдӧн тшыгъялӧма сёрнисьыс да быдторсӧ висьталіс учительяс йылысь, унджыксӧ вӧйпис: ӧти — зэв нин тшап, мӧд — лишнӧй збой, коймӧд — вывті писькӧс. Директорӧс сійӧ эз ошкы ни торъя эз вӧйп.

Лида эз кут кывзыны стӧрӧжикалысь. Том учительница шензис: матысмӧ велӧдчан во, сійӧ локтіс нарошнӧ водзджык, медым бурджыка дасьтысьны велӧдчан во заводитчигкежлӧ, а директор чери кыйӧ.

Василий Ивановичкӧд, школаса директоркӧд, Лида аддзысис лун-мӧд мысти. Сійӧ вӧлі том на, чужӧмыс сім гӧрдӧдз гожъялӧма. Лида виччысис, мый директор лоӧ рад выль учительница воӧм вылӧ. Министр ӧд выпускнӧй вечер вылын шуис: миян школаяс лоӧны радӧсь выль да том велӧдысьяслы. Но Василий Иванович веськодьпырысь юасис Лидалысь, кор сійӧ воис, кутшӧма локтіс, код ордӧ овмӧдчис. Лида корис директорлысь, мед сетасны сылы велӧдны первой класс.

— Мыйла сідзи, Лидия Петровна? — синкым увтіыс видзӧдліс Василий Иванович, тыдалӧ, шензьӧдіс том учительницалӧн корӧмыс.

— Меным сідзи колӧ, Василий Иванович!

— Абу ӧмӧй ӧткодь, кутшӧм класс?

— Меным колӧ первой класс, Василий Иванович.

— Ог гӧгӧрво, — пельпомъяссӧ лэптыштліс директор.

Лида кывліс нин, мый первой класскӧд кӧсйӧ уджавны директорлӧн гӧтырыс, да кыдз позьӧ убедительнӧйджыка кутіс висьтавны, мый том учительлы бурджык босьтны велӧдны челядьӧс первой классянь, ӧтипӧлӧс челядькӧд уджавны нёль во чӧж. Сэки аддзан, кыдзи тэ ки помысь ньӧти на велӧдчытӧм зонпосни да нывпосни пыр ӧтарӧ, воысь воӧ велалӧны лыддьысьны, гижны, овны, уджавны.

— Кутшӧм ӧд тайӧ интереснӧ, Василий Иванович! — шуис Лида, но казяліс, мый «интереснӧ» кывйыд татчӧ некыдзи оз лӧсяв да яндысьӧмпырысь видзӧдліс директор вылӧ.

Но директорлӧн чужӧмыс и ӧні вӧлі веськодь, быттьӧ сы водзын абу некутшӧм том учительница. Тайӧ Лидаӧс бӧр збоймӧдыштіс. Здук мысти сійӧ бара заводитіс зэв збыльысь корны:

— Василий Иванович, сетӧй меным первой класс. Вӧчӧй ме ногӧн. Гӧгӧрвоанныд... — Лида кӧсйис вайӧдны кутшӧмкӧ ыджыд помкаяс, но нинӧм эз сюр.

Василий Иванович дыша пуктіс кыкнан кисӧ аслас письменнӧй пызан вылӧ да, очсӧдлӧмсӧ венны зільӧмӧн, шуис:

— Первой классад велӧдысьыд миян эм нин, Лидия Петровна. Учительница колӧ нёльӧд классӧ.

Лида нинӧм эз сяммы шуны. Медым гажмӧдны том учительницаӧс, Василий Иванович нуӧдіс сійӧс видзӧдлыны классъяс.

— Аддзанныд, Лидия Петровна, кутшӧм кыпыд нёльӧд классыс, — ӧти классӧ пырӧм бӧрын шуис сійӧ. — Таво став партаяссӧ дай джоджсӧ краситім.

Воисны первой классӧ. Лида быдӧн гажмис:

— Видзӧдлӧй, Василий Иванович, кутшӧм гажа комната. Дзик меным вылӧ кодь и эм!

Василий Ивановичлы чушис тайӧ, да кӧритіс том учительницаӧс:

— Кад тіянлы, Лидия Петровна, челядь рутӧ шыбитны!

Ӧти кывйӧ эз воны. Лида кольччис классас ӧтнасӧн, челядь моз зумыштчис, скӧраліс директор вылӧ. Сэсся шог босьтіс. Вӧлӧмкӧ, нинӧм кокньыда оз шед. Со тай. Весиг директор, гӧгӧрвоысь морт, эз могмӧд сылысь кӧсйӧмсӧ. Лида скӧрмис ас вылас: «Эг вермы убедитны директорӧс, а ещӧ велӧдысьӧн кӧсъя лоны».

Дыр пукаліс тані Лида. Рытыввыв бана ӧшиньясӧд шонді югӧр визьнитіс том нывлӧн зумыш чужӧм кузя да зэв ӧдйӧ бӧр дзебсис букыд арся кымӧр сайӧ.

Лида локтіс гортас сёрӧн нин. Кӧзяйка эня-ныла буретш вӧлі пуксьӧмаӧсь сёйны.

— Пуксьы, Лида, тшӧтш панясь, — шуис Катерина.

— Оз ков, — нориника вочавидзис Лида.

— Водз, нылӧй, кутін шогсьыны! — серӧктіс кӧзяйка.

Лида та вылӧ воча нинӧм эз шу, пырис комнатаӧ, кытчӧ сійӧс кӧзяйкаыс лэдзис квартираӧ, пӧрччысьтӧгыс шыбитчис крӧвать вылӧ.

Мӧд асывнас Лида садьмӧмӧн тшӧтш думыштіс директоркӧд сёрнитӧм йылысь да ышловзис: «А мый ме майшася, босьта нёльӧд классӧ. Абу ӧмӧй ӧткодь?» Но сьӧлӧмыс тайӧ мӧвпысь эз бурмы.

Нуръясьыштӧм бӧрын кӧсйис лыддьысьны, босьтіс «Русский лес». Юрас нинӧм оз пыр. Кӧсйис платье вӧньсӧ кузьмӧдыштны, дзескыд новлыны, ӧні сійӧ абу нин велӧдчысь, нинӧмла зэлыдӧн новлыны. Эз сюр чуньлысыс, а сытӧг емыс чуньсӧ бытшлалӧ. Босьтчис джодж мыськыны, юаліс Танялысь, кӧні мамыслӧн мыськасян ведраыс, гумовтіс ва да ветьӧкӧн чорыда ниртіс джоджсӧ. Ачыс мӧвпаліс: «Ог сетчы. Директор вӧчас ме ногӧн!»

Лида локтіс школаӧ. Суис сэні Василий Ивановичӧс. Директор ордын вӧлі тшӧтш мӧд морт, олӧма нин. Василий Иванович висьталіс, тайӧ пӧ школаса завуч, Степан Васильевич, важ учитель, таво тырӧ комын во сылӧн учителялӧмлы, витӧд-сизимӧд классъясын сійӧ велӧдӧ литература. Лида копыртчыштліс завучлы да бара паніс тӧрытъя сёрнисӧ.

— Василий Иванович, мыйла ті онӧ сетӧй меным велӧдны первой класс?

— Бара сы йылысь, — дӧзмӧмпырысь шуис Василий Иванович, сэсся видзӧдліс завуч вылӧ да зэв збыльысь висьталіс: — Лидия Петровна! Ті жӧ тӧданныд, парта сайӧ первойысь пуксьӧм челядькӧд сьӧкыд уджавны. Первойтӧ челядь оз тӧдны дисциплина, оз кужны...

— Тӧда, Василий Иванович, — директорлысь мӧвпсӧ орӧдіс Лида. — Зэв бура тӧда. Ме ог пов сійӧ сьӧкыдлунъяссьыс. Мый ог куж, ті отсаланныд.

— Ті том мывкыднад, гашкӧ, и онӧ полӧй, а ме пола. Первойтӧ нинӧм кужтӧм челядьӧс ті верманныд... кыдзи эськӧ небыдджыка шуны... верманныд тшыкӧдны...

— Ме? — синъяссӧ сувтӧдіс Лида. Первойсӧ сійӧ дыр нинӧм эз вермы шуны, а сэсся висьталіс, мый педучилищеын нёль во велӧдчигӧн педагогическӧй практикаӧн руководитісны медся опытнӧй преподавательяс, да некод эз шулы, мый Лидия Вежева, коді сэтшӧм пӧся босьтчӧ уджӧ, вермас тшыкӧдны первой классын велӧдчысьясӧс. Волнуйтчӧмысла Лида быдӧн мыкталіс. Завуч эз кут ӧшйыны места вылас, но сёрниӧ эз суитчы. Директор лэптіс гӧлӧссӧ:

— Тырмас, Лидия Петровна, менӧ велӧдны.

Лида эз и думайт ланьтны:

— А ті онӧ донъялӧй том кадръясӧс!

— Сідзкӧ, босьтӧй да бӧр мунӧй, — явӧ нервничайтіс директор.

Тайӧ кывъяс бӧрын Лидалӧн банйӧм чужӧмыс кельдӧдіс, мышку кузяыс котӧртіс йирмӧг.

— Ті онӧ партийнӧй ногӧн вӧчӧй! — ёсь гӧлӧсӧн шуис сійӧ, тшӧкмунліс да содтіс: — Культ личности петкӧдланныд! — и ланьтіс. Кыдзи кажитчис сылы, медся мӧрччана кывсӧ лои шуӧма.

— Да-а, — нюжӧдіс ӧнӧдз чӧв пукалысь завуч.

Лида видзӧдліс Степан Васильевич вылӧ. Сійӧ водзчунь гыжнас мыйкӧ весаліс гӧрд пызандӧра вылысь. Том учительница мыйкӧ кӧсйис шуны завучлы, но муніс ӧдзӧс дорӧ, видзӧдліс завучлӧн копыртчӧм юр вылӧ да ӧдйӧ петіс. Ӧддзӧм вывсьыс сійӧ воліс кильчӧ помӧдз, сэсся бӧр бергӧдчис да пырис первойя веськалан классӧ. Ыркалыштӧм бӧрын нывлы эз ло лӧсьыд аслас кывъясысь.

«Видчӧм артмис», — думыштіс сійӧ.

Недыр мысти Лида бӧр локтіс завуч дінӧ, медым сёрнитыштны Степан Васильевичкӧд. Завуч кывзіс том учительницалысь висьтсӧ, лабутнӧя копыртлывліс юрнас, а сэсся шуис:

— Сідзнад, дерт, сідзи, Лидия Петровна. Но та кузя медводдза кывйыс директор сайын. Да и сылӧн жӧ медбӧръя кывйыс. Оз ков тадзи пузьыны.

— Степан Васильевич, — пӧшти синва пыр шуис Лида. — Кывлінныд, мый сійӧ шуаліс. Меным коли ӧтитор — бӧр мунны татысь.

— Пышйыны? — сы вылӧ мудера видзӧдліс Степан Васильевич.

Тайӧ кывъясыс Лидалы ёна парскисны. Сійӧ кӧсйис венӧ пырны, но видзӧдліс завуч вылӧ, чукырӧсь плешка, дзор кӧсичаа, вежӧра синъяса важ учитель вылӧ, да нинӧм эз шу.

Том учительница сьӧкыда восьлаліс гортас. Кильчӧ ӧдзӧсыс вӧлі пӧдса. Тыртӧм комнатаын ещӧ нин лои гажтӧм. Лида включитіс радио. Сьылісны «Мича нывъяс Эжва дорӧ лэччисны», но не таӧдз ӧні вӧлі Лидалы, сійӧ водіс да мӧдіс думайтны, мый жӧ вӧчны водзӧ. Норасьны комсомольскӧй организацияӧ либӧ роноӧ? Ӧдвакӧ кодкӧ кутас суитчыны школаса директор уджӧ. Норасьӧмъяснад эштӧма учителялӧмыд. Сьӧкыдлунысь пӧ повзин.

Лида мӧдіс думайтны, кыдзи эськӧ сы местаын вӧчисны сылӧн радейтана литературнӧй геройясыс Олег Кошевой либӧ Зоя Космодемьянская, кодъяс кодьӧн Лида важысянь кӧсйис лоны. И думъяснас воис ӧтиторйӧ: не сетчыны, не лэдзчысьны аслас думыштӧмторйысь; ветлыны директор гӧтыр дінӧ, кодлы индӧмаӧсь первой классӧ, гашкӧ, Анна Степановна ачыс сӧгласитчас вежсьыны класснас.


* * *

Ӧти рытӧ Лида муніс директор гӧтыр ордӧ. Анна Степановна вӧлі ӧтнасӧн, ноксис каганас. Сійӧ примитіс Лидаӧс гӧстяӧс моз. Арджынйысь неуна ыджыдджык кагаыс, Соня, пиньтӧм вомсӧ паськӧдӧмӧн, мам ордсьыс зэв любӧпырысь шыбитчис Лида ордӧ.

Анна Степановна серӧктіс:

— Со ӧд. Быдӧнӧс тӧдтӧмтӧ, а тэ ордӧ, Лидия Петровна, веськыда уськӧдчис. Сідзкӧ нӧ, вӧдитышт. Ме самӧвар пукта.

Кӧзяйка петіс. Лида Сонякӧд ворсігӧн гажмыштіс. Соня чиктылігтыр кватитіс Лидаӧс юрсиӧдыс, тракнитіс да кутіс кыскыны юрси пратьсӧ вомас. Лида, сераліс, кага киысь мездіс юрсисӧ.

Чай юигмоз, ӧти-мӧдтор йылысь сёрнитыштӧм бӧрын, Лида висьталіс Анна Степановналы, кутшӧм ыджыд могӧн сійӧ локтіс сы дінӧ.

Вӧлӧмкӧ, гӧтырыскӧд Василий Иванович нинӧм на абу сёрнитлӧма Лида йылысь. А сійӧ чайтліс, директор не сӧмын гӧтырыслы, но и став учительяслы, став сиктыслы нин висьтавліс Вежева йылысь.

Лида висьталіс Анна Степановналы, мый сійӧ кӧсйӧ сьӧлӧмысь босьтсьыны уджӧ, колӧ заводитны велӧдны первой классянь. Босьтчас кӧ велӧдны нёльӧд класс, Лида полӧ ас вӧснаыс, вермас во мысти эновтчыны уджысь, вуджны мӧдлаӧ, либӧ мунны водзӧ велӧдчыны. А кутас кӧ первой классянь уджавны, велалӧ ӧтипӧлӧс челядь дінӧ, дзонь нёль во найӧс велӧдас. Водзӧ велӧдчыны сійӧ кутас уджалігмозыс, заочнӧ.

Анна Степановна кывзіс Лидаӧс. Первойсӧ сійӧ ыстысис директор вылӧ, мый сы сайын пӧ тайӧ. А кор Лида ёнджыка кутіс корны Анна Степановнаӧс аслыс сетны согласие, сёрнитны та кузя Василий Ивановичкӧд, — мӧдыс, плешсӧ кӧрӧмӧн, дузгӧдчис да орӧдіс: «Ме кута велӧдны ассьым классӧс».

Подольникасянінысь чери тырӧн локтіс Василий Иванович да нимкодя шуис:

— Но, миянын гӧстя вӧлӧма. Аня, жарит свежӧй черисӧ. Мича сынпиян шедіны.

«Директорлы менам судьба дорысь чериыс донаджык!» — усьӧм сьӧлӧмӧн думыштіс Лида, коса прӧщайтчис да петіс на ордысь. Сійӧ мӧвпаліс, мый школаса директор гозъя кодь лёк йӧзыс сэсся некод став свет вылас абу.

Гортас мунны Лидалы неокота вӧлі. Сійӧ мӧдӧдчис вадор пӧлӧн. Туй вылас паныдасьлысь вомӧна потшӧсъяс дорӧ сувтыштлас, сэсся тэрыба кавшасяс, чеччыштас мӧдарас, водзӧ мӧдӧдчас. Кӧнкӧ кылӧ тракторлӧн шы. Сійӧ сяргӧ оз нетшкысьӧмӧн, а рӧвнӧя, сы вӧсна оз торк Лидалысь мӧвпъяссӧ.

Вӧлі сэзь рыт. Шонді бердан выйын, гӧрд югӧрӧн сявкйӧ. Лунвывсянь пӧльыштлывліс тӧв ру. Лунтӧлыс эз нин вӧв гожӧмын моз улльӧв кодь небыд, чужӧмтӧ меліа малалысь, а кезйӧдлӧ кӧдзыдӧн, повзьӧдчӧ арӧн. Но том ныв эз кыв сійӧс. Тӧлыс эз вермы ыркӧдны нывлысь пытшкӧсас чукӧрмӧм пӧсьсӧ. Сійӧ видзӧдіс лӧнь, стеклӧ кодь шыльыд, гӧрдӧн югъялысь ва вылӧ, кывтысь пыжа вылӧ.

Ыджыд пыжын пукалӧны нывъяс да зонъяс. Ӧти зон пыж бӧжас веськӧдлӧ кык лопта пелысӧн, нывъяс сьылӧны. Катерина тьӧтка асывнас висьталіс, мый талун том йӧз мунӧны видз весавны.

«Тыдалӧ, видз весаланінсянь локтӧны, — завидьтӧмпырысь ныв-зон вылӧ видзӧдліс Лида. — Лӧсьыд жӧ нин налы: нинӧм вӧсна оз шогсьыны».

Нор да мелі шыяс паськыда разалӧны Эжва кузя, сю идзас подъя муяс весьтті, берег пӧлӧн тшапа сулалысь кыдз пу расъясті. Нывъяс сьылісны радейтчӧм йылысь.

Лидалӧн сьӧлӧмыс некор на эз ёкмунлы збыль радейтӧмысь. Нора сьылӧмсӧ кывзігӧн Лидалы тӧдвылас уси тшак вотігӧн аддзылӧм шор. Сук вӧр шувгӧм улын сійӧ тадзи жӧ дзольгис синва кодь сӧдз ванас, писькӧдчис паськыд юяслань. И Лидалы окота лои ӧткодявны тайӧ шорыскӧд асьсӧ.

«Ме сідзи жӧ писькӧдча паськыд олӧмӧ, — думыштіс ныв. — Но вот медводдза лунсяньыс туй вылын паныдасисны мытшӧдъяс».

Кыдзи быд мортлӧн татшӧм случайын, сьӧкыд вӧлі нывлӧн сьӧлӧм вылас, но сійӧ чорыда надейтчис: венас тайӧ сьӧкыдлунсӧ.


* * *

Воис сентябрь первой лун, челядьлӧн, найӧ бать-мамлӧн ыджыд праздник.

Том учительница волнуйтчис, тавой омӧля и узис да чеччис кӧзяйкаысь водз. Школаса завуч Степан Васильевич отсӧгӧн педсӧвет вылын шуисны сетны Лидалы первой класс. Директор тані асьсӧ кутіс лӧня, воддзамоз эз петитчы. Анна Степановна сідз жӧ эз шыасьлы, сӧмын пыркмуні. А Лида сэки дась вӧлі окавны Степан Васильевичӧс, татшӧм бур да быдтор гӧгӧрвоысь мортӧс. Дай Василий Иванович ӧні кажитчис прамӧй мортӧн.

Тайӧ Лида вылӧ сӧлӧдіс ещӧ ыджыдджык мог: лӧсьӧдчыны урокъяс кежлӧ сідзи, медым некод водзын эз ло яндзим. Ӧд неуна кӧ мыйкӧ оз лючки артмы, серамвыв лэптасны: ми пӧ тай со шулім, мый он сяммы первой классын велӧдны.

Таня вылӧ видзӧдігӧн, коді талун ачыс, некодӧн чуксавтӧг, зэв водз чеччис да кӧмасис-пасьтасис (сійӧ талун школаӧ жӧ тэрмасьӧ), Лидалы дум вылас уси аслас ичӧтдырйиыс первойысь школаӧ мунӧмыс, бур велӧдысь ордӧ инавны мамыслӧн зільӧмыс.

Лида думсьыс кӧсйысис лоны бур велӧдысьӧн.

Лоис тыр югыд. Лида пасьталіс коричневӧй шӧвк платье, кодӧс таво тулыс, отпускӧ волігӧн, пӧдаритіс вокыс. Сійӧ Ангара дорын Братскӧй ГЭС стрӧитанінын инженерӧн уджалӧ. Нёль орден мичмӧдӧ сылысь паськыд морӧссӧ, Отечественнӧй война вылын перйӧма. Лида аслас вокӧн зэв гордитчис. Дай вокыслысь козинсӧ дӧзьӧритіс. Мамыс вӧлі шулывлас: «Лидӧ, пасьтав вечер вылад вокыдлысь пӧдаркитӧ». «Лидӧ, театрад ӧні ёна вӧччӧмӧн ветлӧны, пасьтав шӧвк платьетӧ». Но Лида век ӧтмоз вочавидзліс: «Ме, мамӧ, вокӧйлысь козинсӧ пасьтала, кор воас менам лун».

Со сійӧ луныс и воис. Платье вылас Лида пысаліс комсомольскӧй значок, зеркала водзын мичмӧдчис, аслыс кажитчис вывті нин томӧн да ышловзис.

Катерина эз вермы кутны ассьыс нимкодясьӧмсӧ:

— Кутшӧм лӧсьыд тэ, Лида, тайӧ платьенад. Дзик роч акань кодь.

— Збыль? — нюммуніс Лида, пальтоасис, юрас пуктіс кокньыдик гӧрд берет да кӧсйис нин мунны, но петӧм пыдди пуксис лабичӧ да шуис:

— Катерина тётя, мыйлакӧ талун менам сьӧлӧмӧй вывті ёна тіпкӧ.

— Кыдзи нӧ мӧдногыс? — шензис Катерина. — Паськыд олӧмӧ пыригад век тадзи овлӧ.

Лида волнуйтчис. Сылы зэв окота вӧлі, мед Катерина тётя ещӧ мыйкӧ висьталас шоныдӧс, сьӧлӧм кыпӧданаӧс, но кӧзяйка чӧв оліс, тыдалӧ, тшӧтш волнуйтчис аслас ныв вӧсна, коді талун первойысь мунас велӧдчыны.

Школаӧ Лида воис водз на. Сійӧ чайтіс, мый тані некод на абу, но, вӧлӧмкӧ, школаын тырыс нин челядь. Лида тӧдіс — первойя лунӧ велӧдчысьяс зільӧны кутны асьнысӧ лӧня. Но оз-оз дай петавлӧ ортсӧ налӧн вильышлунныс. Посниясӧс ӧлӧдалӧны выліджык классъясса велӧдчысьяс пиысь дежурнӧйяс.

Лида школаӧ пырӧмӧн тшӧтш синъяснас корсис первойысь воысьясӧс. Со найӧ! Сулалӧны топыд чукӧрын, полігтырйи, унаӧн ловшынысӧ оз лысьтны лэдзны, видзӧдлывлӧны ёрта-ёрт выланыс. На пӧвстын тыдалӧны уна рӧма чышъянъяса нывбабаяс — мамъясныс.

На пӧвстын тшӧтш сулалӧ ӧти дед, кузь дзормӧм тошка, дзор ускыс куритчӧмысла вижӧдӧма. Дед зэв меліа видзӧдлывліс сыкӧд орччӧн сулалысь да корсюрӧ кок вылас катласьысь детинка вылӧ. Детинка тшӧтш чӧвтлывліс синъяссӧ дед вылас да ышлолаліс. Коді тӧдас, мый ӧні небыд сьӧлӧм вылас сылӧн!

Лида локтіс йӧз дінӧ, здоровайтчис.

Школаӧ локталісны мукӧд учительяс да учительницаяс. Воис директор.

Кӧкъямыс час асыв. Кыліс звонок, таво вылӧ первой звонок. Сійӧ быттьӧкӧ тэрмасьӧмысла джӧмдылӧ, сэсся бара аслас ыргӧн шыӧн кыпыда зёльзьӧ.

Школаыс быттьӧ вӧрзис, ставӧн гызьӧбтісны залӧ. Директор быдӧнӧс поздравитіс выль велӧдчан воӧн, чуксаліс бура велӧдны да велӧдчыны. Том учительница сюся кывзіс директорлысь висьталӧмсӧ, а ачыс видзӧдіс Ленин портрет вылӧ. Ленин, синъяссӧ неуна читкыртыштӧмӧн, ловъя моз видзӧдіс залӧ чукӧрмӧм йӧз вылӧ. Лидалӧн ещӧ ёнджыка вӧрзис сьӧлӧмыс.

Велӧдчысьяс разӧдчисны классъясӧ. Лида мӧдӧдчис аслас классӧ сетны ыджыд экзамен. Классын вӧлі сэтшӧм лӧнь, мый, пызан дорӧ восьлалігӧн, туфли каблуклӧн быд тотшнитӧм кажитчис пес поткӧдӧмӧн.

Том учительница синъяссӧ чӧвтліс челядь вылӧ, видзӧдліс гырысь йӧз вылӧ. Найӧ пукалӧны стен пӧлӧныс скамьяяс вылын, кодъяс абу тӧрӧмаӧсь — сулалӧны. Со сэні пукалӧ тшӧтш Катерина тётя, зэв збыль чужӧма, чышъянсӧ пӧрччӧма. Со сэні жӧ сулалӧ дед. Сійӧ, юрсӧ пельпомас сюйыштӧмӧн да чатӧртчыштӧмӧн, видзӧдлывлӧ то Лида вылӧ, то аслас внук вылӧ.

Гырысь йӧз пӧвстын тшӧтш пукалӧ школаса завуч, Степан Васильевич. Лидалӧн сьӧлӧмыс ыркмуні: «Локтӧма кывзыны, кыдзи ме кута нуӧдны уроксӧ!»

Том учительница гырысь йӧз вылӧ синъяссӧ чӧвтліс сӧмын сутш кежлӧ, пырмунігмоз. Сійӧ кутіс видзӧдны челядь вылӧ. Со тайӧ муса челядьыс вылӧ, комын зонпосни да нывпосни вылӧ. Найӧ ассьыныс мича да югыд синъяссӧ лэптӧмаӧсь том велӧдысь вылӧ, виччысьӧны мыйкӧ ыджыдтор, ӧткымынъяс весиг вомнысӧ калькнитыштӧмаӧсь.

Лида тіралыштан гӧлӧсӧн шуис:

— Чолӧм, челядь! Тӧдмасямӧй! Тіянӧс велӧдны кута ме! Менӧ шуӧны Лидия Петровнаӧн.

Том учительницалӧн, Лидия Петровналӧн, урок заводитчис. Катерина тётялӧн нимкодьысла петіс нюмыс: «Прӧста майшасин асывнас».

Челядь сюся кывзісны, висьталісны учительница юалӧм вылӧ, коді кыдзи кужис, а мукӧдъяс и вочакыв пыдди эз слӧймыны нинӧм шуны. Первойтӧ, дзонь час вӧрзьывтӧг челядьлы пукавны сьӧкыд. Коді жӧдзыштас места вылас, коді парта пӧвнас ненарошнӧ швачкас, коді сапӧгнас шаркнитас.

Ӧти нывбаба аслас жӧдзысь пиыс вылӧ кӧсйис горӧдны, восьтыліс нин вомсӧ. Но чӧвтліс синъяссӧ учительница вылӧ и эз лысьт нинӧм шуны. Пи вылас стрӧга видзӧдігӧн сійӧ сӧмын юрсӧ пыркӧдӧмӧн ӧлӧдіс.

Том учительница челядьӧс тӧдмӧдіс, кыдзи налы колӧ асьнысӧ кутны урок вылын, переменаяс дырйи, гортын.

Кыліс звонок. Первойя урок помасис. Но велӧдысь тшӧктытӧг места вывсьыс некод эз вӧрзьы.

— Ӧні, челядь, перемена. Шойччыштамӧй.

Учительница шпыньмуніс. Сы бӧрся мамъяс ставныс ӧтпырйӧ меліа нюммунісны, любуйтчисны том учительницаӧн.

Челядь да гырысьяс петісны классысь. Лида коли ӧтнасӧн, неуна волнуйтчӧ на. Мудзыштӧма. Но сьӧлӧм вылас лои кокни.

Учительскӧйӧ локтӧм бӧрын том учительницаӧс поздравитісны Степан Васильевич и директор Василий Иванович, тшӧтш и мукӧд учительяс. А Анна Степановна тшетшкӧдчӧмӧн шуис:

— Водз на поздравитнытӧ. Он на тӧд, мый артмас.

Лидалы тайӧ ёна парскис. А Степан Васильевич дорйис сійӧс:

— Нинӧм, Лидия Петровна! Быдӧнлы ӧд он угӧдит.

Сэсся шмонитӧмӧн ас йывсьыс висьталіс:

— Ме помнита ассьым первой урокӧс. Пыри классӧ да медвойдӧр босьті счёты, быттьӧкӧ бухгалтеръяскӧд занимайтчыны заводита.

Ставныс гажаа серӧктісны.


* * *

Талун кежлӧ став урокъяс помалӧм бӧрын Лида мӧдӧдчис гортас ӧтлаын завучкӧд. Сылы зэв окота вӧлі тӧдны, кыдзи, завуч ногӧн, муніс сылӧн первой урокыс. Лидалӧн эз на вушйы школаын велӧдчан модаыс, кор быд урок юалӧм бӧрын учитель пыр жӧ донъялас тэнсьыд тӧдӧмлунтӧ, пуктас отметка. Но Степан Васильевич нинӧм эз шу. Лида дузгӧдчыліс, сэсся пыр и бурасис, кор видзӧдліс завучлӧн думыштчӧм да мелі синъяс вылӧ, долыд лои сьӧлӧм вылас, кыпыда прӧщайтчис важ учителькӧд.

Туй вылас паныдасис дед, коді вӧлі Лида урок вылын. Сійӧ, вӧлӧмкӧ, скӧтнӧй двор тшупанінысь волӧма гортас.

— Талун кежлӧ помасис, Петровна? — нюммуніс старик.

— Помасис, дедушка, помасис, — кыпыда шуис том учительница.

— А тэ найӧс, зонпоснисӧ, первойсяньыс крепыдджыка... эн пӧтакайт, — шуис дед.

— Ладнӧ, дед, — серӧктіс Лидия Петровна.

Дед мудера видзӧдліс сы вылӧ, пельпом вывсьыс лӧсьӧдыштіс черсӧ да, кокъяссӧ кыскыштӧмӧн, мӧдӧдчис водзӧ.

Лида синъяссӧ долыда чӧвтліс дедлань, сэсся тэрмасис гартас. Сьӧлӧмыс сылӧн талун нимкодясис сідзи, кыдзи некор на эз нимкодясьлы.

Сӧмын на Лида воськовтіс порог вомӧныс, Таня уськӧдчис сы дінӧ да ляскысис бердас. Лида кутыштліс сійӧс, а сэсся шыасис кӧзяйка дінӧ:

— Катерина тётя, кутшӧм талун меным долыд.

— Дерт, долыд, Лида! — шуис кӧзяйка. — Кыдзи нӧ?.. Уджӧ первой босьтчигад век тадзи овлӧ.

Лида тӧдіс, мый Катерина тьӧтка оз зэв радейт ышмӧдны мортӧс, пыр мыйкӧ да водзӧ вылӧ витас. Татшӧм вочакыв и виччысис кӧзяйкасянь, сы вӧсна зэв лышкыда серӧктіс. Сійӧ локтіс зеркала дорӧ, аддзис ассьыс ӧні мыйлакӧ сэтшӧм ёся видзӧдысь да радлысь синъяссӧ, малыштіс сотчымӧн банйӧм чужӧмсӧ, видзӧдліс морӧс вылас да гордӧя лӧсьӧдыштіс комсомольскӧй значоксӧ. Талун Лида асьсӧ лыддис сэтшӧм мортӧн, кодлы став йӧзыс, радейтана сӧветскӧй Рӧдина, комсомол, партия сетісны ыджыд козин.

Думыштіс та йылысь том учительница Лидия Петровна и пыдісянь ышловзис. Ышловзис эз шогла, а помтӧм долыдла. Кутшӧм али шог том мортлы паськыд олӧмӧ пыригӧн!


Гижысь: 
Гижӧд
Паськыд олӧмӧ пыригӧн
Жанр: 

lkejrlkelkrgner klrjnelknfrkl ekjnrjkenfrej

1