ЫДЖЫД СЬӦЛӦМА ВАСЬ


— Оштӧ лыйигад, челядь, главнӧйыс, оз ков повзьыны. Мед сійӧ тіянысь полӧ. Киыд кӧ тіралӧ, сэки пуляыд быдлаӧ вермас веськавны, сӧмын оз Кӧзяиныдлы сьӧлӧмас. Да и сьӧлӧмтӧ сьӧкыд корсьны, оз ӧд тыдав, сайӧдӧма сійӧ ошкыдлӧн кыз кучикнас да кузь гӧннас. Вермас лоны и веськыд бокас. Сюрлӧны ӧд йӧз, газетъясад тай гижлӧны, нэмсӧ оласны да пӧрысьӧ-немӧ казялӧны, мый сьӧлӧмыс веськыдладорас. А овлӧны и кык сьӧлӧмаӧсь. Шуам, лыйинныд ті оштӧ. Шуд вылад веськалінныд ӧти сьӧлӧмас, а мӧдыс уджалӧ. Вот сэки и таскайтас Микайлӧыд тіянӧс, косявлас гачьястӧ. Та вӧсна пыр колӧ метитны ошкыдлы юрас. Сійӧ сылӧн ӧти, а сюрас кӧ кык юра, сэки, ме думысь, казяланныд тайӧс асьныд, — тадзи велӧдіс кыйсьыны том йӧзӧс РОВД-лӧн дежурнӧй юкӧнын Семен Вась.

— Асьныд нӧ уна-ӧ ошкӧс кыйлінныд? — юаліс ӧти кывзысь.

— Ме, челядь, абу браконьер да лицензиятӧг вӧр-ватӧ ог тшыкӧд. Колӧ ӧд кутны экологическӧй ӧткодьлун. Тшук кывлінныд, мый сійӧ сэтшӧмыс. Ӧтилаын кӧ мыйкӧ чинӧ, природаыд пыр жӧ сэтчӧ мыйкӧ мӧдӧс содтас, да нӧшта сэтшӧмтор, мый миянлы ньӧти оз кажитчы. Та вӧсна зэв гежӧда прӧстӧ сідз ошкыдлы лыйла. А вот том дырйи кыкысь паныдасьлі Кӧзяиныдкӧд да сы йылысь верма висьтыштны, кывзанныд кӧ, быттьӧ.

— Кывзам, кывзам, Василий Семёнович, — ыззьӧдісны сійӧс том йӧз.

Но, кывзӧй, инӧ. Том на, ар дас вит — дас квайта ме сэки вӧлі. Батьӧ уна лэч туйӧн вӧдитчыліс да меным тшӧктӧ вӧлі кыйны медся матыссасӧ, мед аслыс шойччыштны ӧти лун. Вот муна лэч туй кузяыд, а аслым любӧыд! Батьӧлысь важ ружьесӧ пельпом сайын кыска. А арыс сэки лёк вӧлі. Ни тусь, ни тшак, ни пӧтка эз вӧв. Мамӧ сетіс меным чуман, мед мый сюрас, сійӧс сэтчӧ и дзумга. Довга надзӧникӧн ордым кузяыд, некодӧс ог аддзы. Ружье пельпом сайын дӧсадитчӧ, лыйны нинӧм оз веськав. Вои Чужмӧр ёль дорӧ, а сэні сэтӧр кустъяс быдмӧны, и тусьяс тыдалӧны. Сувтӧді ружьеӧс мыр бокӧ и сэтӧртӧ вота. Видзӧднысӧ быттьӧ эм, а чукӧртны кутан да абу. Но, мый воті — воті. Ружье босьті да водзӧ тапки. Аддзи ньывпу бокысь зэв мичаник ягсер, бара пӧрччи ружьетӧ, сувтӧді пу бокад, мешайтчӧ ӧд гӧрбыльтчынытӧ. Вунді ягсертӧ, чуманӧ дзумги и бара водзӧ лэч туй каття. Верст кымын, думысь, муні, казялі, мыйкӧ зэв кокни восьлавны, пельпом сайын нинӧм оз мешайтчы. Ружьеыд абу! Нетшыштчи бӧрвыв, думайта, тайӧ ме ньыв пу дорад вунӧді, кытысь ягсертӧ босьті. Вои сэтчӧ, видзӧда да, пищальӧй пу бокад абу. Сё дивӧ тай! Тшук менам сійӧ кольӧма сэтӧр вотанінад. Муні сыланьӧ. А зэв бура помнита, кыдзи мыр бокад сувтӧдлі. Да-да, сэні и эм, ачымӧс тадзи такӧда. Вои Чужмӧр ёль дорӧ, и мый жӧ ме аддза? И сэні ружьеӧй абу! Мый сэсся керан? Кыдзи батьӧ водзын правдайтчыны кута? Брӧд ва пӧсялі, быдсӧн юрси йылӧд визувтӧ ньылӧмӧй. Надзӧникӧн бара водзлань мӧдӧдчи, гашкӧ, нӧшта на кытчӧкӧ пуктылі? Локті ягсер босьтанінӧ, видзӧда да, эсканныд онӧ? Ружьеӧй ньывпу бердад сулалӧ, менӧ виччысьӧ. Шензьы кӧть эн. Ӧніӧдз на ог тӧд, кыдзи сідзисӧ вермис лоны. Ӧд ӧтарӧсӧ мунігӧн зэв бура видзӧді, пу дорас нинӧм эз вӧв. Ружьеыд абу ем! Кодкӧ гырысь кыйсьысьяс веськавлісны да шмонитісны ме вылын али мый?

Но, сэсся сьӧлӧм местаын нин. Водзӧ муна, лэч туй кыя, тшак босьтала. И друг джӧмді места вылӧ. Видзӧда да — паныд ош локтӧ. Зэв тай ыджыдӧн меным сэки кажитчис-а. Сулала, сы вылӧ видзӧда, а ошкыд — ме вылӧ. Надзӧникӧн лэдзи чуманӧс муӧ, пельпом сайысь ружьеӧс босьті, сьӧла зарад перйи стволысь да сюйи ӧтка пуляа патрон. Окті куроксӧ и ньӧжйӧникӧн лэпті пищальӧс, метитчи бура. И вочасӧн-вочасӧн личка пезьдан вылас, кыдзи батьӧ велӧдліс.

Личка-личка, а лыйӧм шы оз кыв. Мый вынысь нин личка, а ружье век оз лый. Мый нӧ тайӧ, лыйлас оз нӧ талун? Казялі да, водз чуньӧй вӧлӧм оз кусыньтчы. Повзьӧмӧйла кынмӧма веськыда да сідзи и кольӧма. А ошкыд сэсся кежис, весиг эз виччысьыштлы, кор менам чуньыд куснясьны кутас. Гортӧдз пыр сідзи веськыд чуньӧн и локті, узьӧм бӧрын сӧмын прӧйдитӧма. Тайӧ менам вӧлӧма шок, кыдзи тай рекламаад петкӧдлӧны.

А мӧдысь паныдасьлі Мишкаыдкӧд, но сэки неуна ыджыдджык нин вӧлі. Сійӧ жӧ лэч туй кузяыс тапикта. А Чужмӧр ёль дорад пыр пажнайта ӧтилаын. Бипур места дась, мӧтыр лӧсьӧдӧма и, сӧмын ватӧ гумовтышт да битӧ чуткы. Вои сэтчӧ, личӧдчи, нопйӧс пӧрччи, ружьеӧс пу бокӧ мыш сайӧ сувтӧді. Перъялі нопйысь сёянтор. Лӧня сідзи пукала, мошкоритча, самӧй кӧсъя биасьны. И кыдзкӧ эз ло лӧсьыд сьӧлӧм вылын. Синъясӧс лэпті да шемӧсми: веськыда меланьӧ ордым шӧртіыд варгыльтӧ Микайлӧ Иванӧвичыд! Мед не повзьӧдны, гусьӧникӧн пу бокысь босьті двустволкаӧс, абу нин важ ружьеыд. Кыкнан куроксӧ окті, веськӧді Мишук вылӧ. Бура метитчи, мед бокӧ ог жӧ веськав, личкышті ӧти стволсьыс пезьдансӧ, ружье оз лый — осечка! Мӧдсьыс — бара осечка! Мый нӧ тайӧ, бара али мый чуньӧй оз куснясь? Видлі — куснясьӧ. А ошкыд менӧ казяліс, сувтіс да весыштіс сӧмын туй вывсьыд! Сы мында ме сійӧс и аддзылі.

Но, мый тані вӧчан? Бӧр бергӧдчи ружьеӧс пу дорӧ сувтӧдны, кватитчи да — пищальыд сэні.

— А мый нӧ эськӧ киад вӧлі?

— Киад? Киын вӧлӧма мӧтыр.


Гижысь: 
Гижӧд
Ыджыд сьӧлӧма Вась
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1