КЫДЗИ ЛОӦ РОЧӦН ВА

Сьӧкыд, кор рочнад он куж. Евлог со нёль арӧссянь велаліс лыддьысьны, но библиотекаысь вермӧ босьтны сӧмын коми небӧгъяс. А рочьяс пиысь кӧ кутшӧмӧскӧ восьтлас, то нинӧм сэтысь оз гӧгӧрво. Учительница Василиса Николаевна аддзис детинкалысь нырасьӧмсӧ да козьналіс сылы роч буквар. Но и сэтысь омӧля жӧ гӧгӧрвоан, кӧть и морта книгаыс. Со серпасалӧма детинкаӧс, сійӧ пукалӧ пызан сайын да сёйӧ. Уліас гижӧма: «Роман ест». Позьӧ гӧгӧрвоны, мый Роман — сійӧ детинкалӧн нимыс. «Ест» — сійӧ тшук лоӧ — сёйӧ. Коминас, сідзкӧ лоӧ: «Роман сёйӧ». Орччӧн мӧд серпас: детинкаыс киас кутӧ чашка. Гижӧма: «Роман пьёт». Мый, бара-й тайӧ лоӧ-а? Тшук тайӧ лоӧ: «Роман пӧт». Но да, сідзи и лоӧ, сёйис, юис и пӧтіс. Коймӧд серпас вылын детинкаыс чеччӧма пызан сайсьыс. Гижӧма: «Роман сыт». «Сыт» — сійӧ, дерт, лоӧ сіт. Евлоглӧн весиг серамыс петіс. Но и рочьяс, мый гижӧмаӧсь! Сёйис, юис тайӧ Романыс, а сэсся сараяс петаліс. А водзӧ и дзик нин гӧгӧрвотӧм. Эновтлыны ковмас тайӧ роч буквартӧ.

Евлог — зэв писькӧс морт. Кывліс, кыдзи Василиса Николаевна шуис роч кыв да содтіс, мый сыла ветлас. Детинка эз вунӧд тайӧ кывсӧ да гусьӧникӧн кыйӧдіс, мый жӧ ваяс учительницаыс. А сійӧ вайис ва.

Евлог пырис гортас да юаліс ыджыд мамыслысь:

— Вот кыдзи лоӧ рочӧн ва?

— Сійӧ ӧд вода кӧ-а?

— Абу! Водаыд ӧд лоӧ узьны водӧм. А ваыд рочнад лоӧ аждвао, тадзи Василиса Николаевнаыд шуис.

— Сійӧ, дерт, велӧдчӧм мортыд, тӧдӧджык. Ноко, выльысь висьтав.

— Аждвао!

— Зэв тай сьӧкыд кыв.