РОЧ СЬЫЛАНКЫВ
Кытчӧдз челядь эз на пырны школаӧ, налы зэв окота вӧлі велӧдчыны. Сідзи и кыскис посни йылӧмӧс сэтчӧ, школа гӧгӧрын и гиблитчисны. Ӧтчыд Василиса Николаевна лэдзис найӧс пукыштны партаяс сайӧ, мед видзӧдласны, кывзыштасны, кыдзи налӧн ыджыдджык ёртъясыс мырсьӧны-велӧдчӧны. Сэтшӧм нимкодя пырисны классӧ, пуксялісны нёльӧд класса велӧдчысьяскӧд орччӧн.
Первой гырысьяс лыддисны ичӧт войтырлы коми мойдъяс, а сэсся сьылісны рочӧн. Евлог ёнасӧ эз гӧгӧрво, мый йылысь висьтавсис сьыланкывъяс, но мыйсюрӧ век жӧ вежӧртіс.
Велӧдчысьяс вомъяснысӧ паськыда восьталӧмӧн горзісны:
Рано-рано утром на парад
Вышли по команде тысячи солдат.
Все они герои — молодцы,
Армии Советской они бойцы.
Евлог сюся кывзіс налысь сьылӧмсӧ, но кыліс неуна мӧд ногӧнджык:
На крен лёвской баш не десеть бьёт,
Маршал выежает изболь шикво рот.
Маршал ӧбижает стрӧй салдат,
Красные знам ёна ог нём горат.
Евлоглы синва петмӧн жаль вӧлі салдатыс, кодӧс Енмыс ӧбӧдитӧма, сідз нин стрӧй, да нӧшта на кутшӧмкӧ маршал сійӧс ӧбижайтӧ. Син водзас, быттьӧ збыльысь аддзӧ, сувтіс кӧтасьӧм гача ичӧтик салдат, коді кутӧ киас ёсь штыка кузь винтовка. А сы водзӧ петіс кыз рушкуа, Ӧлеш Митрей чужӧма маршал да кутіс вежнясьны, быд ногыс эльтны салдатӧс. Тадзи жӧ коркӧ и Евлог вылын сералісны, кор сійӧ прӧступитіс ворсігас да кӧтӧдіс гачсӧ. Зэв деливӧ сэки вӧлі. Гортас локтіс бӧрдігтырйи, кынмӧма. Эз сэтшӧма кынмӧмсьыс бӧрд, а сыысь, мый сы вылын сералісны да эльтісны гырысьджык челядь. Медся ёна старайтчис Ӧлеш Митрей, коді сідзи и чиклясис Евлог водзын да нимтіс: «Стрӧй Евлог, стрӧй Евлог!» Сэки весиг Шуриклы, коді челядь пиын вӧлі медся ыджыд, жаль лои Евлогӧс да горӧдіс Митрей вылӧ: «Ланьт, йӧй!» Но Митрей вочавидзис кыськӧ кывлӧм шусьӧгӧн: «Йӧйыд некытчӧ оз вӧй, а стрӧйыд вольпасяс вӧйӧ».
Школаысь локтӧм бӧрын Евлог юаліс ыджыд мамыслысь:
— Ыджыд мамӧ, а стрӧйяссӧ ӧмӧй армияас босьтлӧны жӧ?
— Ог бара-й тӧд. Висьысьястӧ оз кӧ нулыны служитнытӧ-а. Тэ, бурджык, батьыдлысь юав.
Но батьыслысь юасьны Евлог оз лысьт, полӧ. Коркӧ ачыс ыджыда быдмас да гӧгӧрвоас. Сӧмын кор на тайӧ лоӧ?!
