А КОМИЯСЫС МЕДСЮСЬӦСЬ


Клуб дорын кино виччысигмоз гиблитчисны челядь. Евлог матыстчис на дорӧ и кутіс кывзыны, мый йылысь мунӧ сёрниыс. Ставӧн кытшалӧмаӧсь Шурикӧс, коді велӧдчӧ Веждінын и, дерт, уна тӧдӧ.

— Велӧдам английскӧй кыв. Зэв сьӧкыд. Главнӧйыс — ӧтитор гижӧма, а колӧ лыддьыны дзик мӧдтор. Шуам, гижӧма — Михаил, а мый колӧ лыддьыны? Кыдзи чайтанныд?

Некод, дерт, эз тӧд. Та вӧсна Шурик ачыс и вочавидзис:

— Майкл! Вот мый колӧ лыддьыны!

Челядь шызисны, кодсюрӧ серӧктісны.

— Сійӧ мый на, гижӧма кӧ — Манчестер, колӧ лыддьыны — Ливерпуль.

— Мый нӧ тайӧ англичанаыс, дзик йӧйӧсь али мый? — чуймис Евлог.

— Абу нин, дерт, ёна сюсьӧсь. Французъяслӧн сідз жӧ нинӧм он гӧгӧрво. Гижӧны — Аугер, лыддьӧны — Оже. Да нӧшта найӧ пыскыльтӧны посни кагаяс моз, оз артмы «ры»-сӧ шуӧмыс да. Немечьяслӧн неуна кокниджык, налысь кӧть позьӧ мыйкӧ да мыйкӧ гӧгӧрвоны. Шуам, штуль — сійӧ лоӧ улӧс. Рочьяслӧн моз жӧ. А тюр — ӧдзӧс.

Челядь бара серӧктісны.

— Мун пӧ татысь тюр.

— Рочьяслӧн ӧд эм жӧ сэтшӧмыс, гижӧма — кого, его, а лыддьӧны — ково, ево.

Евлог кывзіс Шуриклысь висьталӧмсӧ да ас кежас мӧвпаліс: гырысь классъясын кутас велӧдны немецкӧй кыв, мед война кӧ пансяс, сійӧс мӧдӧдасны враг тылӧ разведчикӧн. Кутас ветлӧдлыны фашистъяс пӧвстын немецкӧй формаӧн да тӧдмавны налысь гусяторъяссӧ. Ковмас, дерт, бура велӧдчыны, мед сӧмын шлочкыны-сёрнитны на ногӧн.

И друг юрас сылы воис мӧвп: «А ми ӧд, комиясыд, кыдзи гижам, сідзи и лыддям. Артмӧ, мый комияс — медсюсьӧсь!»

Таысь детинкалӧн ичӧтик сьӧлӧмыс тыри ыджыд радлунӧн. Збыль ӧд, мыйта йӧз мирас, а некод абу гӧгӧрвоӧма гижны сідзи, кыдзи сёрнитӧны. А вот найӧ — комияс, мед кӧть и этшаникӧнӧсь, абу кыпӧдчысьӧсь, а кужӧмаӧсь вӧчны сэтшӧм прӧстӧйтор: колӧ гижны сідзи, кыдзи лыддян, а лыддьыны, кыдзи сёрнитан.


Гижысь: 
Гижӧд
А комиясыд медсюсьӧсь
Жанр: 

lkejrlkelkrgner klrjnelknfrkl ekjnrjkenfrej

1