ПӦРЫСЬ ПОЖӦМ
Вӧрса изӧрмӧм туй бокын, коді тӧдас кымын во нин, сулалӧ ыджыд да кыз пожӧм. Кымын арӧс сылы, некод оз тӧд. Сійӧс аддзылісны миян пӧльяс и батьяс.
Ылӧдз тыдалӧ шочиник вожъяса пу. Матігӧгӧрса козъяс да кыдзьяс сы дінын кажитчӧны карликъясӧн. Кокыс пожӧмлӧн сэтшӧм кыз, медся кузь кияса мортлы не сывъявны сійӧс. Тырмылӧма тай, майбырлы, выныс! Чатыртчылан кӧ сы вылӧ, юрсьыд шапкаыд усьӧ.
Вӧліны кӧ сылӧн синъяс, ылӧдз эськӧ вермис видзӧдны. Быттьӧ стӧрӧж, сулалӧ да видзӧ пармаыслысь чӧвлунсӧ. Тайӧ пу дорас тшӧкыда пуксьывлӧны шойччыны вотчысьяс, вӧрӧ волысьяс. Быд пӧрйӧ, кор тайӧ местаас веськавла, пуксьывла сы дорӧ и ме. Малалышта киясӧн коксӧ, нюмъёвта: «Но мый? Кутшӧма олан-вылан?»
Унаысь казявлі, кыдзи пожӧм вылӧ пуксяс гӧрд чышъяна сизь да ён нырнас пыр клёнгас чӧв олысь пу кузя. Кор пуыс ён да том вӧлі, тӧдӧмысь, сизьлы тані немтор вӧлі вӧчнысӧ. Тайӧс, буракӧ, гӧгӧрвоӧ пӧрысь пожӧм и оз дӧзмы вӧрса лэбач вылӧ. Колӧкӧ, сизьыс думнас кӧсйӧ нэм помсӧ нюжӧдны пуыслысь, висьӧмысь сійӧс видзны, сы пытшкӧ дзебсьӧм пучӧйяссӧ бырӧдӧ, медым пожӧм сьӧлӧмӧдз найӧ эз вермыны пырны.
Мелі шонді лыдтӧм-тшӧттӧмысь киасьліс да чолӧмавліс вӧрса быдтасӧс. Шоныд гожся зэръяс мыськавлісны сылысь ки-коксӧ, небыд лым чиръяс пуксьывлісны сы вылӧ шойччыны. Вӧрса гулюяс и сьӧла-таръяс гажӧдлісны сійӧс.
Кор пожӧмыс вӧлі томджык, сы кудриясын быд ар ӧшавлісны сирӧд кольяс. Тэрыб вӧраса уръяс да гӧрба ныра уркайяс вель тшӧкыда чӧсмасьлісны вӧрса кӧзяйка ордын. Некодӧс пуыс эз вомавлы ни чирыштлы. Быдӧнлы кӧсйис вӧчны буртор. Аслас кузь нэмӧн вель уна кӧйдыс сійӧ кояліс ас гӧгӧрыс, медым мукӧдъяслы сетны олӧм.
И со ӧні пӧч кодь пӧрысь пожӧм бокын быдмӧны вӧсньыдик пожӧмъяс. Том пуяс тӧладжык лунъясӧ челядьяс моз дӧзмӧдчӧны ӧта-мӧдныслы.
Коркӧ, дерт, дзикӧдз слабитас уна вояс чӧж сулалысь пожӧм, вермас сійӧс пӧрӧдны и вына тӧв. Но том пожӧмъяс сы моз жӧ кутасны гажӧдны тайӧ туй кузяыс ветлысь-мунысьясӧс. Сьывны налы аслыссяма сьыланкывъяс, быдӧнлы козьнавны дзоньвидзалун да вӧрса чӧскыд кӧр.
Сідзкӧ, эз весьшӧрӧ ов пӧрысь пожӧм.
