ВӦРАЛЫСЬ ДА ГЕОЛОГЪЯС


Поводдяыс ӧдтӧм пывсян кодь: оз шонты, оз гажӧд. То векыштчӧм кымӧръяс коялыштасны му вылӧ кӧдзыд зэр войтъяс, то дрӧчка кодь лэчыд тӧв заводитлас горзыны лёк гӧлӧсӧн.

Корсюрӧ опӧстлас ю пӧлӧн нюжӧдчӧм парма, и пырысьтӧм-пыр мӧдас кокньыдасьны да ыръянитчыны арся зэръясысь ойдӧм Печора. Бордтӧм рака моз чеччалӧны да песласьӧны веж гыяс, быттьӧ скӧрмӧмаӧсь мыйыськӧ, инас оз ӧшйыны.

Вӧралысь Педӧр дядь, неыджыд тушаа, дженьыдик уска олӧма морт, пукаліс вӧр керкаын да медся мисьтӧм кывъяснас видіс ышмысь поводдясӧ. Мӧдӧд лун сійӧ эз петав пармаӧ, пукаліс вӧр пӧвстӧ дзебсьӧм «дворечын», кыдзи радейтліс шуны ассьыс оланінсӧ вӧралысь, да виччысис енэжыслысь бурасьӧм. Гажтӧм сьӧлӧм вылас. А зэр кисьтӧ и кисьтӧ.

Гажтӧмчӧ и Педӧрлӧн понйыс — сувтса пельяса, крукыля бӧжа, смоль сьӧд гӧна Лыско. Пон пуктылас нырсӧ ӧдзӧс дорӧ, кывзыштас, мый вӧчсьӧ ывлаас, и гажтӧма видзӧдлас кӧзяин вылӧ.

Педӧр гӧгӧрвоис понйыслысь гажтӧмчӧмсӧ, малыштіс сійӧс шыльыд гӧн кузяыс да надзӧникӧн шуыштіс:

— Омӧль миян делӧясным, другӧ. Таво кӧсйысим кык норма тыртны, йӧз водзын кыв сетім, а вежон чӧжӧн зэв на этша вайим прӧмыстӧ. Аддзан ӧд, ывлаас мый вӧчсьӧ, сӧкъя тшакыд. Абу тэ мыжа.

Дыр на варовитіс вӧралысь аслас нёль кока другыскӧд, кодкӧд быд ар кытшлавліс пармаяс, юкліс мудзсӧ да сьӧкыдлунсӧ. Тэрыб кокъяса, тӧлка Лыско лунтыр тшынйысяс-рисъялас, а зверь-пӧткатӧ корсяс. Эз ӧтчыд мездыв сійӧ и ассьыс кӧзяинсӧ, кор виччысьтӧг налы паныдасьлісны ош либӧ лэчыд гыжъяса вӧркань. Не Лыскоыс кӧ, колӧкӧ, Педӧр эз ӧнія моз нимав вӧралысьяс пӧвстын: уна небыд зарни кыйӧмысь кольӧм во орден ӧшӧдісны морӧс вылас.

Кӧть и эз вӧв кокни шедӧдны татшӧм славасӧ, но Педӧр дядь эз элясь аслас удж вылӧ. Дас нёль арӧса детинкаӧн сійӧ босьтіс первойысь киас пищаль. Таво нелямынӧд ар петіс прӧмышляйтны. Вӧралысьясӧн вӧліны и сылӧн дедыс да батьыс.

Лыско кӧдзыд нырнас тувкнитіс кӧзяиныслы пидзӧсас, гоз-мӧдысь ӧвтыштіс бӧжнас, быттьӧ кӧсйис юавны: «Дыр-ӧ нӧ тані кутам куткырвидзны?» Сэсся котӧртіс ӧдзӧс дорӧ, чошнитіс пельсӧ да заводитіс гораа увтчыны.

«Оз-ӧ нин кодкӧ лок?» — мӧвпыштіс вӧралысь да гурйыв восьтіс керка ӧдзӧссӧ. Печора берег пӧлӧн восьлалісны кык мужичӧй да нывбаба. Мыйкӧ дыра мысти найӧ ставӧн веськӧдчисны керкалань.

— Лэдз шойччыштны, вӧрса олысь, — ылісянь на шыасис тошка морт, коді восьлаліс медся водзын.

— Милости прошу, — рочалыштіс Педӧр да горӧдіс пон вылас, коді скӧра увтіс тӧдтӧм йӧзӧс.

— Мыйсяма йӧз? Кытчӧ туй кутад? — керкаын нин юаліс кӧзяин да сьӧд синъяснас видзӧдліс быдӧн вылӧ торйӧн.

— Геологъяс ми, батя. Кывлін сэтшӧм йӧз йывсьыс? Тасянь матын уджалам, — вочавидзис нывбаба, кодлы позьӧ вӧлі сетны ар нелямын. — Ой, кутшӧм тані шоныд, вокъяс! Но мый, абу рад, кӧзяин?

Пач вылас Педӧр пуктіс шыд тыра котёлок, сьӧдасьӧм ыджыд чайник, сэсся бара видзӧдліс гӧстьяс вылӧ да дивуйтчӧм пырысь заводитіс:

— Первойысь на аддза тайӧ местаяссьыс геологъясӧс. Сё збыль. Некор на эг паныдасьлы.

— Вот и аддзысим. Коймӧд тӧлысь ми танӧсь. Регыд бӧр мунам, — тэрыба сёрнитіс тошка геолог.

— Сідзкӧ, регыд менӧ вӧтланныд татысь? — ышловзис Педӧр дядь.

— Мыйла вӧтлам? Кыйсьы на здоровье. Тӧрам, пармаыс паськыд, — дженьыдик куртка вывсьыс вӧсньыдик чуньяснас заводитіс разявны кизьяссӧ нывбаба.

Сьӧкыд вӧлі гӧгӧрвоны, мый йылысь думайтӧ вӧралысь. Быдӧн пӧрччысисны, пуксялісны матӧджык пач дорӧ, кӧні оняліс шоныдыс.

— Он тай полӧй татшӧм поводдянас ветлӧдлыны, кӧтасьӧмыдӧсь медбӧръя сунисӧдзыс, — геологъяскӧд варовитіс вӧралысь да паськӧмъяссӧ налысь ӧшліс сёр вылӧ. «Налӧн абу жӧ нин олӧм. Гожӧмбыд и арнас уялӧны нюръясӧд, пармаясӧд. Номйыд, лӧддзыд вильӧдӧ. Кынмалӧмыд, кӧтасьлӧмыд сюрсьӧ. И семья, тӧдӧмысь, быдӧнлӧн эм», — думнас жалитыштіс геологъясӧс вӧралысь.

Сэсся Педӧр пуктіс пӧвъясысь тувъялӧм пызан вылӧ тар шыд тыра котёлок да корис гӧстьясӧс нуръясьыштны да юыштны чай. Геологъясӧс ёна тшӧктыны эз ковмы, перйисны мешӧкъяссьыс кӧрт кружкаяс, паньяс, пуксялісны пызан гӧгӧр и пыр жӧ заводитісны азыма сёйны. Панясьӧны да гӧлчитӧны. Педӧр дядь видзӧдӧ нывбаба вылӧ да шензьӧ: «Нывбабасӧ мыйла нин босьтӧмаӧсь аскӧдныс? Делӧ ӧд сылы, сьӧд вӧртіыд уявныд. Колӧкӧ, гортас челядь коли. Абу тайӧ бабйӧй удж».

Кор мужикъяс куритісны нин мӧдӧд папиросӧн, Педӧр дядь юаліс налысь:

— Сэсся нӧ, шань войтыр, мый, думсьыд, корсянныд менам кыйсянінъяссьыс, быттьӧ позьӧ кӧ висьтавны?

— О, Войвылыд ӧд озыр! Быдторйыс тані эм: из шом, нефть, газ... Унатор нин аддзисны, но унатор йылысь на и огӧ тӧдӧй, — заводитіс баитны том геолог, коді ӧнӧдз сёрниӧ эз на шыасьлы. — Вот и колӧ тӧдмавны выль местаяс, аддзыны выль озырлунъяс.

Педӧр дядь вӧралігад шоча паныдасьлывлӧ йӧзыдкӧд, гажыс бырӧма, да и окота варовитыштны. Юасьӧ и юасьӧ.

— Чайтад, и тайӧ местаяссьыс мыйкӧ сюрӧ?

— Коді корсьӧ, батя, пыр аддзӧ, — нюмъёвтіс нывбаба да видзӧдліс ывлаӧ.

Поводдяыс пыр на лёкаліс. Абу на мудзӧма тӧлыс, омлялӧ, мурзӧ. Зэр то ӧддзылас, то ланьтыштлас.

Вӧралысь кывзіс геологъяслысь сёрнисӧ и думнас нимкодясис аслас чужан муӧн. «Айда, Коми му, быдлаын кутісны тӧдны миян йылысь. Эг чайтлы, и ставыс! Колӧкӧ, некымын во мысти менам вӧр керка местаын кутасны стрӧитны посёлок либӧ выль кар. Быдторйыс вермас лоны ӧнія каднад».

Геологъяс тэрмасисны асланыс базаӧ, кӧть и Педӧр дядьлы зэв на окота вӧлі пукыштны ӧтлаын шоныд керкаын.

— Мӧдысь на кежавлӧй ме ордӧ, онӧ кӧ, быттьӧ, регыд мунӧй, — корис кӧзяин.

— Волам, волам, тэ ордын сэтшӧм лӧсьыд, — вашъяліс нывбаба.

Мунісны гӧстьяс, но Педӧр дядь ас кежас кутіс жалитны кыйсян местаяссӧ, кодъяскӧд сылӧн йитчӧма уна казьтылӧм. Тайӧ геологъяс мозыс жӧ сійӧ уна вежонъяс чӧж ветлӧдліс парма кузьта, корсис небыд зарни. Ӧні сійӧ эз нин вермы пукавны вӧр керкаын да виччысьны поводдяыслысь бурмӧмсӧ.

Педӧр дядь видзӧдліс часі вылӧ, сэсся шыасис Лыско дінас:

— Гашкӧ, петалам пармаас пальӧдчыны, дыр-ӧ позьӧ ружтыны, Лыско?

Лыско быттьӧ тайӧс и виччысьӧма. Заводитіс ӧвтчыны бӧжнас, чеччавны кӧзяиныслы морӧсас. А вӧралысь салдатскӧй шынельсьыс вурӧм тужурка вылас пасьталіс нин лаз, босьтіс пищаль да чер и мӧдӧдчис пармаӧ. Понйыс котӧртіс водзвылас.


Гижӧд
Вӧралысь да геологъяс
Жанр: 

lkejrlkelkrgner klrjnelknfrkl ekjnrjkenfrej

1