ВИЗУВТӦНЫ НИМТӦМ ШОРЪЯС


Емваль юӧ усьӧ ичӧтик шор. Дыр сылы лоӧ писькӧдчыны татчӧдз. Унаысь сійӧ зурасьлас пӧрӧм пуясӧ, вель тшӧкыда вежлас мунан туйсӧ. Кор воас Емваль дорӧдз, неыджыд визув ю пыр и шымыртас сійӧс, аслас кабыръяс улӧ босьтас. Сэсся мӧдас аскӧдыс нуны водзӧ, весиг шорысь петӧм ваыслысь оз юав, мыйла да кытчӧ нуӧ сійӧс. Нуӧ и ставыс. Сідз быттьӧ и колӧ.

Ӧдйӧ тай кольӧны вояс. Варччӧм кокъяса, ситеч дӧрӧмъяса детинкаяс, ми быттьӧ дзик на неважӧн волывлім гожся лунъясӧ тайӧ тӧдса шор дорас. Вугравлім сэтысь зарни бордъяса шниткиясӧс, чунь кузя налимъясӧс, сэсся и найӧс жаритлім бипур вылын. Ас кыйӧм черилӧн чӧскыд кӧрыс ӧні на кылӧ вомын. Нянь пыдди азыма сёйлім шомкор — шома, но чӧскыд. Шорыс кывлывліс миянлысь серам-гажӧдчӧм, мича сьыланкывъяс и чуксасьӧмъяс.

Ставыс тайӧ вӧлӧма мойдын моз. Кадыс сэсянь удитіс визувтны шор мозыс жӧ зэв ылӧдз.

Емвальсянь неылын ӧні нюжӧдчӧма кӧрт туй, коді мунӧ Сыктывкарсянь Микунь карӧдз. Веськыдвылас, кӧні ми вотлывлім чӧдлач да ыжнёньӧн краситлывлім сера бедьяс, кыптісны лесопромышленнӧй комплекслӧн корпусъяс, уличаяс пӧлӧн грымвидзӧны мичаысь-мича олан керкаяс. Лунысь-лун паськалӧ том Эжва кар.

Унатор вежсис тані бӧръя воясас. А шор пыр на важкодь, абу вежсьӧма ни пӧрысьмӧма. Уджалӧ, отсасьӧ Емваль юлы, олӧ быд лунъя олӧмӧн. Кузь, тыдалӧ, сылӧн нэмыс. Тулыснас сідзи жӧ ойдлӧ-паськавлӧ. Гожся шоныд лунъясӧ сэні важ моз сялькӧдчӧны зарни бордъяса шниткияс да тэрыба котралӧны берег пӧлӧныс вӧсни кокъяса истанъяс.

Татшӧм шоръяссӧ вель унаӧс позьӧ аддзывны Емваль ю пӧлӧн. Эз кӧ вӧвны татшӧм вӧрса посньыдик шоръясыс, гашкӧ, эз и сэтшӧм долыда овсьы Емваль юлы. Ӧд татшӧм отсасьысьясыс и буретш сетӧны сылы вын-эбӧс. Юкталӧны сійӧс водз тулыссянь сёр арӧдз, муяс кынмытӧдз, кытчӧдз сир кабыра кӧдзыдыс оз дор шоръяссӧ.

Кӧть и посниӧсь да нимтӧмӧсь татшӧм шоръясыс, но найӧ вӧчӧны уна буртор. Мырсьӧны-пессьӧны лун и вой, праздникъяс ни шойччан лунъяс оз тӧдлыны. Юкталӧны на гӧгӧрын быдмысь пуясӧс, сетӧны ассьыныс васӧ дзоридзьяслы, лэбачьяслы, зверьяслы. Видзӧны, медым парма-ягъясын эз паськав горш пӧжар. А кымын вӧралысьӧс, вотчысьӧс да шойччысьӧс юкталанныд ті, нимтӧм шоръяс, гожся да арся лунъясӧ асланыд чӧскыд кӧдзыд ванад! Лыддяс ӧмӧй кодкӧ тайӧс!

Тіянӧс позьӧ ӧткодявны зіль йӧзкӧд, кодъяс лишнӧй горзытӧг вӧчӧны ыджыд да колана удж: вердӧны да шонтӧны мукӧдъясӧс.

Со мый вӧсна и ми радейтам тіянӧс, нимтӧм-вичтӧм посньыдик шоръяс. Мый нӧ, онӧ кӧ ылӧдз нималӧй, мед, оз кӧ быдлаын тӧдны тіянӧс. Но энӧ кӧ вӧлӧй ті, эз эськӧ лоны и мукӧд юясыс.


Гижӧд
Визувтӧны нимтӧм шоръяс
Жанр: 

lkejrlkelkrgner klrjnelknfrkl ekjnrjkenfrej

1