СЁР АРЫН


Коді тӧдас, мый дыра нин бугжылясьӧ арся поводдяыс. Лунтыр зэрас, войбыд бушуйтчас, здук кежлӧ лӧньыштлас, бордъяссӧ личӧдлас, сэсся выльысь кыпӧдчас вына тӧв, заводитас нетшкыны пуяслысь коръяс, заборъясысь прӧстмӧм пӧвъяс. Дыш и ывлаас петны, быттьӧ абу и вӧвлӧмаӧсь шоныд лунъяс, югыд войяс. Оз нин гоньявны да петкӧдлыны вежнысӧ йӧзлысь дзоридзьяс, дженьыд тай вӧлӧма налӧн олан кадныс, кусіны, вывті водз пӧрысьмисны. Оз кывны ягъясын и вотчысьяслӧн гӧлӧсъяс. Мунісны шоныд муясӧ лэбачьяс, эновтісны миянӧс тулысӧдз уткаяс, дзодзӧгъяс, юсьяс. Зумышӧсь лоины юяс, тыяс. Быдӧнлы аслыс кад.

Оз нин гыбавны черияс, тыдалӧ, киссьӧм сукман кодь кӧдзыд да лёк поводдяыд и найӧс оз гажӧд. Кӧть и ва пытшкӧсад тӧлыс ни зэрыс оз веськав, тӧдӧны: помасис гожӧм.

Важӧн нин эз петкӧдчыв синъяс ёрысь шонді, дзебсьӧма кыз кымӧръяс улӧ, оз кӧсйы шонтыны.

Матыстчӧ шойччан лун, бара тірӧдчӧ сьӧлӧмыс медся яр чери кыйысьлӧн. Окота на кӧть ӧтчыд ветлыны ю дорӧ, прӧщайтчыны тӧдса местаясыскӧд, радейтана вӧр-ваыскӧд.

«Сідзкӧ, медбӧръяысь ветла. Регыд сэсся кынмавны кутас, лым вермас усьны, сэки нин мыйсяма кыйсьӧм-выйсьӧм», — шуи аслым ме.

Со и тӧдса места. Оз нин тыдавны гожӧмын моз чери кыйысьяс, тӧдӧмысь, лёк поводдяыс найӧс шоныд керкаясын пукӧдӧ. Ӧтнамлы ковмас коллявны бубуля войсӧ. Муртса удиті шыбитны донкаяссӧ, ю весьтӧ ӧшӧдчис нин пемыд шебрас. Дженьыдӧсь аръя лунъясыд, зато войыс кузь, мыйсӧ эг удит думайтны бипур дорын куткырвидзигӧн, кутшӧм дыр лои кывзыны тулыслысь пошиктӧмсӧ, гыяслысь скӧралӧмсӧ, кос пуяслысь дзуртӧм-зыртчӧмсӧ.

Пессьӧ Эжва, комияслӧн ыджыд да вына ю. Кӧть пемыдысла и эг аддзы сійӧс, но кыла сылысь вӧрӧшитчӧмсӧ.

Некыдз оз кӧсйы ӧзйыны бипур, уль песъясыс чишкӧны, сьӧласьӧны, но тӧлыс отсалӧ ярмӧдны сійӧс, сетӧ вын-эбӧс. Оз нин лунся мозыс зэр, тыдалӧ, кымӧръясыслӧн косьмис синваыс. Зэр пыддиыс ӧні ыдждалӧ лэчыд тӧв, писькӧдчӧ лыӧдзыд, кӧсйӧ кынтыны пӧсь сьӧлӧмтӧ.

Нюжӧдчи би дорӧ, водзӧс сотӧ, мышкӧй — кынмӧ. Бергала, жӧдза, ог тӧд, кыдзи и виччысьны асывсӧ. Гашкӧ, куимысь юи чай, медым ӧдйӧджык мунас кадыс.

Век жӧ аслым рад: эг повзьы, локті кыйсьыны. Сідзкӧ, вирӧдз пырӧма чери кыян делӧыс, ог нин вермы сытӧг овны.

Медым вот тадзи, ӧтнасӧн, пукавны да коллявны арся кузь войсӧ, кынмыны и кӧтасьны! Оз быдӧн вермыны миритчыны такӧд, небыд вольпасьнысӧ вежны би дорӧ вольсалӧм пӧв вылӧ, кутшӧмкӧ нёль-вит йӧрш да налим вӧсна коллявны узьтӧм войяс.

Сэсся тай коркӧ сявкнитіс жӧ югыд рӧм. Буракӧ, помасьны кутіс биа висьӧм кодь войыс, терпиті помӧдз. Ӧні позьӧ и кыйсянторъясӧс видлавны.

Гашкӧ и черитор шедас. Быд кыйсьысь ӧд мыйкӧ да мыйкӧ виччысьӧ, некод оз кӧсйы тыртӧм сумкаӧн бергӧдчыны гортас.

Первойя донкаыс куш, вугыръясас ӧшйӧмаӧсь кырсьяс да турунторъяс. И мӧдас некутшӧм чери абу.

«Гортын кӧ узи — бурджык вӧлі», — заводиті ыдждавны, видны ачымӧс. Но тадзисӧ прӧста шуася. Нинӧм вылӧ эськӧ гортын эг пукав.

Мӧді видлавны медбӧръя донкасӧ.

Но мый тайӧ? Кодкӧ со трук-трак вӧчис, зэлавліс быдсӧн жилкаыс. Дерт, мыйкӧ эм. А здук мысти мыччысис нин сой кузя налим, ниглясьӧ, шенасьӧ бӧжнас, ӧдйӧджык шыбиті берегӧ, челядь моз радла.

Эз весьшӧрӧ ло волӧмыс. Шуда на вӧлӧма, ӧні нин менам вуні ставыс: и дзик пемыд войыс, и бритва кодь лэчыд тӧлыс. Быттьӧ нинӧм эз и вӧв.


Гижӧд
Сёр арын
Жанр: 

lkejrlkelkrgner klrjnelknfrkl ekjnrjkenfrej

1