СЬӦКЫД ТУЙЫН

Валентина Сергеевнаӧс корисны больничаса заведующӧй дінӧ. Муртса сійӧ удитіс воськовтны порог вомӧн да ас бӧрсяыс пӧдлавны белилаӧн мавтӧм еджыд ӧдзӧс, кыдзи кыліс Ардальон Ивановичлысь тӧдса гӧлӧс:

— Пуксьӧй.

Заведующӧй меліа видзӧдліс Валентина Сергеевналы сьӧд синъясас, сувтіс сылы паныд.

— Ошкашор охотбазаысь воис радиограмма. Сьӧкыда висьмӧма вӧралысь Кынев. Виччысьӧны миянсянь отсӧг. Ковмас лэбзьывны, Валентина Сергеевна, тіянлы. Самолёт йылысь сёрнитчи нин.

Заведующӧй малыштіс паськыдкодь чужӧмсӧ, недыр чӧв олыштіс, думнас виччысис врачлысь воча кыв.

— Ме дась, Ардальон Иванович, — спокойнӧя вочавидзис Валентина Сергеевна. — Гортӧ сӧмын котӧртла, пасьтася шоныдджыка.

— Да, да, пасьтасьӧй. — Та бӧрын Ардальон Иванович топыда кутыштліс том врачлысь ичӧтик кисӧ, сэсся содтіс: — Надейтча, мый висьысьлы лоӧ сетӧма отсӧг.

— Вӧча ставсӧ, мый верма.

— Бур туй тіянлы, Валентина Сергеевна.

— Аттьӧ, — нюмъёвтіс врач.

Кор больничаса шофёр вайис Валентина Сергеевнаӧс аэропортӧ, лётчик вӧлі дась нин лэбзьыны.

— Метеорологическӧй станция юӧртіс, мый лун шӧр гӧгӧр вермас заводитчыны пурга, — тэрмасьӧмӧн шуыштіс врачлы кузиник тушаа лётчик.

— Эн повзьӧдлы, абу полысь рӧдысь.

— Ог повзьӧдлы, а висьтала.

Недыр мысти самолёт шумӧн нетшыштчис му бердысь, вӧчис ыджыд кытш да качайтчигтырйи кыпӧдчис кымӧра небесаӧ.

Лётчик став тушанас бергӧдчыліс пассажирлань, довкнитіс юрнас, мыйкӧ, кылӧ, нурбыльтіс, но мотор шумитӧмла Валентина Сергеевна немтор эз велав.

Самолёт лэбзис йиӧн дорӧм векньыдик ю пӧлӧн. Син водзті исковтісны выльысь-выль серпасъяс: вӧр массивъяс то недыр кежлӧ орлісны, то бара ӧтлаасьлісны. Вӧр пӧлӧн муртса тӧдчыштісны кузь туйяслӧн визьяс. Корсюрӧ тыдовтчылісны сиктъяс, лесоучастокъяс. Но кымын дырджык лэбисны, сымын шочджыка кутісны паныдасьлыны сиктъяс, ӧтарӧ-мӧдарӧ чукльӧдлысь ю пӧлӧн нюжӧдчис паськыд парма. Сылӧн эз тыдав пом ни дор.

Рытыввывсянь небесаыс кутіс дзикӧдз сьӧдасьны. Кыз кымӧръяс сьӧкыда ӧшйисны му бердӧ. Вочасӧн содысь лэчыд тӧв быттьӧ кӧсйис петкӧдлыны ассьыс вынсӧ: шыблаліс самолётсӧ то увлань, то вывлань.

Кадыс эз на прӧйдит часысь унджык, а поводдя торксис дзикӧдз, уль лым усис и усис помасьлытӧг. Вынйӧра тӧв гартіс лымсӧ, омлялӧмӧн нуис кытчӧкӧ водзӧ.

«Збыльысь ӧмӧй сэтшӧма лёкмас?» — полігтырйи видзӧдлывліс врач лётчик вылӧ.

Коли ещӧ минута вит. Заводитчис буретш сійӧ, мыйысь медъёна полісны лётчик да Валентина Сергеевна. Лёк тӧв сэтшӧма кутіс летны ичӧтик самолётсӧ, мый колӧ вӧлі пыр жӧ пуксьыны.

Лётчик лэбис нин дзик ю весьттіыс. Тыдалӧ, корсис пуксьӧм вылӧ шыльыдджык места.

Недыр мысти берег нӧрыс йылын мыччысис муртса тӧдчана стрӧйбаяслӧн сьӧд вуджӧр. Валентина Сергеевналӧн дрӧгнитіс сьӧлӧмыс, но самолёт паськыд лыжияснас исковтіс нин векньыдик ю кузя да гӧрис лымсӧ.

Кабинаысь петӧм бӧрын лётчик чышкыштіс гӧрдӧдыштӧм чужӧм вывсьыс пӧсьсӧ, капотӧн вевттис самолётлысь моторсӧ да, сикт вылӧ шуйга кинас индӧмӧн, висьталіс:

— Ошкашор туй вылын тайӧ медбӧръя сикт. Охотбазаӧдз ветымын километр.

— Ветымын! — шӧйӧвошӧм гӧлӧсӧн шуис врач да, джуджыд толаӧд восьлаліг, мӧдӧдчис сиктлань.

Ыб вывсянь ва дорӧ лямпаясӧн исковтісны некымын детинка, кодъяс мый вынсьыс горзісны ӧта-мӧдыслы:

— Самолёт! Самолёт!

Детинкаяскӧд тшӧтш Валентина Сергеевнаӧс сиктсӧветӧ колльӧдіс руч ку шапкаа, шабді кудель кодь еджыд тошка дед, коді паныдасис кыр йылын.

— Кутшӧм нин мог суис, бур нылӧй? — ичӧтик тушаа ныв вылӧ сюся видзӧдӧмӧн юасис пӧрысь морт.

— Ми охотбазаӧдз мӧдӧдчим, — пырмунігмоз чӧвтіс Валентина Сергеевна.

— Татшӧм поводдянас бур кӧзяин понсӧ оз лэдз, а тіян оз пукавсьы шоныд керкаад, — вомгорулас ропчитіс дед.

Сиктсӧветын Валентина Сергеевна дыр сёрнитіс председателькӧд. Дед кокъяссӧ кресталӧмӧн пукаліс лабич помын да корсюрӧ ӧвтыштлывліс руч ку шапканас, быттьӧ вӧтлаліс номъясӧс.

Лётчик воӧм бӧрын сиктсӧветса председатель йитчыліс районкӧд. Сэсянь юӧртісны, мый метеорологическӧй станция висьталӧм серти лёк поводдя вермас кыссьыны быдса недель чӧж.

— Мый мӧдам вӧчны, — тэрыба ветлӧдліс джодж кузя врач. Сы гӧлӧсын тӧдчис ӧбида да шӧйӧвошӧм.

— Кутам виччысьны, кыдз шуласны, море дорын поводдя, — нюмъёвтіс лётчик.

— Тэныд лӧсьыд серавныд, а менӧ сэні виччысьӧны, — врач скӧра видзӧдліс том морт вылӧ, быттьӧ сійӧ вӧлі мыжа омӧль поводдяысь.

Дед пыр на кыв шутӧг пукаліс лабич помын, сӧмын шапкасӧ ӧні чабраліс чорыдджыка да шочиника кыскыштліс чушкан табак.

— Оз-ӧ позь вӧлӧн сэтчӧ воӧдчыны? — председательлань бергӧдчис Валентина Сергеевна.

— Охотбазаӧдз сӧмын ӧти туй — охотникъяслӧн лыжнӧй трӧпа. Но и сійӧс ӧні тыртіс. Со ӧд мый вӧчсьӧ ывлаас!

— Мый нӧ вӧчны? Ӧд сэні сьӧкыда висьысь морт! — парсӧ курччӧмӧн нораа висьталіс врач. — А гашкӧ, лыжиӧн позяс писькӧдчыны?

Бӧръя кывъяссӧ шуӧм бӧрын Валентина Сергеевна весиг ачыс повзис.

«Верма ӧмӧй пурга дырйи мунны лыжиӧн Ошкашорӧдз? Лыжи вылас ӧд ме эг нин сувтлы институт помалӧмсянь, быдса нёль во».

— Лыжиӧн ӧпаснӧ петны татшӧм туйӧ, — делӧвӧя вочавидзис председатель. — Ветымын километр колӧ мунны вӧрӧд, кӧні абу некутшӧм олысь. Да и некодӧс ыстыны тэнӧ колльӧдны. Том йӧз пӧвстын, дерт, эмӧсь бур лыжникъяс, но найӧ уджалӧны лесоучастокын, нелямын километр сайын. Нывъяс жӧ туйсӧ оз тӧдны.

Тӧв быттьӧ ёнджыка скӧрмис, таркӧдіс ӧшинь рама тасъяс, омляліс труба пытшкын.

Лабич помын пукалысь дед, косіник кинас вомсӧ тупкиг, некымынысь кызӧктіс, малыштіс кудель кодь еджыд тошсӧ, надзӧникӧн шыасис:

— Дерт, охотбазаӧдз туйыс сьӧкыд и ылын, но морт кӧ отсӧг виччысьӧ, колӧ мунны. Тадзи и ме мӧвпала, бур йӧзӧй.

— Коді нӧ, Афанасий Кузьмич, босьтчас колльӧдны врачӧс? Тэнӧ али мый ме мӧдӧда? — гӧгрӧс синъяссӧ председатель чӧвтліс стариклань.

— А мый кӧть и менӧ! Думайтан, Опонь дед немтор вылӧ нин оз шогмы, — сэсся матыстчис председатель пызан дорӧ да видзӧдліс синкым увсяньыс. — Тэ тӧдан, кыдзи Опонь дед тайӧ ветымын километрсӧ ӧти лунӧн ветлывліс? Коді нӧ меысь бурджыка Ошкашорӧ туйсӧ тӧдӧ? Сэні ӧд ме кызь тӧв прӧмышляйтлі. Али вунӧдін, председатель?

Опонь дед дзормӧм юрсӧ бергӧдліс тӧдтӧм йӧзлань да зумыштчӧмӧн вешйис пызан дорысь.

— Висьысь морт сэні докторӧс виччысьӧ, а ті тані арталанныд, кыдзи да кодӧс мӧдӧдны. А тӧданныд-ӧ, мый меысь прӧст мортыс сиктын ӧні некод абу. Майбыр, кага ни баля оз бӧрд. Старука лун-мӧдтӧ и ӧтнас паччӧрын кургыштас.

Валентина Сергеевналӧн сьӧд синъясыс ворсыштісны долыдлунӧн. Сиктсӧветса председатель да лётчик гусьӧникӧн нюмъялісны. Найӧ эз гӧгӧрвоны: Опонь дед то ли шмонитӧ, то ли збыльысь кӧсйӧ отсавны врачлы.

Дед пыркнитіс паськыд тошнас, кыкысь помся пыраліс зептас чушкан табакла, кутыштіс сойбордйӧдыс врачӧс.

— Лыжинас сямман ветлыны, бур нылӧй?

— Бура ветла, бура! — врачлӧн кыдзкӧ асьныс петісны кывъясыс.

Дед косіник чуньяснас гыжйыштіс балябӧжсӧ, синсӧ читкыртыштӧмӧн сулыштіс ӧти местаын, быттьӧ думайтіс ыджыд дум.

— Тэрмасян кӧ, бур нылӧй, талун и позьӧ вӧрзьӧдчыны. Лун шӧр гӧгӧр на ӧд ӧні, а прамӧя пемдӧ вит часын. Буретш час кӧкъямыс кежлӧ воам вӧр керкаӧ, коді тасянь кызь километра сайын. Сэні шойччыштам и аски асыв петам водзджык, медым рытнас воӧдчыны места вылӧдз. Татшӧм делӧӧн нюжмасьны оз позь. Тадзи ме мӧвпала.

Председатель сьӧлӧмсяньыс топӧдліс Опонь дедлысь кисӧ.

— Сідзкӧ, дедушка, час мысти петам туйӧ, — радпырысь ышловзис Валентина Сергеевна. — Ме зэв рад, мый босьтчин отсавны. Аттьӧ тэныд, Кузьмич, ыджыд аттьӧ.

— Дзик немторйысь аттьӧавны менӧ, бур нылӧй. Тэныд колӧ аттьӧсӧ висьтавны. Со кытчӧдз писькӧдчан, медым висьысьӧс сувтӧдны кок йылӧ.

* * *

Дурмӧм поводдя пыр на нӧйтчис веж гыа скӧр море моз. Лэчыд тӧв нетшкис паськӧм пӧлаяс, вӧрӧдіс шапка пельяс, чашйис юрысь чышъянъяс. Керкаяс дорын ӧта-мӧд вежмӧн копрасисны вӧсньыдик пелысь пуяс, пӧрысь кыдзьяслӧн косьмӧм вожъясыс чегъясисны тӧв нӧйтӧмысь.

Лямпа вылӧ сувтӧмӧн Опонь дед тшапа муніс сикт кузя. Сійӧ вӧлі дженьыд ыж ку пася, мышкас ӧшаліс неыджыд пестер, веськыд бокас пуртӧсын тыдаліс кузь пурт.

Валентина Сергеевна, бедьясӧн йӧткасигтырйи, выль лыжиӧн исковтіс дед бӧрся. Сы вылын ӧшаліс брезентӧвӧй сумка, кӧні вӧліны медикаментъяс. Фуфайка улын, кодӧс сетіс сиктсӧветса председатель, морӧслы вӧлі шоныд.

Опонь дедкӧд да ичӧтик тушаа врачкӧд паныдасьысьяс сувтлӧмӧн видзӧдлісны на вылӧ, кодсюрӧ шыасьлісны старик дінӧ:

— Кытчӧ нӧ, Афанасий Кузьмич, мӧдӧдчинныд татшӧм пурганас?

— Ошкашорӧдз, — юрсӧ лэптыштӧмӧн вочавидзліс дед.

— Ошкашорӧдз! Ветымын километр! Он воӧй татшӧм поводдянас.

— Воам.

— Эз ӧмӧй томджык мортӧс тэ пыдди аддзыны? — жалитісны бабаяс.

— Мый нӧ менӧ сідзи пӧрысьтанныд, ичмоньяс?

— Энӧ жӧ бара кынмӧй туй вылас.

— Огӧ, бур йӧзӧй, огӧ.

Сикт регыд саймовтчис. Афанасий Кузьмич веськӧдчис видзьяс пӧлӧн, корсис лым улӧ тырӧм важ лыжня туй. Сійӧ муніс лямпаӧн кокниа, но тэрмасьтӧг. Морӧссӧ неуна чургӧдӧма водзлань, воськовъяссӧ вӧчаліс гырысьӧс, ӧткодьӧс. Тадзи жӧ рӧвнӧя шыблаліс и кияссӧ. Лолаліс ныр пырыс, пыдісянь. Тӧдчӧ вӧлі, мый Кузьмич аслас нэмын лямпаӧн ветлывлӧма абу этша. Валентина Сергеевна, дерт, эз куж мунны пӧрысь вӧралысь моз кокниа, но век жӧ эз кольччы дедысь.

— Менӧ кӧть эн жӧ таляв, бур ныланӧй, — шутитіс Кузьмич. — Кыдзи нӧ тэнӧ шуӧны нимнад да вичнад?

— Валентина Сергеевна...

«Мед эськӧ не янавны Кузьмич водзын», — мӧвпыштіс врач да мый вынсьыс исковтіс дась вӧчӧм лыжняӧд.

Крута шлапкысь сук лым кучкаліс чужӧмӧ, мешайтіс видзӧдны синъяслы. Шутьлялысь тӧв то лӧньыштлас, то ӧддзылас. Дедлӧн лымйӧн тырӧм тошкыс ӧні кажитчис ещӧ на еджыдджыкӧн. Сійӧ шочиника бергӧдчыліс бӧрвыв, медым видзӧдлыны, эз-ӧ кольччы врач. И кыв-мӧд шуыштӧм бӧрын сідз жӧ тэрмасьтӧг исковтліс водзӧ.

Сикт коли зэв нин ылӧ. Валентина Сергеевналӧн вочасӧн кутісны мудзны кокъясыс. Мышкын ӧшалысь сумка лои сьӧкыдджык.

— Мудзны кутінныд, Сергеевна?

— Нинӧм, кӧть и мудзышта.

— Рӧвнӧйджыка колӧ лолавны, сідзнад кокньыдджык муннытӧ, — велӧдіс дед.

Тӧвся лун кутіс катовтны рытлань. Паськыд лапъяса коз пуяс костӧд писькӧдчис нин пемыд рӧм. Важ мозыс гажтӧма омляліс тӧв. Сьӧктаммисны кокъяс. Паськӧм пӧлаяс кӧтасьӧмла йизисны.

Мыйӧн пемдыштіс, Кузьмич лямпасӧ веськӧдіс ю вылӧ, медым не сорсьыны туйысь пемыд вӧрын. Тані пыр и лои кӧдзыдджык, лэчыдджыка пӧльтіс тӧлыс. Кӧтасьӧм паськӧм сибдіс туша бердӧ. Юрсияс лоины сулик ваӧсь.

«Мыйла ме петі татшӧм сьӧкыд туяс? Тыдалӧ, ог вермы воӧдчыны охотбазаӧдз. Гашкӧ, вӧлі бурджык, пукалі кӧ сиктын шоныд керкаын, виччыси поводдя бурмӧм? Сэки, дерт, эз ков тадзи мучитчыны. Менӧ жӧ таысь некод эз вермы видны», — татшӧм думъяс бергалісны Валентина Сергеевна юрын.

Ӧтарӧ-мӧдарӧ чукльӧдлысь ю кузя найӧ мунісны вель дыр на. Сап пемыд рытын нин воисны вӧр керка дорӧ, кодлӧн джуджыд лым пиын тыдыштіс сӧмын вевтыс.

Кузьмич пӧрччис сюмӧд пестерсӧ, руч ку шапка вывсьыс пыркнитіс лымсӧ да лямпанас заводитіс весавны вӧр керкаӧ пыранінсӧ. Валентина Сергеевналӧн мудзӧмысла тіралісны кокъясыс, гӧгрӧс чужӧмыс быттьӧ ломзис, пиньясыс таркакылісны.

— Ёна мудзӧмыд, Валентина Сергеевна, — жалитіс сійӧс Опонь дед.

— Тэ ӧд мудзин жӧ, Кузьмич.

— Метӧ нинӧм, ме вӧсна эн шогсьы.

Изъясысь тэчӧм гор пытшкӧ сюялісны пес, кодӧс дасьтӧма кутшӧмкӧ бур морт. Билӧн кузь кывйыс азыма нюліс сирӧд ломтас. Курыд тшыныс сёйис мудзӧм синъяс. Лолавны вӧлі сьӧкыд, кӧть и ӧдзӧссӧ видзисны восьсӧн.

Джодж бердӧ юрнысӧ копыртӧмӧн пукалісны найӧ гор дорын да косьтісны кӧтасьӧм паськӧм.

— Кутшӧм тшына тані, Афанасий Кузьмич. Синтӧ кӧть эн восьты.

— Эн шогсьы, Сергеевна. Ваймас пачыс да некутшӧм тшын оз ло. Войдӧр ӧд ми кыйсигад таысь на омӧльджык вӧр керкаын овлім.

Опонь дедлӧн юкаліс мышкуыс, доймис кок пӧкйыс, но сійӧ быд ногыс зілис дзебны мудзӧмсӧ. Кор тшын лои этшаджык, лэччыліс ва дорӧ, медым пӧртйӧн вайны чай вылӧ ва. Кыз йисӧ ковмис розьӧдны вель дыр.

Вӧр керкаӧ пырӧм бӧрын заводитіс пузьӧдны чай. Восьтіс пестер вомсӧ, кыскис сэтысь шаньга стопа.

— Вай жӧ, доктор, сёйышт пызя шаньгасӧ, став мудзыд прӧйдитас, — дзормӧм юрсӧ шыльӧдыштіс турдӧм чуньяснас варов дед.

Врач эз кыв Кузьмичлысь сёрнисӧ. Сійӧ чорыда нин узис.

— Со кутшӧма мӧритчӧма, коньӧрушка. Жаль весиг чуксавнысӧ. Мед шойччас. Чӧскыд унмыд выя шаньга дорысь на чӧскыдджык, — ӧтнасӧн варовитіс дед.

Войнас Опонь дед унджык кадсӧ пукаліс, кок юкалӧм вӧсна эз вермы прамӧя узьны. Мыйӧн вӧр керка кутіс кӧдзавны, ас вывсьыс пӧрччис ыж ку пасьсӧ да надзӧникӧн шебраліс врачлысь кокъяссӧ.

«Мед кӧть лӧньыштас неуна поводдяыс, а то дзикӧдз мӧритчас нылыс», — юрнас довкйӧдліс сійӧ.

Асъявылыс Кузьмич мӧдысь пузьӧдіс чай, пачын шонтіс выя шаньга, сэсся заводитіс чуксавны врачӧс.

— Чеччы, Сергеевна, чеччы! Ылын на ӧд Ошкашорӧдзыд.

Валентина Сергеевна дыр эз гӧгӧрво, кӧні сійӧ да мый сыкӧд. Гӧгӧр доймис. Вель дыр тілис синъяссӧ, лӧсьӧдыштіс пратьмӧм юрсисӧ, муртса вермис кыпӧдчыны нар вылысь.

— Бур асыв тэныд, доктор, — мелі гӧлӧсӧн шыасис Опонь дед.

— И тэныд сідз жӧ, Кузьмич.

— Кутшӧма шойччин?

— Весиг ог помнит, кыдзи унмовси, сэтшӧма мудзсьӧма.

— Талун ӧд верман жӧ муннысӧ?

Валентина Сергеевна мыйкӧ дыра чӧв олыштіс, быттьӧ эз кыв дедлысь юалӧмсӧ, сэсся сьӧд синъяснас видзӧдліс Кузьмичлы чукыртчыштӧм чужӧмас да гораа шуис:

— Колӧ мунны! Верма!

— Вернӧ, бур нылӧй. Колӧ мунны, тэрмасьны. Тэнӧ сэні виччысьӧны.

Врачлы дум вылас уси, кыдзи сійӧ тӧрыт ӧти кадӧ повзьыліс сьӧкыд туйысь. И сійӧ думсьыс аслыс лои яндзим.

Сёйыштӧм бӧрын Опонь дед некымынысь кыскыштіс чушкан табак, кималасӧн корсис руч ку шапкасӧ, мышку вылас ӧшӧдіс пестер, коді ӧні сылы кажитчис кокньыдджыкӧн, и кӧсйис нин воськовтны ывлаӧ, но сійӧс киӧдыс кутіс Валентина Сергеевна.

— Дедушка, тэ ӧд войнас узин жӧ? Мыйкӧ тай сьӧкыда лолалан?

— Узьтӧг ӧд эг ов. Весиг вӧтӧн старука дінӧ волі, — серӧктіс Кузьмич. — Кыдзи нӧ узьтӧг!

— Паульсыд абу нормальнӧй. Эн кӧть висьмы.

— Ог, ог... Висьӧмыд ме дінысь ыліті кытшлалӧ.

Найӧ бара петісны сьӧкыд туйӧ.

Ывлаын тӧрытъя моз жӧ чепсасис турӧб. Лэчыд тӧв азыма сатшкысис тшӧкаӧ, чепляліс чужӧм. Гажтӧма шувгис парма, дзуртісны пуяс, на вылысь гылалісны туктаяс.

Югдытӧдзыс Опонь дед нуӧдіс ю кузя, сэсся бара кежис вӧр пытшкӧ. Пармаын кажитчӧ вӧлі шоныдджык, лӧньджык. Лун шӧр бӧрын найӧ сувтыштлісны сёйыштны пӧрӧм коз бокӧ. Кын нянь сьӧкыда сетчис пиньяслы, тасасьліс горшӧ.

— Тэ, Кузьмич, он кӧ и мудзлы-а?

— Водз на, аканьӧй, мудзнытӧ, квайтымын сизим на тыри, — тошсьыс гыӧрсӧ весаліг шмонитіс пӧрысь вӧралысь.

— А ме бара нин мудзи, — эз соссьы Валентина Сергеевна да сюйыштіс шаль улас сьӧд юрси пратьяссӧ.

— Мудзин кӧ, чӧскыдджыка узьсяс.

Кок улын заводитіс выльысь дзуртны небыд лым. Валентина Сергеевналы окота вӧлі ӧдйӧджык воӧдчыны Ошкашорӧдз, а сэтчӧдз вывті на ылын.

Бара нин кӧтасисны паськӧмъяс. Кокъяс да кияс кывзысисны омӧля. Синъяс водзын частӧ ыпнитлывлісны кутшӧмкӧ виж кругъяс, кодъяс пыр жӧ вошлісны кӧдзыд сынӧд пытшкас.

Опонь дед ещӧ на ёнджыка гӧрбыльтчис. Руч ку шапкасӧ вештіс юр пыдӧсланьыс, кепысьсӧ сюйис тасма костас.

Джуджыд кыр кайӧм бӧрын, кӧні нёльысь-витысь ковмис шойччыны, Валентина Сергеевналӧн гӧгӧр лёталіс, кокъясыс сэтшӧма слабитісны, восьлавны лои сьӧкыд. Лыжи кажитчис воддза дорысь уна пӧв сьӧкыдджык.

— Пуксьыштлам, дедушка, — тіралан гӧлӧсӧн шыасис врач. Киясыс сылӧн ӧдва кутісны лыжи бедьяссӧ.

— Позьӧ. Абу грек и шойччыштны, вель уна воськов нин мерайтім талун.

Найӧ пуксялісны мыръяс вылӧ.

— Зверьяс, пӧткаяс — ставӧн дзебсьӧмаӧсь, некӧн ловъя лов абу, — вомсӧ тяпкӧдыштіс Кузьмич.

— Мед кӧть час-мӧд кежлӧ дугдылас пургаыс, — фуфайка вывсьыс лымсӧ пыркнитіг шуис врач.

— Мӧдӧд сутки дурӧ, и он тӧд, кор помасяс.

Валентина Сергеевналы дум вылас уси Москва. Син водзас воліс Май 1 лунся демонстрация, коді нэм кежлӧ коли паметьын. Со студентъяс колоннаын Валентина восьлалӧ Краснӧй площадь вывті. Морӧс пытшкын долыда тіпкӧ сьӧлӧмыс. Трибуна вылын сулалӧны партия да правительствоса руководительяс. Найӧ нимкодя видзӧдӧны демонстрантъяс вылӧ. Валентина киас сэк нуис лозунг, кытчӧ зарни букваясӧн вӧлі гижӧма: «Морт — сійӧ медся дона капитал мирын».

— Медся дона капитал! — сьӧлӧмсяньыс шуис Валентина Сергеевна и пружина моз чеччыштіс мыр вылысь. — Мунам, Кузьмич! Миянӧс виччысьӧны! Мунам ӧдйӧджык!

Рытланьыс мунны лои ещӧ на сьӧкыд. Валентина Сергеевналӧн лыжиыс частӧ крукасьліс мыръяс костӧ. Кузьмич муртса жӧ кыскис пӧрысь кокъяссӧ. Ӧні найӧ унаысь сувтавлісны, медым ичӧтика кӧть шойччыштны. Но мудзӧм эз чин, а вочасӧн содіс.

«Водны эськӧ шоныд вольпась вылӧ да войбыд куйлыны вӧрзьӧдчывтӧг», — мӧвпаліс том врач. А сознаниеыс сэні жӧ висьталіс мӧдтор йылысь: «Ӧдйӧджык, ӧдйӧджык! Ошкашорын виччысьӧны тэнӧ». Яндзим босьтіс вольпась йылысь думайтӧмысь. Мудзӧм кокъяс надзӧникӧн, но пыр нуисны водзӧ. Воськов бӧрся воськов, джуджыд лым пыр, найӧ писькӧдчисны Ошкашорӧ.

Коркӧ сёрӧн нин пуяс костӧд дзузнитіс билӧн бледіник югӧр. Опонь дед ыджыда ышловзис, ки пыдӧснас чышкыштіс вом дорсӧ, быттьӧ кодкӧдкӧ окасьны лӧсьӧдчис.

— Со и воим, Валентина Сергеевна.

Врач немтор эз вермы вочавидзны.

Вӧр пӧвстӧ саймовтчыштӧм керка дорысь чепӧсйисны скӧр понъяс да гораа увтчигтыр уськӧдчисны локтысьяслы паныд.

— Бурлак! Найдыш! — горӧдіс Кузьмич понъяс вылӧ, кӧть эськӧ и оз вӧлі тӧд налысь нимъяссӧ.

Опонь дед отсаліс врачлы пӧрччыны лыжи. Босьтіс пельпом вывсьыс сумка да, Валентина Сергеевнаӧс киӧдыс кутӧмӧн, нуӧдіс пемыд посводзӧд. Керка пытшкӧ пырӧм мысти орчча комнатасянь на дорӧ уськӧдчисны олӧма нывбаба да визув синъяса, ар сизима нывка. Крӧватьяс вылын куйлысь мужчинаяс зіля пуксялісны, шензьӧмӧн заводитісны видзӧдны тӧдтӧм йӧз вылӧ, кодъяс татчӧ пырисны виччысьтӧг.

— Врач! — медводз гӧгӧрвоис гӧрд уска мужчина.

— Врач! Врач! — чилӧстіс вӧсньыдик гӧлӧсӧн ичӧтик нывка да тэрыба котӧртіс мӧд комнатаӧ.

— Кыдзи висьысьыс? — надзӧникӧн воськовтіс Валентина Сергеевна, а ачыс муртса эз усь.

Сійӧ жӧ здукӧ ён ки кутыштіс врачӧс киняулӧдыс да пуксьӧдіс скамья вылӧ.

Мыйкӧ дыра ставӧн чӧв олісны, видзӧдісны ӧта-мӧд выланыс.

— Кыдзи нӧ воинныд татшӧм поводдянас? — партук дорнас вижӧдыштӧм чужӧмсӧ чышкыштіс олӧма нывбаба.

— Ми ог нин вӧлі виччысьӧй тіянӧс, — шензис гӧрд уска вӧралысь.

— Ёна жӧ и мудзим, бур йӧзӧй, — вомсӧ тяпкӧдіс Кузьмич. — Эг жӧ эськӧ татшӧм вӧвлы том дырйиыд да пӧрысьмыны, тыдалӧ, куті.

Вӧралысьяс отсалісны пӧрччысьны врачлы да Опонь дедлы, сетісны шоныд гынкӧмъяс, лӧсьӧдісны пуксьыны скамья.

«Ӧнія вӧралысьяслӧн оланіныд абу миян батьяс кадся вӧр чомъяс кодьӧсь», — нимкодясис Кузьмич да мышнас топӧдчис пач бердӧ. Туша кузялаыс надзӧникӧн разалі шоныдыс. Кыдзкӧ аслысногӧн вӧлі лӧсьыд тайӧ сӧстӧм, гажа керкаас.

— Кӧні тіян висьысьыс? — халатсӧ пасьталӧм бӧрын юаліс Валентина Сергеевна.

— Тані орчча комнатаас куйлӧ, — шыасис нывбаба. — Но ті первой шойччыштӧй да шонтысьыштӧй.

Врач быттьӧ эз кывлы нывбабалысь кывъяссӧ, разис медикаментъяс тыра сумкасӧ, пуджыштіс сосъяссӧ.

— Меным колӧ мыссьыштны.

— Со мыссян дозйыс, а ки чышкӧдыс тані, — котӧрӧн ветліс пельӧсӧ да индіс мыссян доз вылӧ лӧз синъяса нывка. Сылӧн чужӧмыс вӧлі не аслас арлыд серти шог да серьёзнӧй. Врач мыссигкості нывка пыр сулаліс кывтын да кыв шутӧг видзӧдіс сы вылӧ. Чужӧмсӧ чышкигӧн нин Валентина Сергеевна казяліс сійӧс.

— Голубушка, кыдзи нӧ тэнӧ шуӧны?

— Наташа.

— Наташа! Бур, бур... А коді тэнад папаыд да мамаыд? Тэкӧд вот тӧдмасим, а сэсся папаыдкӧд да мамаыдкӧд тӧдмасям.

— Мама кулі, а папа висьӧ... Папа кулӧ жӧ... — юрсӧ улӧдз копыртіс нывка да кыкнан кинас тупкис синъяссӧ.

Валентина Сергеевна сӧмын ӧні гӧгӧрвоис, мый не ас кадӧ да дзик неладнӧ пані нывкакӧд тайӧ сёрнисӧ, вӧрзьӧдіс челядь сьӧлӧмысь медся ыджыд дойсӧ. Ӧні каитчис и видіс асьсӧ неосторожнӧя панӧм сёрниысь. Наташа сыркъялӧмӧн бӧрдіс.

— Тайӧ Кыневлӧн быдтасыс, — висьталіс нывбаба. А сэсся локтіс нывка дінӧ да малыштіс сійӧс юрӧдыс.

Кор врач пырис орчча комнатаӧ висьысь дінӧ, ставӧн чӧв усины. Сідз пукалісны минут-мӧд.

— Весиг эз шойччышт докторыд, — кодкӧ шыасис вӧралысьяс пиысь.

* * *

Валентина Сергеевна шатлаліг воськовтіс ляпкыдик порог вомӧн. Пу крӧвать вылын куйліс ар комына мужчина да сьӧкыда ымзіс. Сы дорын сулаліс нин Наташа да вӧсньыдик чуньяснас малаліс висьысьлысь дзугсьӧм юрсисӧ. Врачӧс аддзӧм бӧрын нывка вешйис крӧвать дорысь.

Валентина Сергеевна копыртчис Наташа дінӧ. Топӧдіс сійӧс морӧс бердас, дыр эз лэдз.

— Эн шогсьы, Наташа, батьыд бурдас. Непременнӧ бурдас!

Врач дыр видлаліс висьысьӧс. Кыневлӧн вӧлі крупознӧй воспаление лёгких. Температура кутчысис сэтшӧм вылын, мый Валентина Сергеевна весиг повзис.

«Сёрми, буракӧ. Омӧль кӧ организмыс, некутшӧм лекарство оз нин отсав», — парсӧ курччӧмӧн ветлӧдліс врач. Сэсся видзӧдліс Наташа вылӧ, коді вӧрзьӧдчывтӧг пукаліс пач дорын, и лои ещӧ на сьӧкыдджык.

Укол вӧчӧм бӧрын висьысьлӧн сьӧлӧмыс кутіс йӧктыны сэтшӧм ёна, быттьӧ кӧсйис чеччыштны ортсӧ. Валентина Сергеевна чужӧм вылысь позьӧ вӧлі казявны повзьӧм. Наташаӧс да нывбабаӧс сійӧ тшӧктіс петны.

«Вӧлі кӧ тані Ардальон Иванович, сійӧ, гашкӧ, вермис спаситны, ме жӧ пола — оз тырмы опытӧй».

Вой шӧр бӧрын нин Валентина Сергеевна петіс висьысь дінысь.

Кыневлӧн ёртъясыс, олӧма нывбаба, Опонь дед, весиг ичӧтик Наташа — ставныс на олісны.

Врач кыв шутӧг пуксис пызан помӧ, синкымъяссӧ увлань лэдзӧмӧн сьӧкыда ышловзис. Висьтавтӧг ставӧн гӧгӧрвоисны, мый висьысьлы вывті сьӧкыд, но некод эз кӧсйы та йылысь юавны.

— Сёйышт да шойччышт, Валентина Сергеевна, комын километр ӧд восьлалӧма, — торкис чӧвлунсӧ Кузьмич.

— Тар яй со пызан вылас лӧсьӧдӧма. Сёйышт да сэсся и водан, — шыасисны вӧралысьяс.

— Ме вӧсна, ёртъяс, энӧ тӧждысьӧй, — небыдика вочавидзис врач. Сылӧн думъясыс вӧліны висьысь дінын. Майшасис сьӧлӧмыс. — А ті водӧй, шойччӧй. И тэ вод, Кузьмич.

Вӧралысьяс регыд унмовсисны. Кияссӧ юр улас пуктӧмӧн узис и ичӧтик Наташа. Сійӧ унйывсьыс сёрнитіс, горзіс. Врач сувтіс нывка весьтӧ да дыр видзӧдіс банйӧм чужӧм вылас. «Батьтӧг, тыдалӧ, колян, ичӧтик аканьӧй», — шӧпкӧдіс ас кежас врач. Сылы сэтшӧм вӧлі сьӧкыд, эз тӧд кытчӧ воштысьны. Кӧдзыд ваӧн мыссьыштӧм бӧрын Валентина Сергеевналы лои кокньыдджык. Недыр мысти сійӧ выльысь пырис висьысь дінӧ.

Асывнас Опонь дед эз вермы чеччыны крӧвать вылысь. Сійӧ висьмис гриппӧн.

Врачлы ӧні ковмис нин лечитны кык висьысьӧс.

— Эновт менӧ, Сергеевна. Куйлышта и аски жӧ бурда, — сьӧкыда лолаліс Опонь дед.

Мӧд луннас Кузьмичлысь висьӧмсӧ збыльысь кодкӧ быттьӧ чышкыштіс. Температура чині.

— Ме жӧ висьтавлі, мися, висьны ме дыр ог эшты. Со тай порошкиястӧ юышті, и важсьыс ён лои, — дзормӧм юрсӧ малалігмоз шутитіс сійӧ.

— Тэ молодеч, дедушка, — нимкодясис Валентина Сергеевна. Но куйлыштны ковмас на.

Кык вой узьтӧмла врачлӧн сьӧд синъясыс видзӧдісны жугыля. Бледӧдыштӧм чужӧмыс кажитчыны кутіс векньыдджыкӧн.

— Кок йывсьыд усян шойччытӧгыд, — жалитісны сійӧс вӧралысьяс.

— Коді меным лючки висьталас, мый лои Кыневкӧд? Кыдзи сійӧ висьмис? — вӧралысьяс дінӧ пуксис врач.

— Василий Иванович миян мастерджык сёрнитны. Сійӧ и висьталас, — олӧма нывбаба индіс гӧрд уска мужчина вылӧ.

Василий Иванович скамьянас вешйис пачлань, гораа кызӧктіс.

— Мый нӧ висьтавнысӧ. Нёль лун сайын Кынев веськалас рысь кок туйӧ да заводитас туявны сійӧс. Матӧ вит километр вӧтчас зверь бӧрся и век жӧ суӧдас да виас сійӧс. Луныс вӧлі вывті кӧдзыд. Пӧсялӧм бӧрад, тыдалӧ, кынмис. Мӧд луннас сійӧс жар шыбитіс. Валентина Сергеевна, тэ вылӧ миян став надеяыс. Отсав сылы. Мортыс ӧд кутшӧм... доныс абу.

— Медбур вӧралысь сійӧ районын, — чигарка гартыштігмоз содтіс кызіник мужчина.

...А Кыневлы пыр на вӧлі зэв сьӧкыд. Войяснас сійӧ частӧ сӧрис. Лун и вой Валентина Сергеевна пукаліс висьысь дінын. Сетіс став кужӧмлунсӧ, медым кыпӧдны сійӧс кок йылӧ. Мукӧд дырйи врачлы кажитчис, мый вӧралысьлы сійӧ оз вермы сетны колана отсӧг. Думнас видіс лётчикӧс, коді повзис лёк поводдяысь, эз вермы ас кадӧ вайны сійӧс охотбазаӧ. «Вои кӧ лун-мӧд водзджык, ставыс эськӧ помасис бура».

Лӧз синъяса Наташа ветлӧдліс врач бӧрся да вӧсньыдик гӧлӧсӧн долис:

— Тётя Валя, а кор папа бурдас? Ӧні ӧд сылы кокньыдджык?

— Кокньыдджык, кокньыдджык, Наташенька, — бурӧдіс нывкаӧс сійӧ, а ачыс мыйлакӧ быд пӧрйӧ гӧрдӧдыштліс.

Витӧд луннас поводдя сэтшӧм жӧ крута бурмис, кыдзи и лёкмыліс. Вӧр сайсянь мыччысисны асъя шонді югӧръяс. Керкаын лои югыдджык, кыпыдджык.

— Аски туйӧ позьӧ петны, — юӧртіс врачлы Кузьмич. — Старука, кӧнкӧ, дзикӧдз нин гажтӧмчис.

— Афанасий Кузьмич, кытчӧ нӧ ӧтнад татшӧм туйӧ петан? Олышт ещӧ лун вит и мекӧд самолётӧн лэбзян.

— Э-э... Оз позь, Педӧраӧй, мися, гажтӧмчас.

— А висьман кӧ туяс?

— Ӧні ме дорӧ некутшӧм висьӧм кувтӧдз оз сибав, — сераліс пӧрысь вӧралысь.

Быд ногыс корисны Кузьмичӧс кольччыны, но сійӧ сулаліс аслас кыв вылын. Мӧд луннас колльӧдісны старикӧс туйӧ.

Кильчӧ помын Валентина Сергеевна топыда кутыштіс Кузьмичӧс сьылі гӧгӧрыс да пӧся окыштіс чужӧмбансӧ.

— Аттьӧ, Кузьмич, некор ог вунӧд тэнсьыд буртӧ. Не кӧ тэ, колӧкӧ, ме эг и вермы воны татчӧ.

— Тэныд пасибӧыс, Сергеевна. Со тай эн повзьы нинӧмысь, ветымын километр локтін. Мед тэныд кузь нэм да бур шуд.

Опонь дед сувтіс лямпа вылӧ. Колльӧдысьяслань ӧвтыштіс руч ку шапканас, улӧдз копыртліс дзормӧм юрсӧ и регыд воши гырысь пуяс сайӧ.

Врач дыр на сулаліс кильчӧ вылын да видзӧдіс асъя пемыдас.

Аскинас висьысьлӧн температура лэччис. Пульс кутіс тіпкыны шочджыка. Валентина Сергеевналӧн мудзӧм синъясын тыдовтчис радлун. Сійӧ дыр радліс ас кежас, сэсся уськӧдчис Наташалы паныд.

— Наташенька, волы татчӧ!

Кор нывка матыстчис, врач топыда кутыштіс сійӧс.

— Папаыд тэнад герой.

Рытнас, мыйӧн вӧралысьяс воисны базаӧ, Валентина Сергеевна босьтіс киӧдыс Наташаӧс да долыдпырысь локтіс на дінӧ.

— Папа миян бурдӧ, — нем виччысьтӧг юӧртіс нывка да чужӧмнас топӧдчис врач дінӧ.

— Збыль? — ӧттшӧтш юалісны некымынӧн.

— Да. Кризис прӧйдитіс, — и Валентиналы тайӧ вӧрса керкаыс ӧні кажитчис тӧдсаджыкӧн, мусаджыкӧн.

Сизим морт, ӧти бӧрся мӧд, кутлісны врачлысь пӧсялыштӧм кисӧ. Сьӧлӧмсянь аттьӧалісны сійӧс.

Висьысь асьсӧ кутіс чувствуйтны лунысь-лун бурджыка. Вочасӧн уси температура, воссис аппетит. Ён организм вӧчис ассьыс удж.

Рытъяснас Валентина Сергеевна частӧ казьтывліс Кузьмичӧс. «Воис эз бара гортас. Колӧкӧ, мыйкӧ лои туй вылас и мыйла ме лэдзи сійӧс ӧтнассӧ».

— Эн шогсьы, Валентина Сергеевна. Опонь дед опытнӧй вӧралысь. Нинӧм сыкӧд туйын эз ло, — такӧдісны вӧралысьяс.

Валентина Сергеевна Ошкашорын оліс дас ӧти лун. Кор висьысь дзикӧдз нин бурдіс, больничаса заведующӧй Ардальон Ивановичсянь воис радиограмма: «Аттьӧ тіянлы. Аски ыста самолёт».

Мӧд луннас жӧ, лун шӧр гӧгӧрын, Ошкашор весьтын мыччысис самолёт. Сійӧ вӧчис неыджыд кытш да пуксис охотбаза горулӧ.

Лётчик вайис вӧралысьяслы газетъяс, книгаяс, письмӧяс, медикаментъяс. Воис письмӧ и Валентина Сергеевналы. Лӧз конверт пиын куйліс ичӧтик бумага, кытчӧ чукыльӧсь гырысь букваясӧн вӧлі гижӧма некымын кыв: «Бур нылӧй, дона Валентина Сергеевна! Гортӧ ме вои бура. Старукакӧд виччысям тэнӧ пӧсь шаньга сёйны. Непременнӧ виччысям. Опонь дед».

— Молодеч, Кузьмич! — челядь моз радліс врач. — Воӧма лючки. А ме вӧлі шогся...

Ӧні, кор воис кад торйӧдчыны и колӧ вӧлі мунны самолёт дінӧ, Валентина Сергеевна эз тэрмась, а меліа видзӧдіс ичӧтик Наташа вылӧ да сылӧн батьыс вылӧ.

— Меным пӧра, — медбӧрын шыасис сійӧ да гартчыштіс шоныд шалльӧн.

Валентина Сергеевна прӧщайтчис аслас выль ёртъяскӧд. Кутшӧм унатор кӧсйис висьтавны Кынев, но эз вермы. Дыр мысти нин сӧмын шуыштіс:

— Ме некор ог вунӧд тіянӧс, Валентина Сергеевна, нэм чӧж кута помнитны.

— И ме ог вунӧд, тётя Валя, — врач гӧгӧр бергаліс Наташа. — Мӧд во велӧдчыны нин кута и письмӧ тэныд гижа. Ме, тётя Валя, врачӧ жӧ велӧдча.

— Велӧдчы, Наташа, велӧдчы, — нюмъяліс Валентина Сергеевна, сэсся выльысь кутыштліс да окаліс мелі нывкаӧс.

...Кор самолёт кыпӧдчис сӧдз небесаӧ да кытшовтіс база весьтті, Валентина Сергеевна видзӧдліс увлань да аддзис: базадінса нӧрыс йылын сулалісны Наташа да сылӧн батьыс, и кыкнанныс ӧвтісны носӧвӧйясӧн ылыстчысь самолётлы.